Utoqqaat apriilip aallaqqaataani kommunimut qinersinermi
sammineqartussatut pingaarutilerujussuupput.
Nuummiinnaq ukiut qulit matuma
siornamut sanilliullugu 2024-mi utoqqaat 64 procentinik amerlanerupput,
tamannalu inuit sivisunerusumik inuusarmata nuannerpoq.
Utoqqaat apriilip aallaqqaataani kommunimut qinersinermi
sammineqartussatut pingaarutilerujussuupput.
Nuummiinnaq ukiut qulit matuma
siornamut sanilliullugu 2024-mi utoqqaat 64 procentinik amerlanerupput,
tamannalu inuit sivisunerusumik inuusarmata nuannerpoq.
Aammali isumassuinermut piumasaqaatit annertunerujussuupput.
Ataaserlu pissutigalugu tamanna unammillernartorujussuusinnaavoq. Suliassamut
tamatumunnga assaat kissalaartut amigaataalersinnaapput.
Kommuneqarfik Sermersuumi suliffissaqartitsinermut
pilersaarut nutaaq tusarniaassutigineqarpoq, tassanilu isumaginninnermut
naalakkersuisoqarfiup ajornartorsiut tamanna sammivaa.
Naalakkersuisoqarfiup tusarniaanermut akissummini siunissami
isumaginninnermi sulisussanik, ilaatigut isumaginninnermi ikiortinik,
pisariaqartitsineq annertusiartortussaq immikkoortortaqarfimmi pilersaarummi
pingaarnertut sammineqarsimanngimmat tupigusuutigaa.
- Pisariaqartitsineq matussuserniarlugu, sulisut
piginnaanngorsarniarlugit sulisunillu atorfissaqartitsisunik
atorfinitsitsiniarluni iliuuseqartoqartariaqarpoq, naalakkersuisoqarfik
allappoq.
Utoqqaat isumagineqartarnerat tatineqaraluttuinnartoq
kommunip ilisimalluaraa, tamannali allatut — utoqqarnut periusissiami - sammineqartoq, kommunip akissutaani
allassimavoq.
Ilinniartut 20.000-it
Nunani allani utoqqarnut tunngasut
aningaasartuutigineqartussat sulisussarsiornerillu annertunerpaaffissaannut
killilerneqarnissaat isumaqatigiinngissutaanngilaq. Sulisut 40.000-it
amigaataalersinnaasut Danmarkimi utoqqarnut ministeri nalunaaruteqarpoq.
Utoqqaat amerliartornerat kisimi pissutaanngilaq, aammali
sulisinnaasut ikiliartorput. Tassa ikiugassat amerliartorlutillu ikiuisinnaasut
ikiliartorput.
Teknologii iluaqutigalugu ikiorneqarnissaq
aaqqiissutaasinnaasoq kommunalbestyrelsimi ilaasortap Dorthe-Marie
Mogensen-Fontainip, S, siunnersuutigaa.
Utoqqaat aningaasaateqarfimmik pilersitsinermikkut
sivisunerusumik angerlarsimaffimminniissinnaassasut isumaqarpoq, tassani pujoralaajaatinut
namminneq ingerlasartunut, siniffinnut qutsissisinneqarsinnaasunut aputaajaanermilu
iluaqutissanut pisinissamut aningaasanik qinnuteqartoqarsinnaassaaq:
- Utoqqalinersiallit tamakkuninnga pisinissaannut
akisuallaarpoq, siunnersuutini pillugu allappoq.
Kommunip aningaasaateqarfimmik taama ittunik
ingerlatsinissaa akuerineqarsimanngitsoq ingerlatsivik allakkiamini
erseqqissaavoq. Inuinnaalli aningaasaliisinnaapput. Ullumikkut pisortat
ikiorsiissutaat soorlu rollatorit, issiaviit kaassuartakkat, uffarfimmi
issiaviit, ajaappissat, alersilernermut atortut, perusuersartarfinni
qutsissuerutit allarpassuillu aningaasaliiffigineqartartut ingerlatsivik
erseqqissaavoq.
- Kommunip ikiorsiissutit atortorissaarutitut
nalinginnaasutut isigineqartut, soorlu pujoralaajaatit robotiusut siniffiillu qutsissisinneqarsinnaasut
akuerineq ajorai ingerlatsivik erseqqissaavoq.
Danmarkimi utoqqarnut sullissinermi sulisussarsiornermi
ajornakusoortorujussuusumi aaqqissuussaq pilersinneqarpoq, tassani
sosu-assistentitut (isumaginninnermi ikiortitut, aaqq.) ilinniarsinnaavutit
qaammammullu 20.000 koruunit missaannik akissarsisarsinnaallutit, tassami
ilinniarnerup nalaani angerlarsimaffimmi ikiortitut utoqqaallu illuini
sulisutut sulisarsinnaavutit.
