Naluttarfittaarnissaq suli eqqarsaataavoq – kommuni aningaasaliisussarsiulersoq
Qeqqata Kommunia Sisimiuni naluttarfiliornissamut 20 millionit koruuninik immikkoortitsivoq, suliniulli piviusunngortinnissaanut 80 millionit koruunit missaat suli pisariaqartinneqarput. Borgmesteri Malik Berthelsen Sermitsiamut oqaatigaa aningaasartuutit katillugit 100 million koruunit missaanniissasut.
Assi: KHR Architecture
Naluttarfittaassaq Sisimiuni kulturikkut illorsuup Taseraliup eqqaaniinnissaa pilersaarutaavoq. Nasaasaamut Nalunnguarfimmullu isikkiveqassalluni.
Illunik titartaasartut, KRH Architecture, naluttarfissaq qanoq isikkoqassanersoq titartarpaat.
Borgmesterip nassuiaataa malillugu naluttarfissap Taseralimmut, meeqqerivinnut timersortarfimmut sisorartarfimmut qaninnera pitsaaquteqassaaq:
- Tassunga inissinneranut pissutaavoq, Taseralik, meeqqat atuarfii, timersortarfeeraq, sisorartarfillu imminnut qanitsillugit inissisimanerisigut imminnut pitsaasumik sunniivigeqatigiissinnaammata.
Nunalli qanoq ititiginera apeqqutaavoq, nuna sanaartorfigineqartussaq itivallaassappat toqqavissamik allamik ujaasisoqassaaq.
Kommuni aningaasaliisussanut maanna qinnuteqaasiuleruttorpoq, naatsorsuutigalugulu aasaq manna qinnuteqaat nassiutissallugu. 80 millionit koruunit pissarsiarinisai siunertaavoq, taamaalilluni uani qinigaaffimmi piviusunngortinniarneqassalluni.
Suliniummut siullermut aningaasat 50 millionit koruunit annaaneqartut
Sisimiuni nutaamik naluttarfiliornissamut pilersaarutit siullermiilinngillat.
A.P. Møller Fonden 2016-imi 50 millionit koruuninik qaqqap iluani naluttarfiliornissamut 2018-imi naammassineqartussatut tunissuteqarpoq. Suliniulli taamaatiinnarneqarpoq 200 millionit koruunit missaannik akeqarnera pissutigalugu – taamaalillunilu tunissuteqarneq annaaneqarpoq.
- Taakkua qaqqap iluani naluttarfiliornissamut tunissutaagaluarput, kisianni akisuallaarnera pissutigalugu unitsikkatsigu annaanikuuvagut. Pissutigalugu qaqqap iluani sananissamut atugassatut tunissutaagaluarmata, borgmesteri oqarpoq.
Maanna naluttarfittaarnissamut pilersaarut piviusunngortinnissaanut ulappusileruttorput. Aningaasaliisussalli apeqqutaapput.
- Qaqugu aallartissinnaanissaannut apeqqutaasorujussuussaaq aningaasaateqarfinniit taperserneqassanersugut, naatsorsuutigaaralu ukiup naalernerani tamanna pillugu akisinnaanerussaagut. Kisianni pinngitsoorata piviusunngortinniarnissaa pimooruppagut.
Maniitsumi aamma naluttarfittaarusuttut
Sisimiuni naluttarfittaarnissamut aningaasaliisussarsiortoqaraluartoq, Maniitsumi innuttaasut aamma naluttarfittaarnissaat kommunalbestyrelsip anguniagaraat. Taanna naluttarfissaq timersortarfimmut atasussaassaaq.
- Naluttarfiit innuttaasut tamarmik peqqissusaannut ilorrisimaarnissaannullu annertuumik pingaaruteqarmarta nerioqaanga aningaasaateqarfinniit ilassilluarneqarumaartut.
