KNR pisortanik ujartuivoq

KNR-imi sulisut tunniusimasuupput suliffimmullu tatiginartuullutik, nammineq tamanna sulisut sulinermi iluarisimaarinninnerannut misissuinermi oqaluttuaraat.

Pisortamulli atiginninnerat appasingaatsiarpoq.

- Ukua pereersut eqqartoqqinneqarsinnaajuaannarput, pisortap soraarneranik kinguneqareerput. Ingerlariaqqinnissarli siulersuisuni assut siunniupparput, Nukaraq Eugenius, KNR-imi siulersuisuni siulittaasoq oqarpoq.

Torersaasoqassaaq

Pisortanngortussaq suliassaqangaatsiarpoq, suliffiup iluani torersaasoqassaaq saniatigullu KNR-i inerisarneqassalluni, inuiaqatigiit pitsaasumi sullikkumallugit, tamanna pisariaqartoq, siulittaasoq oqarpoq:

- KNR Kalaallit Nunaanni imaannaanngitsumik akisussaaffeqarpoq, ilaatigut inatsimmi allassimasut toqqammavigalugit pisussaaffeqarluni. Namminersortutut ingerlatsinissaminut pisussaaffeqanngilaq, kisiannili inuiaqatigiit kalaallit sullillugit kiffartuullugillu ingerlatsiniartussaavoq. Taannalu pisussaaffik toqqammavigalutigu ineriartorteqqittussaavarput.

Nunarsuaq digitaliusoq

Nunarsuatsinni susoqarnersoq oqarasuaatini angallattakkanit malinnaaffigisinnaavarput. Mobilitsinniimmi isiginnaarsinnaallutalu tusarnaarsinnaavugut. Tassunga KNR malinnaassaaq.

Nukaraq Eugeniusip ilanngullugu oqaatigaa KNR-mut illorsuassaq eqqartorneqaqqittariaqalersoq sulisut suliffeqarfiullu piffissamut malinnaalernissaa eqqarsaatigalugit. 

-  Ullumikkut tamatta mobilinik kaasarfiummioqarpugut, tassaniippullu aamma sumiikkaluaruttaluunnit isiginnaarsinnaasagut tusarnaarsinnaasagut aammalu nammineerluta sunniuteqarfigisinnaasagut. Tusagassiortulli nutaarsiassat tutsuiginassusaat qulakkeertariaqarpaat. Inuiaqatigiit isumaqaleqqunagit Facebooki tassaasoq eqqorluinnaqqissaartunik tusagassiisartoq. Taamaattoqanngimmat.

Pisortaq nutaaq imaattuussaaq

Annga Lynge pisimasuniippoq, pisimasulli ukkatarineqassanngillat. Siulersuisut siunissaq ukkatarerusuppaat.

Taamaattumik siulersuisut pisortassamik nutaamik maanna ujartuipput. Aalajangiiginnarani sulisunik ataatsimoortitsisinnaasoq suliffeqarfimmullu ingerlallualersitsisinnaasoq.

Siulersuisut siulittaasuaata, Nukaraq Eugeniusip oqaatigaa pisortaq nutaaq katersuuffiussasoq:

-  Siulersuisuni uagut inuk ujartugarput tassaavoq tusarnaarsinnaassusilik, sulisuminut ersarissoq tatigiuminartoq oqaloqatikkuminartoq avissaartuutsitsinani katersuutsitsisinnaasoq taavalu aamma pitsaassutsimik ujartuisoq. 

- Sulisut imaluunniit suliat suugaluartulluunniit sapinngisamik qaffasissumik pitsaassuseqarnissaanik ujartuisoq, Nukaraq Eugenius oqarpoq.