MIO meeqqat naammagittaalliornissaannut periarfissaqartitserusuttoq
Meeqqat pisinnaatitaaffii pillugit sullissivik Kalaallit Nunaanni naammagittaalliornissamut sullissivimmik, meeqqanut immikkut tunngassuteqartumik, pilersitserusuppoq.
MIO-p nalunaarusiaani nutaami naammagittaalliorfimmik oqartussaasut attuumassuteqanngitsumik pisariaqartitsisoqarnera sammineqarpoq.
Foto: MIO
Qinersisoqarnerani meeqqat inuusuttullu atugaat eqqarsaatigisariaqartut meeqqat pisinnaatitaaffii pillugit suliniaqatigiiffik isumaqarpoq.
MIO-p meeqqat pisinnaatitaaffii unioqqutinneqaraangata naammagittaalliuuteqartarfimmik pilersitsisoqarnissaa kissaatigaa. Maannakkut kattuffik taamaallaat nalinginnaasumik oqaaseqarsinnaasarpoq – naammagittaalliuuteqartarfiillu nalinginnaasut naammassinninngippata Inatsisartut Ombudsmandiat aatsaat sulianut akuliuttarpoq.
- Kalaallit Nunaata nunani tamalaani pisussaaffimminik eqqortitsinissaanut meeqqallu pisinnaatitaaffiinik qulakkeerinissaanut piffissanngorpoq, MIO allappoq.
Kattuffittaaq aamma nunat eqqaamiuusut pillugit tunuliaqutaasumik allagaqarpoq:
- Naammagittaalliornissamut pisinnaatitaaffiit meeqqallu ataasiakkaat pillugit suliat pillugit naammagittaalliornissamut oqartussaasut attuumassuteqanngitsut sunniuteqangaarsinnaasut Nunavummi Islandimilu misilittakkat takutippaat. Taakkunani marlunni meeqqat tusaanianeqarnerullutillu naammagittaalliuuteqarsinnaaneq meeqqanut ataasiakkaanut allannguinermik pilersitsivoq.
MIO-p qinersisartut aamma ima aperinissaannut kajumissaarpai: Kalaallit Nunaanni meeqqat tusarneqarnissaat illersorneqarnissaallu qanoq qulakkeerniarpisiuk?
