Malik Berthelsenip J.D. Vancep nulia naapikkumanngilaa
Qeqqata Kommuniani borgmesterip Malik Berthelsenip J.D. Vancep nulia Sisimiunut tikeraarnerani naapikkusunngilaa. Malik Berthelsen Sermitsiamut ilisimatitsivoq saaffigineqarsimalluni, qineqqusaarnerli pissutigalugu naapikkusussimanngilaa.
Assi: Leiff Josefsen
Qeqqata Kommuniani borgmesterip, Malik Berthelsenip (S) Sermitsiamut uppernarsarpaa amerikamiut aallartitaaniit attavigineqarsimalluni. Usha Vancep Sisimiuniinnermini borgmesteri naapeqatigerusussimavaa.
- Uppernarsarsinnaavara naapikkusullunga saaffiginnittoqarsimammat. Qineqqusaarnerulli nalaaniimmat inussiarnersumik itigartissimavakka. Siunnersuutigalugulu qinersereernerup kingorna taamaaliorsinnaasugut, Malik Berthelsen Sermitsiamut oqarpoq.
Avannaata Qimussersua pereerpat, apriilip aallaqqaataani kommunimut qinersissaagut.
Malik Berthelsenip aamma oqaatigaa Avannaata Qimussersua Sisimiuni pisussaammat tamanna pillugu tikeraarnissaat naatsorsuutigalugu. Borgmesterip aamma neriuutigaa illoqarfimmi innuttaasut ataqqineqassasut, taakkumi USA-mut qanoq isumaqarnertik akerliussutsimik takutitsinermi takutereermassuk.
Tikeraarneq pisortatigoortuunngitsoq
Usha Vancesip, USA-p vicepræsidentiata nuliata, Nuummut Sisimiunullu tikeraarnissaa pisortatigoortuunngilaq, taamaakkaluartoq Qeqqata Kommuniani borgmesteri oqarpoq Usha Vancesi ataatsimeeqatigiumanagu.
Tusagassiuutit naapertorlugit Usha Vance arfininngornermi marsip 29-ani Avannaata Qimussersuanut isiginnaariassaaq.
