Kokainilerisoqarsimaneranut eqqartuussineq Eqqartuussisoqarfik Sermersuumi ingerlanneqartup malinnaaffiginera nangeqqippoq. Unnerluutigineqartut marluk, S-imik N-imillu taasavut, ilaatigut kokainimik 112 gramimik tuniniaaqqinniarlugit suleqatigiissimasutut unnerluutigineqarput.
Taakkuli kammagiippallaanngillat. Politiit taakku eqqummagit tamanna takuneqarsinnaavoq. Eqqartuussineq tamaat politiit sisamat inimeeqataapput.
Kokainilerisoqarsimaneranut eqqartuussineq Eqqartuussisoqarfik Sermersuumi ingerlanneqartup malinnaaffiginera nangeqqippoq. Unnerluutigineqartut marluk, S-imik N-imillu taasavut, ilaatigut kokainimik 112 gramimik tuniniaaqqinniarlugit suleqatigiissimasutut unnerluutigineqarput.
Taakkuli kammagiippallaanngillat. Politiit taakku eqqummagit tamanna takuneqarsinnaavoq. Eqqartuussineq tamaat politiit sisamat inimeeqataapput.
S-i N-imut kokainimik tunisisimasoq N sisamanngormat oqaluttuarpoq. S taamaaliorsimannginnerarpoq. N-ip S-i kamaattorujussuuneranik immiussaq aamma tusarnaarparput.
S-ip N-imut allagai eqqartuussivimmi tallimanngornermi ualikkut sammineqarput. Allakkat taakku marluullutik Nuummi pineqaatissinneqarsimasunut inissiisarfimmiilereernerisa kingorna allataapput.
S-i N-i tigusareriarlugu anniartinniarlugulu oqarfigisimammagu S-i sioorasaarisimasutut unnerluutigineqarpoq.
KOKAINIMIK EQQUSSERIARNEQ PILLUGU SULIAMI INUIT AKISUSSAASUTUT INISSISIMASUT
S 44-nik ukioqarpoq Odensemilu inunngorsimalluni. S-ip ukiuni qulini pineqaatissinneqarnissaa unnerluussisumit kissaatigineqarpoq. S unnerluutigineqarpoq kokainimik katillugit 488,5 gramimik cannabisimillu naatitsinermut peqataasimasutut unnerluutigineqarluni. Taanna pisuunnginnerarpoq.
N 37-nik ukioqarpoq Nuummilu inunngorsimalluni. N-ip ukiuni sisamani pineqaatissinneqarnissaa unnerluussisumit kissaatigineqarpoq. N unnerluutigineqarpoq 112 gramimik kokainimik tigummiaqarsimasutut, taannalu S-imit tuniniagaassatut pissarsiarisimassaagaa ilimagineqarluni. Unnerluutigineqartup taamaattoqannginnerarpaa, kisianni 30 gramimik nammineq atugassarisimanerakkaminik pisinini nassuerutigaa.
Ikiaroonartulerinermut tunngatillugu unnerluutigineqarnermik saniatigut angutit pineqartut tamarmik immikkut unnerluutigineqarputtaaq sioorasaarisimasutut, taamatuttaq N tarnikkut persuttaasimasutut unnerluutigineqarpoq. Unnerluussissutaasunut aamma taakkununnga pisuussuteqannginnerarput. Eqqartuussineq sioqqullugu tamarmik Nuummi pineqaatissinneqarsimasunut inissiisarfimmi tigummineqarput.
S-ip allassimanini uppernarsarpaa, nakuusernissamilli sioorasaarinissamik siunertaqannginnerarlugu.
- Isumaqatigiinngittoqarpoq. Piusorliuna taamaatsillugu oqaluttuareqqullugu peqquinnariga, eqqartuussivimmi oqarpoq.
S-ip N pineqaatissinneqarsimasunut inissiisarfimmi allanut salluliuutinik siaruarterisutut pasivaa, oqaluttuarpoq. Pineqaatissinneqarsimasunut inissiisarfimmiittup allap nuliassani S-ip ilagisimagaa isumaqarpoq.
Allakkani oqariartuutit pillugit S-ip nassuiaataa N-ip isumaqatiginngilaa.
- Sioorasaarutaavoq, sioorasaareqqinneq. Anniartitsiniarluni allappoq, N tikkuaavoq.
Allagaq qanoq tiguiuk?, unnerluussisussaatitaasoq aperaaq.
- Pineqaatissinneqarsimasunut inissiisarfimmiittoq alla aqqutigalugu, nerisassanut toqqorneqarsimasoq, N oqaluttuarpoq.
Eqqartuussinermi ulluni siullerni unnerluutigineqartut marluullutik eqqissisimalluinnarput, S-illu eqqartuussinerup nalaani titartakkani allanut takutitai torragineqarput.
Sapaatit akunnera taava naavoq, kokaini pillugu eqqartuussivimmi aamma suliarineqarnera. Suliaq ataasinngorpat malinnaavigeqqissavarput, ilisimannittut arlallit tassani tusarfigissavavut.
