Nuummi angerlarsimaffeqanngitsoq: – Innuttaasut nikanarnersaattut pineqartarpugut
Angut 57-inik ukiulik siornatigut allaffimmiutut sulisimasoq maanna ukioq ataaseq qaammatillu qulingiluat sinnerlugit Nuummi angerlarsimaffeqanngitsutut najugaqarsimavoq. Tupermiippoq. Timikkulli unammillernartut kisiisa nanertisimassutiginngilai - aamma kommunimiit sullinneqarnini nanertisimassutigaa.
Nuummi angerlarsimaffeqanngitsut arlallit tuperni sinittarput. Aana 2025-mi januaarimi aputit akornanni.
Assi: Nammineq pigisaq
Anders Maqe 57-inik ukioqarpoq. Angerlarsimaffeqanngilaq tupermilu najugaqarluni.
- Tupermi sinittarpunga. Ukiut marlungajaat tuperni sinittarpunga. Maannamut toqqit assigiinngitsut sisamat atoreerpakka.
Tupermi sinilluni qiianartarpoq, ingammik ulluni nillertuni.
Taamaammat Anders Maqe kialaarfissaqarnissaminut aaqqiissummik ujaasisimavoq. Containerinut eqqaaviusunut karsinik aallersimavoq.
- Tuperma qanoq kialaartinnissaa ilikkarpara. Karsit tuperma ataanut qaavanullu atortarpakka. Nillerunnaarpoq. Kialaarfimmiinnanga tupermiillunga iluarineruara.
- Kialaarfimmi malittarisassat uannut sukannerpallaarmata tupermiiginnartarpunga.
Anders Maqe 57-inik ukiulik siornatigut allaffimmiutut sulisimavoq. Maanna ukiuni marlunni Nuummi angerlarsimaffeqanngitsutut inuusimavoq.
Ajunngilaq, kommunimulli ima kissaateqarpoq:
- Kommunemi sulisut naligisutut pissagaatigut kissaatigaara. Angerlarsimaffeqannginnerput pissutigiinnarlugu pingaaruteqannginnerusariaqanngilagut. Inuiaqatigiinni nikanarnerpaatut pineqartartutut misigivunga, oqaluttuarpoq.
Sermersuumit akissuteqartoqarnissaa utaqqigaa
Anders Maqe kommunimi allaffissornerup qitiusumik aaqqissuunneqarneranut atatillugu Nuummut nuuppoq. Nammineq pissutiginiakkani arlallit, oqaloqatigiissutiginianngisani, pissutigalugit ukiualuit matuma siorna atorfimminit soraarpoq.
Tamatuma kingunerisaanik Nuummi aqqusinerni inuulerpoq.
Angut angerlarsimaffeqanngitsoq arlaleriarluni kommunimut ikiortissarsiortarluni, sulisunilli ataqqineqarnani paasineqarnanilu misigisimalluni nassuiaavoq. Tusaaniarneqaranilu pimoorunneqarnani misigisimavoq.
Angerlarsimaffeqanngitsut misigisaat pillugit Kommuneqarfik Sermersooq saaffigalugu kommunip angerlarsimaffeqanngitsunik sullissinini qanoq nalilersorneraa paasiniarparput, aamma angerlarsimaffeqanngitsut ikiorneqarumallutik naligiissumik pineqartutut misiginissaat qulakkeerniarlugu qanoq iliuuseqartoqarnersoq apeqqutigaarput.
Kommuneqarfik Sermersoorli februaarip aallartinneraniilli saaffiginninnerput pillugu akissuteqarsimanngilaq.
