Nunatsinni ukiut nutaat aallartinneranni ukioq siulleq

Takornariat amerleriarujussuassapput.Ukiumut rekortiliiffiusussamut nutaamut ingerlaarpugut – ilaatigut Nuummi mittarfittaap kinguneranik Nunatsinnut timmisartuussisarnerni issiaviit amerlanerujussuanngornerat pissutigalugu.

- 2024-mi aasakkut timmisartut 55.000-inik ilaasoqarlutik mipput – kisitsisit 2025-mi 102.000-inngoreerput, Greenland Airports Facebookimi aamma LinkedInimi taama allappoq.

Christian Keldsenip, Sulisitsisut Peqatigiiffianni pisortap, tamanna tassaanerarpaa, ”Nunatsinni ukiut nutaat aallartinneranni ukioq siulleq“.

Naalakkersuisut takornariaqarnermut pilersaarutaani nutaami, ukiunut qulinut siumut isigaluni suliarineqartumi aamma isumalluartoqarpoq. Takornariaqarneq inuussutissarsiornermi sukatut patajaatsutut ineriartortinneqassaaq aamma siunissamut siulittuutinut isigaluni siunissamut takorluugaq ima nipeqarpoq:

- Nunap avammut niuerutaasa nalingisa 40 procentiat takornariaqarnermeersuussaaq. Takornariat marloriaatinngorsimassapput, takornarianillu ataasiakkaanit isertinneqartartut amerleriarsimassallutik. 2.000-init amerlanerusut takornariartitsinermik suliaqassapput, aamma naammassisinnaasanik iluaquteqarneq ukioq kaajallallugu 75 procentinik qaffariassalluni.

Innuttaasut siulliullugit

Anguniakkanik pitsaasunik aalajangiussineq soorunami pitsaasuusarpoq, anguniakkalli piviusunngortinnissaat allaalluinnartarluni. Anguniakkalli ilaat maannamut anguneqareersimasut, takornariartitsinermut pilersaarummi oqaatigineqarpoq:

- Tamanna illoqarfinni inoqarfinnilu aalajangersimasuni ersarissimavoq. Taakkunanimi umiatsianik attartortarnerit kaffisorniartarfiillu amerlanerulernerannik, pisiniarfiit isaatitaqarnerulernerannik, takornariartullu ataatsimoortut aqqusinerni pisuinnarnullu aqqusinerni aamma pinngortitami angalaartut amerlanerulernerannik kinguneqarsimavoq. Sumiiffinni aalajangersimasuni allani ukiup qanoq ilinera apeqqutaatillugu takornariaqarnera immaqa bilitsisiniartarnermik ajornarnerulersitsisimavoq, imaluunniit pisiniarfiit nunguutsiaarnerusalernerannik, Naalakkersuisut allapput.

Tamanna akunnittarfinnut unnuisarfinnullu allanut tatisinerulernermik kinguneqassaaq, immaqalu aningaasaliisoqartariaqassalluni.

Unnuisarfinnut nalinginnaasunut taarsiullugu ilaqutariit unnuiffissanik attartortitsisinnaanerat pilersaarutini eqqaaneqarpoq. Tamatumanili pisariaqartinneqarlutik mianersortumik aaqqiinissaq nutaanillu malitassaliornissaq.

- Takornariat amerlasuutigut inuinnaat angerlarsimaffiini unnuinissartik toqqartarpaat, sulinngiffeqarnertik allaanerusumik misigisaqarfigiumallugu. Inuinnaat takornarianut attartortitsisarnerat innuttaasunut isertitaqarluaataasinnaavoq. Tamatumanili pisariaqarluni inissianik piffissami sivikitsumi attartortitsisarnerit – minnerunngitsumik attartortitsisartut quppersagaasigut – aqunneqarnissaat, innuttaasut taamaalillutik inissaqarniarnermikkut tatineqannginniassammata, iliuusissatut pilersaarummi allassimavoq.

Naalakkersuisunit oqaatigineqartutut, innuttaasut najugaqavissut salliutinneqartussaapput. Innuttaasut inissaqarnissaat qulakkeerneqaqqaartassaaq.

Inissianik piffissami sivikitsumi attartortitsisarneq pillugu inatsisiliorneq suliarineqassaaq, inissaqartitsinerup aqunneqarneranut peqataatinneqartussamik, sulinngiffeqartunut inissiat amerlaneruleqqunagit, taama erseqqissaasoqarpoq.

Misissuinerit paasinarsisippaat, takornariat 75 procentiisa unnuisarfinni pioreersuni ullutsinni unnuinissartik toqqartaraat, sinnerisali inuinnaat angerlarsimaffiini asimiluunniit unnuinissartik toqqartarlugu. Takornariat ilarpassui qallunaajusarput, taakkulu ilaat ikinngutiminni ilaquttaminniluunniit tikeraartuusarlutik.