Kattuffik nutaaq UAGUT Danmarkimi kalaallinut nukittunerulersitsissaaq: – Tusarneqartariaqarpugut
Danmarkimi kalaallit kattuffik nutaaq Uagut pilersippaat, taannalu kalaallit Danmarkimi najugallit 17.000-it missaanniittut ataatsimut oqaaseqartissavaat.
Danmarkimi inuiaqatigiinni kalaallit naligiimmik inissisimanerannik, saqqumilaarnerunerannik aammalu kalaallit kultoorianik paasinninnerup annertusaanissaq, Uagut-p siunertaraa.
– Kalaallit Nunaanni inuiattut ullorsiornermi kattuffik nutaaq pilersinneqarpoq – oqaaseq “Uagut”, tassa “uagut Danmarkimiittugut” naalisarnera, tassaavoq Danmarkimi kalaallit/inuit nutaamik ataatsimoorfiannut tunngavissiuisussaq. Inuit pisinnaatitaaffiinut, atugarissaarneq aammalu kinaassutsimut kultoorimut tunngasunik ukkatarinnilluni, Uagut Danmarkimi kalaallinut ataatsimoortumik oqaaseqartussaattut inissinniarneqarpoq, Julie Rademacher tusagassiuutitigut nalunaaruteqarluni allappoq.
Immikkoortitaasarneq akiorneqassaaq
Julie Rademachenip nassuiaatigaa Uagut-p siunertarigaa Danmarkimi inuiaqatigiinni kalaallit naligiimmik inissisimanerannik, saqqumilaarnerunerannik aammalu kalaallit kultoorianik paasinninnerup annertusaanissaq.
Soorlu paasititsiniaanikkut, attavitsigut, siunnersuinikkut kiisalu suleqatigiinneq aqqutigalugu Uagut Danmarkimi kalaallinut immikkoortitaasarnerata akiorneqarnissaa aammalu ataatsimoornerup nukittorsarneqarnissaa anguniarlugu suliniutigineqartoq.
- Kalaallit ataatsimoorlutik oqaaseqartussaatut oqariartuuteqarsinnaasut pisariaqartinneqarput. Amerlasuut takuneqarsinnaanatik, naligiissitaanngitsutut aammalu sinnerneqanngtsutut misigisarput. Tamanna allanngortissavarput – ataatsimoornikkut tulluusimaarutiginninnikkullu. Taamaattumik neriuutigaara amerlasuut ullumi ilaasortanngussasut” Uagut-ip siulittaasua Julie Rademacher oqarpoq nangillunilu:
- Kalaaliulluni ilaanni kisimiittutut misigisimanartarpoq aammalu allat oqaloqatigalugit paasivarput immikkuullarissutsit atorlugit ataatsimoorfiusinnaasumik pisariaqartitsisoqartoq.
- Soorlu ilaatigut qanoq pitsaanerpaamik immikkoortitaasarnermut, inuusuttorpassuarnut oqaatsinik annaasaqartarnermut imaluunniit ataatsimoorfiusinnaasumik pilersitsinissamut – tamarmik atorfissaqartippavut. Taamaattumik Kalaallit/Inuit Danmarkimi najugaqartutut nukittunerusumik ataatsimoortumik oqaaseqartoqalernissanut ataatsimoorpugut.
Uagut nammineersuuvoq aammalu partiinut sorlernulluunniit attuumassuteqanngitsoq. Maanna ilaasortanut aammalu suleqatinut nunatsinni najugaqartunut 17.000-t missaanniittunut iluaqutaasussatut Danmarkip naligiinnerusumik peqataatitsinerusumillu pilersinneqarnissaa anguniarlugu ammavoq.
