“Nunaga sullikkusuppara”

Nuummi Politiinngorniarfimmi ilinniarneq immikkuullarissuunngilaq. 

Init, Qapiarfiusaami pisiniarfiup “Kamik”-ip qulaaniittut, ilinniarfiit atuarfiillu allat assigalugit atorluarneqarsimapput. AG-li aqqusaarmat ilinniartitsisut atuartullu naapikkuminarput

Tassani Sandra Kreutzmann Leander atuaqatinilu arfineq-marluk politiinngortussat atuartarput.

Ilinniartut ilinniarnerup immikkoortua siulleq, qaammatini aqqanilinni atuarfimmiinneq, januaarip 15-ianni aallartippaat. Kingorna qaammatini aqqanilinni sulinermik misiliissapput, tamatumalu kingorna ukiup affaani atuarfimmeeqqeriarlutik kingorna politiitut sulilersinnaapput.

- Atualerluni qanoq ippa?

- Nuanneqaaq. Pissanganaqaaq. Suna tamarmi aamma aamma sukkasuumik ingerlavoq, ilikkagassarpassuaqarporlu, nuummioq 24-nik ukiulik, Sandra Kreutzmann Leander, politiinngorniarnini pillugu AG-mut oqaluttuassalluni akuersisimasoq, oqarpoq.

Tamanna oktobarimi 2020-mi aallartippoq, tassani Sandra naluttarfimmi Malimmi annaassiniartartutut atorfinitsinneqarpoq. Suliffimmi timimik atuiffiusumi sulerusukkami ikiueqqaarnermik ilinniarneq tiguartiffigaa.

- Inunnik assaassineq paasisaqarfigaarput. Taava eqqarsaatigisalerpara. Soqutigisorujussuanngorpara, Sandra oqaluttuarpoq.

Aappaaguani Namminersorlutik Oqartussani oqarasuaatinut nuutsitsisarfimmi sulilerpoq. Tassani sinerissamit nunanillu allaneersunit sianertut tamaasa akisarpai. Eqqarsaat isumassarsiallu qanoq pilersimanerat eqqaamalluarpaa: Taavami taakku marluk ataatsimoortikkukkit? Tassa sianertut inuunermik annaassisinnaasut akisarnissaat... isumassarsivoq.

Sandra Kreutzmann Leander marsimi 2023-mi EF-imi (Education First) qaammatini pingasuni USA-miippoq. Nunatta avataaniittunik misigisaqarniarluni tuluttullu oqaatsit ilitsoqussarinagu oqaatsitut siullertut atulerniarlugit.

- 911-mi ikiortitut (kalerrisaarilluni sianertunik oqaluussisartoq, aaqq.) Kalaallit Nunaannut utissallunga ullorsiutini allattaavinniluunniit allassimavunga, Sandra qunguppoq oqaluttuarlunilu Kalaallit Nunaannut angerlarami nalaatsornerinnakkut Sermitsiap nittartagaani politiit pigaartuisa immikkoortortaqarfianni ikiortitut atorfik inuttassarsiuunneqartoq takusimallugu.

Sandra qinnuteqarpoq 2023-milu novembarimi sulilerluni.

- Takorluugaq piviusunngorpoq. Tamanna nuannaarutigeqaara. Suliffiga nuannarilluinnarlugu ingerlalluarfigalungalu misigivunga.

Taamanili politinngornissani eqqarsaatigilereersimavaa. Politilli silarsuaat ilisarisimalertariaqarpaa. Aammali politiitut misilitsinnissamut timikkut piareersimanngilaq, tassanimi timikkut nukittuujunissaq peqqissuunissarlu piumasaqaataapput.

Taamaammat Sandra sunngiffimmini timigissartarfimmi sungiusartalerpoq.

- Nukittorniassagama arpattalerlungalu kivittaarisalerpunga, oqarpoq, arriitsumillu nukittoriartuaarnertut taavaa. Meeraalluni arsartarlunilu assammik arsartarsimasoq, inuusuttuullunili timersortarsimanngitsoq arriikkaluamik nukittoriartorpoq.

Aataap sunniutaa

Sandrap ikiueqqaarnermik misilittagaqarnerata, politiitut ilinniarfimmut ingerlaqqinneranut aqqutissiuussisup, saniatigut anaanaminiit aataava aamma sunniuteqarpoq.

Taanna 1968-imiit 2000-ikkunnut politiitut sulisimavoq, nunamilu sumiiffinni assigiinngitsuni sulisimalluni, oqaluttuarpoq:

- Sisimiuni aallartippoq, taamanikkulli politiitut ilinniarniaraanni Danmarkiliartariaqarpoq. Aataga sumi suliffissaqarnersoq apeqqutaalluni illoqarfimmiit illoqarfimmut nuttarnikuuvoq.

Sandra Kreutzmann Leander nammineq illoqarfimmini Nuummi suliumavoq, aammali Kalaallit Nunaanni sumiiffinni allani sulinissaq soqutigisinnaavaa.

Ataaserli qularutissaanngilaq:

- Nunaga pillugu suliumallunga qularinngilara.

Politiinngorniarliuni ilinniartoq 24-nik ukiulik nangilluni oqarpoq peroriartornermini ataataasoq politiiusoq qanoq ittuunersoq angajoqqaaminit oqaluttuunneqartarluni.

- Soqutiginarpoq, uannut maligassiuivoq, Sandra oqarpoq.

- Qanoq maligassiuiva?

- Politiit atisaannik atisaqarluni kusanartumik assilitissimavoq. Nuannaartoraara, oqaluttuarpoq itisiliillunilu:

- Politiit silarsuaanniilereerlunga eqqarsaatigisarpara: Taamanikkummita qanoq iliortarpa? Nalunaarusiai atuarusuppakka, aatani toqoreersoq pillugu oqarpoq. 

Tiguneqarumalluni misilitsinneq piumasaqaatilik

Tiguneqarumalluni misilitsinnissaq nallermat Sandra Kreutzmann Leanderip timigissartarfimmi sungiusartarsimanera imminut akilerpoq.

Annermik nukittussutsimut misilitsinneq oqinnerullunilu arpalluni misilitsinneq unammillernarneruvoq. Arnat sivisunerpaamik 13,30 minutsit atorlugit 2,4 kilometerit arpattariaqarpaat, Sandra ilisimatitsivoq.

- Timi tamarmi atorneqartarpoq, taamaammat unammillernarnerpaavoq, naqissusiivoq.

Tiguneqarumalluni misilitsinnermi angutini arnanillu qinnuteqartuni timikkut assigiinngitsunik piumasaqaateqarpoq, angutillu orsoqarpallaarnatik nukeqarnerusarlutillu timikkut nukittunerusaramik arnaniit sukkanerusumik arpattarput.

Politiinngorniat timikkut sungiusarnerat misilitsinnermi killeqarneq ajorpoq. Qasujaanniarlutik nukittuniarlutillu timigissartarfimmi sapaatip-akunneranut marloriarlutik sungiusartarput.

Politiinngorniarfimmili ilinniarneq oqaatsitigut aamma unammillernartoqarpoq. Tassanilu qallunaat oqaasii avaqqunneqarsinnaanngillat, tassami Kalaallit Nunaanniikkaluarluta politiit suli qallunaanit akisussaaffigineqarput, Sandra Kreutzmann Leander oqarpoq.

"Qallunaatut oqalussinnaaneq allassinnaanerlu – imaluunniit ilikkarneqarsinnaasoq" piumasaqaatit ilagigaat politiit nittartagaanni politi.gl-imi atuarneqarsinnaavoq.

Taamaammat qallunaatut suliamik, suleqatigiilluni naammassisassamik tarnip pissusaanik ilisimasalinnit nalilersukkanik aamma ataasiakkaarluni, aamma qallunaatut, politiinit sisamanit oqaloqatigineqarnermik allattariarsornikkut misilitsinnissamut piareersartariaqarpoq.

Sandra Kreutzmann Leander qallunaatut oqaatsit atornagit peroriartorpoq. Kisianni qallunaatut tuluttullu oqaatsit ilikkaruminartippai.

- Oqaatsinut pikkorinneq iluaqutaavoq, naqissusiivoq.

Politiini ingerlatsisut issiaqatigalugit sooq politiinngorusunnerluni nassuiaanissaq annilaanganarlunilu pissanganarpoq.

- Naakkut quinarujuttuinnaavunga. Aammali pissangallungalu qilanaarpunga, eqqaamasarsorpoq.

Sandra Kreutzmann Leander allanik malinnikkumasunik qanoq siunnersuissanersoq aperineqarami ima akivoq:

- Iliuuseqarit. Timigissarlutit aallartigit. Tamanna unammillernarnerpaavoq. Oqaatsit kalaallinut unammillernarnerusinnaapput. Kisianni sungiusarsinnaapput. Filmit qallunaatoortut imaluunniit suulluunniit iluaqutigisinnaasat isiginnaakkit. Kisianni qallunaat oqaasiisa atorneqangaatsiarnerat piareersimaffigisariaqarpat, Sandra oqarpoq.

Amerlaqatigiittut

Politiinngorniani kingullerni, Sandra Kreutzmann Leanderip atuaqatigisaani, angutit arnallu amerlaqatigiillutik sisamakkaarput, atuartullu siuliini marlunni arnat amerlanerussuteqartarsimapput.

Sandrap silarsuaani angut arnallu agguataarsimanerat apeqqutaanngilaq:

- Arnat politiiniittut amerliartuinnarput. Aatama politiitut sulinerata nalaanimut sanilliullugit. Uangali maluginianngilara. Inuunera tamaat arnat poliitut sulisut takujuaannarnikuuakka, oqarpoq.

- Angutinit suliffigineqakkajunnerusumi sulinissat aalajangertussannguleravit eqqarsaatiginikuuiuk?

- Tamanna eqqarsaatiginngilara. Pigaartunili sulilerama tamanna takusinnaalerpara. Ukiup ataatsip ingerlanerani pigaartuni sulisut arnaannaanerat ataasiaannarlunga misigaara. Tamannalu tulluusimaarutigeqaara, "arnat piginnaasallit,“ Sandra oqarpoq.

- Misigisat assigiinngitsut sakkortusinnaanerat qanoq eqqarsaatigisarpiuk?

- Sulileruma qanoq issanersoq pissangagaara. Filminimi „pissanganartorsiortoqartuaannarpoq.“ Piviusumili 20 procentia pissanganarlunilu 80 procentia nalunaarusiorfiusarpoq. Taamaammat ajorunnanngitsoq ilimagaara, oqarpoq.

- Politiinngorniarfimmi ilinnialeravit ilagisartakkatit qanoq qisuariarpat?

- Anaanaga tulluusimaaqaaq. Tapersersortiginerpaavara, Sandra qungujuvoq.