Naartusut ernisarfiit matuneqarallarnissaanut: Akisuvoq misigissutsikkullu sakkortulluni

Apriilip ulluisa 22-anniit Sisimiuni napparsimavimmi erninissaq ajornarsissaaq. Erniniarunik Nuummut erniartussapput. Ilaquttat najugarlu qimallugit. 

Sisimiuni nartusup nuummut erniartortortussaalluni paasigamiulli akerliusimagaluarluni Sermitsiamut oqaluttuaraa:

-  Isumakippallaarujussuartutut eqqarsarnarpoq ernisussiortoqarnianngimmat. Aallarluni erniartortariaqarluni allamik eqqarsaateqanngilanga aallariartoraluaannaq aflyseqattaarnissaq kinguaattooqattaarnissarlu. Nuummi angallanneq timmisartut eqqarsaatigalugit, ingammik naalungiarsunnguaq angallanniarsaralugu.

Taassuma oqaluttuaraa napparsimavimmut naammagittaalliortarsimagaluarluni kinguneqanngitsumilli. Timmisartuussinerni taamaatitsinerit kinguaattoornerillu ernumagai, ingammik inoorlaajuteqarluni.

Aningaasatigut ajalusoortitsisut

Seri Berthelsenni sisamassaa ernissaaq. Aatsaavissuarli najukkamini ernissanngilaq. Anaanatut kisimiittutut meeqqani pingasut Nuummut nassartariaqarpai, qimassinnaannginnamigit.

-  Paasigakku nakeriallappunga ilaami anaanaq kisimiittuugama, tupallungalu sooq illoqarfiup annersaata tullia sooq matugallarneqalernersoq, misigissutsikkut assoroornaqaaq meeraqarluni nukangasunik suli. Pisariunaaqaara ingammik nuummiinnikuunani saniatigullu aningaasanik atuinanaaqaara,

Aningaasatigut misigissutsikkullu angalaniarneq ilungersunarsimasoq ilanngullugu oqaluttuaraa.

20.000 koruuninik aningaasartuuteqartut

Najaaraq Lennert aamma sisamassaa ernissaaq, juunimut killeqarluni. Maajip qaammataani ilaquttani tamaasa ilagalugit nuummut erniartussaaq. Angalaneq ilaqutariinnut 20.000 koruunik sinnerlugit akeqartoq. Ilaquttaminummi angalaneq, ineqarneq nerisaqarnerlu nammineq isumagaat. Qaqugulu angerlarnissartik nalugallaramikku ammasumik billetseqarput.

-  Meeqqagut pingasuusut nukangasortaqarmata anaana ataatalu tamarmik pisariaqartinneqarmata tamattaalluta Nuummukassaagut.

Taassuma aamma ilanngullugu oqaluttuaraa angalanissamut aningaasartuutissat eqqarsaatigalugit uippakajaarnarsimasoq. Meerarlu killissarititaasoq qaangerlugu inunngoruni ilaqutariinnut suli akisunerulissaaq, soorlu ineqarnermut nerisaqarnermullu.

- Piffissamik nukinnik aammalu aningaasanik annertuumik atuisitsivoq ilaquttat ilagalugit erniartornissamik iliuuseqarneq. Soorunami tamatta qilanaarpugut ilaarassarput inunngornissaanut.