Inatsisartunut ilaasortaasimasoq nakuusersimasutut eqqartuunneqartoq

Politikeriusimasoq nakuusersimasutut sapaatip-akunnerani kingullermi eqqartuunneqarpoq.

Angut taanna riiverutinik inummik allamik 2021-mi aggustimi anaalerisimasutut unnerluutigineqarpoq. Anaalerinerani riivit napipput, angutillu inuk allaa uppataatigut aamma anaalersimavaa.

Angut pinerluuteqaqqissagaluaruni ulluni 14-ini pineqaatissinneqarsimasunut inissiisarfimmiittussanngorlugu eqqartuunneqarpoq, ukiumilu ataatsimi misiligummik pineqaatissinneqarluni. Unnerluussisussaatitaasoq Lars Petersen Sermitsiamut paasissutissiivoq.

Eqqartuussut oqaatigineqareermat unnerluussisussaatitaasup unnerluutigineqartullu akueraat, pineqaatissinneqartulli akuersinini ullut 14-it qaangiutsinnagit allanngortissinnaavaa suliarlu suliareqqitassanngortillugu.

AAMMA ATUARUK

Ajortoqaqqippoq: Inatsisartunut ilaasortap unnerluunneqarsinnaannginneranik atuukkunnaarsitsisoqassaaq

Eqqartuussivimmut suliassanngortitsinissaq sioqqullugu Inatsisartuni qinigaaffiup ilaasortaavoq, tassanilu unnerluutigineqarsinnaannginnera atorunnaarsinneqarpoq.

Politikeri qinigassanngorteqqinngilaq Inatsisartunullu ilaasortaajunnaarluni.

Eqqartuunneqartup illersuisua Sermitsiap attaveqarfigaa, taannalu suliaq pillugu oqaasissaqanngilaq. Politikeri pineqartoq Inatsisartunut qinigassanngorteqqinnianngimmat pinerluuteqaqqissagaluarpallu aatsaat pineqaatissinneqarsimasunut inissiisarfimmiittussanngortinneqassammat aqqa Sermitsiap saqqummiutinngilaa.

Qinigaaffimmi matumani inatsisartunut ilaasortanik sisamassaa eqqartuussivilersuussisoqarpoq. Suliami ataatsimi unnerluunneqartoq pinngitsuutinneqarpoq, suliami allami politikeri nakuusersimasutut pinngitsuutinneqarlunili eqqissiviilliortitsisimasutut akiligassinneqarsimavoq.