Kommuneqarfik Sermersooq Nuummi atuarfik Inussuup utaqqikatanneqartup sanaartorneqarnerani alloriaqqippoq.
Siunnersuinermik suliaqartut Sweco kommuni sinnerlugu neqeroorut saqqummiuppaa, maannalu kommunip tissaluttaatinik ikkussuineq tamanut suliariumannittussarsiutigilerpaa.
Kommuneqarfik Sermersooq Nuummi atuarfik Inussuup utaqqikatanneqartup sanaartorneqarnerani alloriaqqippoq.
Siunnersuinermik suliaqartut Sweco kommuni sinnerlugu neqeroorut saqqummiuppaa, maannalu kommunip tissaluttaatinik ikkussuineq tamanut suliariumannittussarsiutigilerpaa.
Suliassat makkuupput:
Peqqumaasivimmik allannguilluni tissaluttaatinut atortuusiviliorneq, illumi ikuallattoornermut isumannaallisaatissanik tissaluttaatilersuineq kiisalu illumi tissaluttaatinut atortuusiviliorneq imeqarfiliinerlu.
Suliariumannittussarsiuussinermi suliassap piffissami 2025-mi decembarimiit aallartinneqarnissaa 2026-milu aggustimi naammassineqarnissaa naatsorsuutigineqarpoq. Neqerooruteqartuttaaq DBI-p ikuallattoqartillugu atugassarititaasut pillugit maleruagassai malillugit suliaqarsinnaanermik allagartaqarlutik takussutissaqartariaqarput.
Sanaartornermi pingaarutilik
Atuarfiup ikuallattoqaratarsinnaanermut periusissiaa eqqarsaatigalugu, qatserisartunit akuerineqarsinnaassappat atulersinneqarpallu, tissaluttaateqarnissaq pingaaruteqarpoq. Ikuallattoqartillugu atugassarititaasunut tunngasut suliniutip kinguaattoorneranut peqqutaasut ilaattut oqaatigineqarnikuupput.
Tissaluttaatilersuineq maanna immikkut suliariumannittussarsiuunneqarpoq, taamaammallu pingaarnertut sanaartortup Ístakip tamakkiisumik suliassaanut ilaajunnaarpoq. Tamanna apeqqutinik pingaarutilinnik arlalinnik pilersitsivoq: Aalajangerneq Ístakip isumaqatigiissutaanut qanoq sunniuteqassava? Ikuallattoqalissagaluarpat periusissiap eqquutsinneqarnissaata qulakkeernissaanut kina akisussaasuua? Ullormullu akiligassanut tamanna qanoq sunniuteqarpa?
Kommunimit oqaaseqartoqarumanngitsoq
Apeqqutilli taakku akissutissarsineqanngillat. Suliaq suli ingerlasoq, taamaammallu oqaaseqafigineqaqqissanngikkallartoq Kommuneqarfik Sermersuumi Sanarfinermut Avatangiisinullu Ingerlatsivimmit ilisimatitsissutigineqarpoq.
Taamaammat kina akisussaasuunersoq, aamma pilersaarutit kinguartinneqarpata aningaasatigut qanoq kinguneqassasoq suli nalunarpoq.
Apeqqutit akissutinit amerlanerusut
Sermitsiami saqqummiunneqartutut sanaartornerup pingaaruteqarnerpaartaasa ilaat sanaartortumit allamit suliarineqartussanngortoq maanna pisortatigoortumik nalunaarutigineqarpoq.
Kommunimiilli akissuteqartoqanngimmat innuttaasut suliamillu ilisimasallit nalorninartorsiorput: Ikuallattoqalissagaluarpat periusissiaq kiap akisussaaffigaa? Aningaasartuutaareersut qaavatigut aningaasartuutit kiap akilissavai? Tamannalu Atuarfik Inussuup naammassineqarnissaanut qanoq sunniuteqassava?
