Nannut saassussigaangata

Kalaallit Nunaanni saassunneqarnermit toqquteqartut amerlanngillat. Piffissaq qaninnerusoq eqqarsaatigalugu.

Nannulli inoqarfinnut qanillisartut amerliartuinnarput, ajornerpaatilluguli saassussisarlutik.

Ilisimatusartoq tyskeq Traill Ø-mi siorna aasakkut saassunneqarpoq Islandimullu napparsimmaviliaanneqarluni passunneqarluni qujanartumik aniguivoq.

Svenskeq assiliisartoq Daneborgimi Tunumiittumi inimini nannumit iserniarneqarami ukiualuit matuma siorna tupatsitaarujussuarpoq. Igalaaq ammasoq nannup assiliisartoq assaatigut kiivaa, nakorsarneqartariaqarmallu Islandimut timmisartuunneqarluni. Pisimasoq tupannarsimaqisoq tusarfiit AG-mut kingorna oqaluttuaraat.

Angut sapiitsoq

Issittumi saassussinerit kingulliit qaammatialuit matuma siorna — decembarimi — Canadami Ontariop avannarpasinnersaani Fort Severn First Nationimi, Hudsonip Kangerluata eqqaani kuup Severnip sinaaniittumi, pisimavoq.

Aappariit qimmitik aallugit anisut nannup toraarlugit arnaq saassuppaa.

Uiata inuunini navianartorsiortillugu nuliami saanut pivoq, annertoorujussuarmillu niumigut tallimigullu ajoquserneqarluni. Sumiiffimmi tusagassiutit naapertorlugit aamma taanna aninguisimavoq.

Aappariit nunaqqataasup ajornerusumik pinissaraluannik annaassimavai, pinasuartumik aallammik sakkoqarluni ornigunnermigut. Nanoq ikeqarluni piffimmiit qimaavoq kingusinnerusukkullu orpeqarfiusumi toqungasoq nassaarineqarluni, sumiiffimmi politiit tusagassiuutinut taama nalunaaruteqarput.

Angut toqutaasoq

BBC-p aggustimi 2024-imi Nunavut avannaani Brevoort Islandimi alianartumik pisoqarsimanera aamma oqaluttuaraa. Stationeqarfiup illutaata, inoqarfiup avasissuaniittumi sulisoq anillamat nunnunit marlunnit saassunneqarpoq.

Saassussinerup pinerani suleqataasut pinasuartumik ornigussimapput nannullu aappaa toqullugu, aappaali qimaasimavoq.

Ajoraluartumilli angutip saassunneqarnermini ajoquserneqarnini toqqutigai.