Meeqqanut autismeqartunut ulloq naallugu atuarfeqalernissaa angajoqqaanut neriuuteqalersitsivoq

Paninnguaq Fleischer-Lyberth autismeqartumik erneqarpoq, atuarfissarlu tikilluaqqullugu. 

Angajoqqaarpassuit assigalugit meeqqanut atuartunut, atuartorpassualimmut ornigussinnaanngitsunut atuarfeqalernissaa oqiliallaataavoq.

- Ernerput atuarfimmi nalinginnaasumiissinnaanngilaq, naak atuarfik qanimut suleqatigigaluarlugu. Imaanngilaq piumassuseqartoqannginnami - pisariaqartitaanulli sinaakkutit erninnut naleqqussagaanngimmata.

Ulloq naallugu atuarfissaq atuartunut arfinilinnut inissaqarpoq, tassani ilinniartitsisut marluk perorsaasullu marluk sulissallutik.

- Meeqqat autismeqartut oqitsuinnaanngillat

Nalunnguarfiup Atuarfiani pisortap, Tim Arnoldip Sermitsiamut oqaatiginikuuaa atuarfissap pilersinnissaa ajornarsimanngitsoq, politikkikkut tapersersorneqarluaramik.

Tamannali Paninnguaq Fleischer-Lyberth eqqarsarnartoqartippaa.

- Eqqarsaammernarpoq tusarlugu pilersinnissaa oqitsuaraasimasoq. Meeqqat autismeqartut oqitsuinnaanngillat. Assersuutigalugu naapinneq siulleq meeqqanut isumaqartorujussuusinnaasarpoq. Naapinneq iluatsissimanngippat, ilinniartitsisunut perorsaasunullu ajornakusoortorujussuusinnaavoq.

Erseqqissaatigaali atuarfiup qanoq ingerlanissaa neriuuteqarfigalugu malinnaaffigiumaarlugu. 

Inaarutaasumimmi misilitsinnerit?

Sermitsiap kommuni saaffigaa, paasiniarniarlugu atuarfissap siunissamut sinaakkutissai suunersut - soorlu atuartut inaarutaasumik misilitsinnissaminnut periarfissaqassanersut, ilinniarnertuunngorniarfinnut ingerlaqqissinnaanissaat eqqarsaatigalugu.

Naamilli.

Ilinniartitaanermut ataatsimiititaliami siulittaasoq angalammat kommunimi pisortaaneq Hans Christian Sværd sinnerlugu akissuteqarpoq:

- Misiliilerpugut taamatut atuarfiliornissamut, taamaattumik siullermeertumik special klasseitut ingerlanneqassallutik. Siunissami qaninnermi misiiinerput taamatut atuarfiliornermi nalilersorneqassaaq qanoq ingerlanneqassanersoq, aammalu atuarfik anginerussinnaanersoq, illumiikkunnaarlutik. 

Ilaqutariit siunissamut toqqissisimanissamik kissaateqarput

Paninnguaq Fleischer-Lyberthip oqaatigaa atuarfimmut tunngaannanngitsoq, siunissamulli aamma tunngassuteqartoq.

- Neriuppugut iluatsissasoq. Neriuutigaarput ernerput atuarluassasoq, siunissami nammineersinnaaniassammat. Sorsukatappugut, maanna siumut aallarusuppugut.

- Iluatsissinnaanngippat, nunarput qimattariaqassavarput.