Kujtaani Ivittuuni orsugiassiorfiusimasoq pillugu DR-ip piviusulersaarusiaa Grønlands Hvide Guld sapaatip akunnera kingulleq Nuummi Katuami takutinneqareersorlu politikkikkut qisuariaatit amerlapput, tassungalu atatillugu Kaalaallit Nunaat danskit naalagaaffianiit eqqunngitsumik pineqarsimasoq isummersortut amerlanerpaat isumaqarput.
Inatsisartunut ilaasortaq Knud Mathiassen, Naleraq, piviusulersaarut pillugu inuit attaveqatigiittarfiat Tik Tok atorlugu qisuariaateqartunut ilaavoq, tassanilu Danmarkimut sakkortuumik isornartorsiunera paatsoorneqarsinnaanngilaq. Isummersuutaasali ilai Naleqqamiit tunuliaqutserneqanngitsut, partiip politikkikkut oqaaseqartartua, Jens Napaattooq, erseqqissaavoq.
Kujtaani Ivittuuni orsugiassiorfiusimasoq pillugu DR-ip piviusulersaarusiaa Grønlands Hvide Guld sapaatip akunnera kingulleq Nuummi Katuami takutinneqareersorlu politikkikkut qisuariaatit amerlapput, tassungalu atatillugu Kaalaallit Nunaat danskit naalagaaffianiit eqqunngitsumik pineqarsimasoq isummersortut amerlanerpaat isumaqarput.
Inatsisartunut ilaasortaq Knud Mathiassen, Naleraq, piviusulersaarut pillugu inuit attaveqatigiittarfiat Tik Tok atorlugu qisuariaateqartunut ilaavoq, tassanilu Danmarkimut sakkortuumik isornartorsiunera paatsoorneqarsinnaanngilaq. Isummersuutaasali ilai Naleqqamiit tunuliaqutserneqanngitsut, partiip politikkikkut oqaaseqartartua, Jens Napaattooq, erseqqissaavoq.
Oqaatsit sakkortuut
Inatsisartunut ilaasortaq Knud Mathiassen, Naleraq, Inatsisartunut, Kommuneqarfik Sermersuumi kommunalbestyrelsimut aamma Kuummiuni nunaqarfimmi aqutsisunut qinigassanngorteqqippoq, Ivittuunilu orsugiassiorfiusimasoq pillugu DR-ip piviusulersaarusiaa isiginnaareerlugu, Danmarkimut qallunaanullu sakkortuumik Tik Tok atorlugu isornartorsiuvoq.
- Namminiilivissaagut, taava namminiilivikkutta qallunaat nunatsinniittut angerlakaassapput.
- Ajunngilaq Pituffik (Pituffik Space Base aaqq.) amerikamiut paarisinnaavaat, ajunngilaq 100 milliardit koruuninik ukiumut nunatsinnut tapiisassaaq, taavalu Siriusikkut (Tunup Avannaani qimussumik nakkutilliisut (Sirius-patruljen aaqq.) angerlakaassapput, nammineq nunarput paarissavarput naleqqunneruvugut uagut.
- Pisiarineqassanngilagut kisianni namminiilivissaagut. Danmark imissaaleqisoq ajunngilaq ikiulaartassavarput.
- Paaseqqammerakkuuna ukiuni untritilikkaani taamannak iluanaarutigineqarsimasugut, ajunngilaq bloktilskudi nunatsinnut tunniussimasaat utertissavarput..annikitsuaraapput, Knud Mathiassen Tik Tok-imut ikkussamini ilaatigut oqarpoq.
Tunup sineriaani aatsitassarsiortoqalerpat tamanna nunatta karsianut ukiumut 150 milliardit koruunit missaannik isertitsissutaasassoq, taassuma ilanngullugu oqaatigaa.
- Qanoq aamma qallunaat taamannak iluanaarutigissavaatigut..taamaammat Naleraq qineruk namminiilivikkusuppoq piaartumik, politikeri Kuummiuninngaanneersoq ilaatigut taama oqarpoq.
Attortisimasoq
Orsugiak pillugu piviusulersaartut igisinnaareerlugu misigissutsikkut attortisimalluni, Knud Mathiassen nassuiaavoq.
- Danmarkip nunatsinnut aningaasanik tapissuteqartarsimanera eqqartorunnaarlutigu, qanoq iluanaarutigineqarsimanerluta eqqartortariaqarparput.
- Qallunaat Nunaanniit uukapaatitaasimasutut misigisimavunga. Naalagaaffinngorutta nunarput nammineq aqulertussaavarput, kisianni nunanik allanik aamma suleqateqarsinnaasariaqarpugut.
- Tik Tok-imut ilisanni toqqaannaq oqaluppunga, kisianni naalagaaffinngorutta Siriusikkut nunatsinniiginnassanersut eqqartorneqarsinnaavarput, taanna oqarpoq.
Kalaallit Nunaata kalaallillu Danmarkimiit uukapaasiarineqarnerat naammalertoq, taanna naggataatigut oqarpoq.
Qallunaat Kalaallit Nunaani aalajangersimasumik najugaqanngitsut, kisianni nunatsinni sulisut angerlartariaqarnerat pigini aammali qallunaat nunatsinniikkusuttut nunatsinniiginnarsinnaasut, Knud Mathiassenip kingusinnerusukkut erseqqissaateqarluni oqaatigaa.
Uggornartoq
Qineqqusaarnerup nalaani Knud Mathiassen inuttut kiffaanngisseqarluni oqaaseqarsinnaatitanerata ataqqigini Inatsisartunut ilaasortaq aamma Naleqqami politikkikkut oqaaseqartartoq, Jens Napaattooq oqarpoq. Taamaattorli qallunaat nunatsinniit aninissaanik oqarnera isumaqatiginngikkini taassuma erseqqissaatigaa.
- Qallunaat angerlarnissaannik oqariartuuteqarnera paatsuunganarpoq. Kalaallisut oqaatsitta nunatsinni annertunerusumik atorneqarnissaannik kissaateqarpugut, taannali qanorpiaq isumaqarnersoq immaqa paatsuulaarsimagunarpaa.
- Nunap inuii aallaavigalugit nunatta ineriartorteqqinneqarnissaa pingaartitaraarput, tassanilu nunarsuarmioqataasut tamaasa tikilluaqquagut. Kinaassusersiortuunngilagut aamma taama kippaaritsisumik qallunaaluartuunngilagut, taanna oqarpoq.
Taamaattumik qallunaat pillugit taamatut paatsuungarsinnaasumik oqariartuuteqarnera uggornartoq, kisianni nammineq inuttut oqariartuutigimmagit ataqqigini, Jens Napaattooq naggataatigut oqarpoq.
