Illuatungiliuttut Naalakkersuisut pillugit: – Nammineq eqqarsarsinnaanngillat

- Naalakkersuisoqatigiit namminneq eqqarsarsinnaannginnamik, takorluuisinnaannginnamik tusarnaarsinnaassuseqannginnamillu, tassa killiffigivaat, Naleqqami siulittaasoq, Pele Broberg Naalakkersuisut sipaarnialikkersaarnerannut isornartorsiuilluni Sermitsiamut oqarpoq.

- Pisortat ingerlatsiviini tamani, namminersorlutik oqartussat kommunillu, sukumiisumik iluarsartuussisoqartariaqarpoq. Sipaartariaqarpoq sipaarniarfiusinnaasuni tamani, sipaarniarnermili innuttaasut atugarissaarnissaat innarlernagit iliuuseqarnissaq pingaaruteqarpoq. - Tamanna annernassaaq - kisianni suli iliuuseqarsinnaavugut, aningaasaqarnermut akileraartarnermullu Naalakkersuisoq Múte Bourup Egede (IA) tusagassiortunik katersortitsinermi oqarpoq.

Sulisinnaanngitsut

Inatsisartunili illuatungiliuttut, tassa Naleraq, isumaqataavallaanngillat:

- Nammineq ajortuliatik nammineq annaanniarsaralugit. Tunngaviatigullu ajornartorsiutit aaqqiiviginagit. Sulisinnaannginnerat takorluuisinnaannginnerat nutaarsiassaagunanngilaq.

Qanoq ajortulioramik? 

- Karserput imaarlugu massakkut killiffeqarnikuupput. Ukiuni kingullerni uteqattaagarput imatut ingerlasoqarsinnaanngitsoq.

Taassuma ilanngullugu Sermitsiamut oqaluttuaraa aningaasanut inatsisissaq pillugu isumaqatiginninniarnermi ammasimagaluarlutik.

-  Aningaasanut inatsisissatut siunnersuummut isumaqatiginninniarnernut ukiuni kingullernut aamma uagut ammasumik taasarnikuuarput. Ukiumut ½ milliardimik sinneqartoornissatsinnik angusaqarniarluta sipaarniutinik apuussisaqattaarnikuuvugut Naleraq sinnerlugu. Aningaasartuutiniunngitsoq.

Taamaakkaluartoq akisussaaq

Aningaasaqarnermut naalakkersuisup tikkuarpaa pisortat ingerlatsiviisa qimerloorneqarnissaat pisariaqartoq, tamannalu pissasoq avataanit misissuisitsinikkut, taakkulu siunnersuusiussasut innuttaasunut pisortat sullissinerat ajorseriaateqartinngikkaluarlugu sipaarniarneq qanoq ingerlanneqarsinnaanersoq pillugu.

Naalakkersuisut naapertorlugit pisortat suliffeqarfiini sipaarniartoqarnissaanik pisariaqartitsisoqalerneranut ilaatigut pissutaavoq, utoqqaallu amerliartornerat sulisinnaasut ikinnerulernerat. Tamatuma saniatigut Kalaallit Nunaat siunissami nutaanik aningaasarsiutigisinnaasaqarnavianngilaq.

Taamatuttaaq qinigaaffiup siuliani oqilisaatit akuersissutigineqarsimasut utertinneqarnissaat pilersaarutaanngitsoq erseqqissaatigineqarpoq. Assersuutigalugu sulinermut ilanngaat aamma akileraartarnermik aaqqissuusseqqinnerup tunngaviinik allanngortitsinissaq pilersaarutigineqanngilaq, aaqqissuusseqqinneq taanna 300 millioner koruunit sinnerlugit maannamut naleqarsimavoq.

Kisianni inuiaqatigiinnut akisussasoq, Pele Broberg isumaqarpoq:

- Ekspertinik atorfinitsillutik taakku akilersorlugit, namminneq eqqarsarsinnaannginnertik takorluuisinnaannginnertillu aporfigalugu tusarnaarsinnaassuseqannginnerat Naalakkersuisooqatigiit, tassa killiffigivaat.

Pele Broberg isumaqarpoq Namminersorlutik Oqartussat allaffeqarfii Danmarkimiittut nunatsinnut nuunneqarpata sipaartoqarsinnaasoq.

Pele Broberg mener selv, at man kan lave besparelser ved at flytte Selvstyrets administrationer, som er i Danmark. 

Taassumalu oqarnera naapertorlugu 100 millionit koruunit sinnerlugit sipaarneqarsinnaassasut, tamannalu nunap aningaasaqarneranut iluaqutaassalluni.