Ilungersuussilluartoq tunualersoq

Nakorsatut ilinniarsimasoq Ove Rosing Olsen kilisaataatileqatigiiffimmi Ice Trawl Greenlandimi 2006-imi siulersuisuni siulittaasunngormalli nammineq aningaasaatit imaluunniit ingerlatseqatigiiffiup nalinga 68 millionit koruuniniit 588 millionit koruuninut qaffassimavoq.

Ingerlatseqatigiiffik pigissaarlunilu ingerlalluartoq akiitsoqanngilaq.

- Ineriartornermut tassunga peqataalluni nuannerluinnartumik misigisaqarfiuvoq, taanna oqarpoq.

Ilungersuussilluartoq Ove Rosing Olsen, Sisimiuni najugaqartoq, siulersuisuni siulittaasutut tunuarlunilu siulersuisuniikkunnaassaaq. Ukiut 19-it siulittaasooreerluni juulip aallaqqaataani soraarninngorniarluni aalajangersimavoq.

Tamanna juunip 28-ani 75-inik ukioqalerneranut atatillugu pissaaq. Ove Rosing Olsen ingerlatseqatigiiffimmi piginneqataaginnassaaq.

Ice Trawlimi siulittaasup tullia Malik Hegelund Olsen raajarniarnermut aalisarnermullu ingerlatseqatigiiffimmi siulittaasunngussaaq.

Eqqissisimaassasoq

Ove Rosing Olsen sivisuumik, ulapittuulluni pisoqarfioqisumillu sulisartuusimavoq. Suliarpassuaqarpoq. Ice Trawl Greenlandimi siulittaasuunerup saniatigut ilaatigut Sisimiuni nakorsaanertut borgmesteritullu atorfeqarsimavoq. Aamma Siumut sinnerlugu Inatsisartunut ilaasortaasimavoq 1990-ikkullu qiteqqunnissaata tungaanut Kalaallit Nunaanni siullersaalluni peqqissutsimut naalakkersuisuusimalluni.

Ove Rosing Olsen soraarninngoruni sulerisassanersoq Sermitsiamiit aperaarput.

- Aasaq manna siullertut eqqissisimaaqqaalaassaanga. Ikinngutitoqqakka Danmarkimut tikeraassavakka, panigalu nukarleq Alma Dora pinngortitami pisoqatigissavara, taanna oqarpoq.

Ove Rosing Olsenip ilaqutarpassui Sisimiut eqqaani pingasunik illuaraqarput. Tassani viceværtiusarlunilu sanaartorneq aserfallatsaaliinerlu isumagikkajuttarpai.

- Ulluinnarni soqutigilluarlugu aalluttagara tassaavoq aalisakkanik neqinillu pujoorineq. Sisimiuni angerlarsimaffima naqqata iluani chilinik, naasunik mamarsaatissianik salatinillu naatitsisarpunga, Ove Rosing Olsen oqaluttuarpoq.

Ove Rosing Olsenip piginnaasai pitsaanerpaat

Ice Trawl Greenland, oqaatigineqareersutut ukiorpassuarni siulittaasuuffigisimasaa, raajarniummik angisuumik nutaaliaaqisumillu kilisaataateqarpoq. Ingerlatseqatigiiffik kilisaatinut angisuunut allanut marlunnut, saarullinniarlutik, qaleralinniarlutillu raajarniartartunut, piginneqataavoq. Ingerlatseqatigiiffimmi siulersuisut pingaarnertut pilersaarusiortuusut Royal Greenland ingerlatsisuuvoq.

- Ovep umiarsuit tulakkaangata ornigulluni umiarsuup naalagaa inuttallu tamarmik ajunnginnissaat qulakkeerniarlugu sapinngisamik oqaloqatigiartortarpai, Andrias Olsen, Ice Trawlimi pisortaq Royal Greenlandimilu kilisaateqarfimmi ingerlatsisoq oqarpoq.

- Ovep taamaaliortarnera piginaasaani pitsaanerpaat ilagilluinnarpaat, Andrias Olsen oqarpoq.

Ice Trawlip affaa namminersortunit 30-nit, sineriammi siammarsimasunit, piginneqataaffigineqarlunilu affaa Royal Greenlandimit pigineqarpoq. Annikitsukkaanik piginneqataassutillit aalisartuniit sanasunut allaat agguataarsimapput.

Ove Rosing Olsen Ice Trawlip ineriartornera pillugu tulluusimaarutissaqarluarpoq. 2006-imi siulittaasunngormalli Ice Trawlip nammineq aningaasaatai taaneqareersutut 68 millionit koruuniniit 588 millionit koruuninut qaffassimapput.

- Royal Greenlandimik suleqateqarneq illuatungeriinnut iluaqutaallunilu ineriartorfiuvoq.

- Sulisorpassuit pikkorissut, ullut tamaasa angusaqarluartarlutillu aalisarnerup atortullu ineriartortuarnissaat isumagisarpaat, Ove Rosing Olsen oqarpoq.

Ice Trawl Greenlandip ukioq manna apriilimi Hotel Sisimiuni ataatsimeersuarnerani ingerlatseqatigiiffik 2024-mi 68 millionit koruuninik sinneqartooruteqarsimagami piginneqataasunut 32 millionit koruuninik pissarsisitsivoq.

Aningaasanik aqutsillaqqissoq

Andrias Olsen, Ice Trawlimi pisortaq, Ove Rosing Olsen pillugu nangippoq:

- Ove angutaavoq pitsaasoq, inussiarnersoq peqatigiuminartorlu. Kalaallit Nunaanneeraluaruit, Savalimmiuneeraluaruit, Danmarkimeeraluaruit nunanilluunniit allaneersuugaluaruit tikilluaqqullutillu ataqqinnittumik pissavaatit. Kikkulluunniit naligalugit pisarpai.

- Siulittaasututtaaq Ice Trawlimi namminersortut piginneqataasut ilisimatinissaat tusarnaarnissaaallu pikkoriffigalugulu siulersuisunut paasinartumik ingerlateqqinnissaat pikkoriffigaa.

Ingerlatseqatigiiffik aningaasanik piginneqataasunut silatusaartumik tunniussaqartarniassammat Ove Rosing Olsen aningaasanik aqutsillaqqissimasoq Andrias Olsenip erseqqissarpaa.

- Siulittaasutut ingerlatseqatigiiffik aningaasatigut patajaattumik inissisimasoq pilersitseqataaffigaa. Ove siunissamik ungasinnerusumik eqqarsaateqartarpoq, naammagittartuuvoq aningaasallu nungulussinnarnagit ingerlatseqatigiiffimmik ingerlalluartumik pilersitsinissarput anguniarsimavaa.

- Ice Trawl ullumikkut suliffeqarfittut pigissaarluinnarpoq. Tamanna uanga isumaga malillugu ingerlatseqatigiiffimmut tunniussaata annersaraat, Andrias Olsen oqarpoq.

Nakorsaqarfimmi nakorsaaneq

Ove Rosing Olsen Ice Trawlimi siulittaasutut ullumikkut ilisimaneqarneruvoq.

Nakorsatut Københavnip Universitetiani 1978-imi ilinniarsimasunngorpoq. Ove Rosing Olsen nakorsatut immikkut ilisimasalittut ilinniarsimavoq. Nuummi Dronning Ingridip Napparsimmaviani immikkoortortat tamaasa 1983-imi ukiaq tikillugu suliffigisimavai. Sisimiuni nakorsaanertut 1986-imi atorfinippoq, 1990-ikkunnili piffissap ilaani politikeriuvoq.

Ove Rosing Olsen 1995-imiit 2015-imi nakorsatut soraarninngornissani tikillugu ilaatigut Sisimiuni Upernavimmilu nakorsaqarfinni nakorsaanertut atorfeqarsimavoq. Nakorsatut atorfeqarnermini ukiut kingulliit tallimat Sisimiuni Maniitsumilu nakorsaaniusimavoq.

 Siumumi siuttunut ilaasimasoq

Ove Rosing Olsen nakorsatut atorfininniarluni 1978-imi misilitsereerami Kalaallit Nunaannut angerlarluni partiimi pilersinneqaqqammersumi Siumumi suleqataalerpoq.

Taamanikkut Jonathan Motzfeldt, Moses Olsen aamma Lars-Emil Johansen politikkimi tusaamasaallutillu partiimi siuttuupput.

Ove Rosing Olsen 1979-imi Inatsisartunut qinersisoqarnissaa namminersornerullu atulersinneqarnissaa sioqqullugu Siumumi qineqqusaartitsinermut aqutsisutut toqqarneqarpoq.

- Suleqataasut amerlallutalu qineqqusaartitsilluarpugut, eqqaamasalersaarpoq.

Jonathanimut Lars-Emilimullu tapersersortaalluartoq

Ove Rosing politikkimik soqutigisaqartuaannarsimalluni oqaluttuarpoq. Angutaa Sisimiuni kommunalbestyrelsemi ilaasortaasimavoq, arnaalu inuiaqatigiinni oqalliseqataalluartarsimalluni.

 - Inuiaqatigiinnik pingaartitsingaarlunga akisussaassuseqangaarlungalu inunngorsimavunga.

 - Ineriartortitsisuullungalu malittarisassanik malinneqqissaartartuunngilanga. Malittarisassat inuunerinnissaput attaveqarluarnissamullu atorsinnaanngippata ineriartortitsilertarpunga allannguillungalu, Ove Rosing Olsen oqarpoq.

- Siuttooqataavoq. 1970-ikkunni 80-ikkunnilu Siumup aallartinnerani pisariaqartitsiffiunerpaami siuttunut ilaavoq.

- Lars-Emil Johansenimut Jonathan Motzfeldtimullu tapersersortaalluarpoq, oqaaseqartoq kinaassutsiminik taasiumanngitsoq Ove Rosing Olsenimilli ilisimannilluartoq oqarpoq.

Ove Rosing 1983-imi Siumup siulersuisuunerinut ilaasortanngorpoq, 1995-illu tungaanut ilaasortaalluni.

Ove Rosing Olsen 1991-imi, Namminersornerullutik Oqartussat aningaasaqarniarnerat ajorsiartortillugu, politikkerit nuimasut aalakoorpallaartarnerat kanngunartuliornerillu annertusiartortillugit, inatsisartunut qinigaavoq.

Lars-Emil Johansen naalakkersuisut siulittaasuattut siuttoralugu Siumut IA-lu naalakkersuisooqatigiilerput.

Ove Rosing Olsen 1991-95-imi peqqissutsimut avatangiisinullu naalakkersuisuuvoq. Ukiut ilaanni aamma inuussutissarsiornermut niuernermullu akisussaasuuvoq.

Ove Rosing Olsen 1995-imi nakorsatut sulinermut uterpoq. 1995-98-imi Royal Greenlandimi siulersuisuni siulittaasuuvoq. - Siulersuisuni siulittaasutut suliara pingaarneq tassaavoq suliffissuaqartitsinermik suliniut, tassanilu tunisassiorfiit amerlassusaat naleqqussarpagut, tassa ikilillugit, Ove Rosing Olsen oqarpoq,

- Suliniut taanna ingerlanneqarsimanngitsuuppat ingerlatseqatigiiffik akilersinnaasumik ingerlalersimanavianngikkaluarpoq, Ove Rosing Olsen isumaqarpoq.