“Orsugiak – Grønlands Hvide Guld” pillugu oqallinneq qinersisartorpassuarnut sunniuteqarsimavoq. Tamanna misissuisarfiup Verianip Sermitsiamut isumasiuinerata nutaap takutippaa.
Isumasiuineq internetikkut februaarip 27-aniit marsip sisamaata tungaanut SMS-ikkut ingerlanneqartoq tunngavigalugu apersorneqartut 36 procentii marsip 11-ani qinersinermi sorlermut taasiniarnerminnut oqallinneq sunniuteqarsimassasoq isumaqarput.
“Orsugiak – Grønlands Hvide Guld” pillugu oqallinneq qinersisartorpassuarnut sunniuteqarsimavoq. Tamanna misissuisarfiup Verianip Sermitsiamut isumasiuinerata nutaap takutippaa.
Isumasiuineq internetikkut februaarip 27-aniit marsip sisamaata tungaanut SMS-ikkut ingerlanneqartoq tunngavigalugu apersorneqartut 36 procentii marsip 11-ani qinersinermi sorlermut taasiniarnerminnut oqallinneq sunniuteqarsimassasoq isumaqarput.
Inerneri ilimagineqareersut
Signe Ravn-Højgaard, Tænketanken Digital Infrastrukturimi pilersitseqataallunilu pisortaasoq sunniiniutit pillugit ilisimasaqarluartoq, naapertorlugu amerlasuut filmi pillugu oqallinnerup sunniuteqarsimaneranik akimmata tupaallannanngilaq:
– Piviusulersaarut ”Grønlands Hvide Guld” qineqqusaarnermi oqallisigineqangaatsiarpoq, misigissutsinik sakkortuunik Danmarkimullu attaveqarnermik pakatsinermik ilisarnaateqarsimalluni. Tamatuma kingorna piviusulersaarutip DR-imi isiginnaarneqarsinnaajunnaarsinneqarnera quiasaarutillu ”Tæt på sandheden”-ip saqqummersinneqarnera pakatsinermik pilersitsivoq. Taamaammat filmi pillugu oqallinnerup apersorneqartut ilarpassuisa qanoq taasinissaannut sunniuteqartarnera tupinnanngilaq.
Misigissutsit sakkortuut
Signe Ravn-Højgaard naapertorlugu DR-ip qinersineq sunnerniarsimaneraa oqaatigiuminaappoq.
– DR-illi piviusulersaarutip saqqummersinneqarnerata sunniuteqassasoq ilimagiuminaatsissimanngilaa. Qinersinerit siuliini Danmarkimut atassuteqarneq namminiilivinnermullu tunngasut sammineqarluartarsimapput, taamaammat piviusulersaarut misigissutsinik sakkortuunik pakatsinermillu pilersitsisumik imalik qineqqusaarnermi sammineqarmat, taamaalillunilu inuit qanoq taasinissaannut sunniuteqassammat DR-imut tupaallannarsinnaanngilaq. Piviusulersaarusiap takutinneqaqqaarnissaa qangali pilersaarutigineqarsimasoq DR-ip ilisimatitsissutigereeraluaraa, takutinneqaqqaarnissaanut pilersaarutigineqartup nalaani qineqqusaartoqassasoq DR-imut aamma tupaallannarsinnaanngilaq, Signe Ravn-Højgaard oqarpoq.
Isumasiuineq misissuisarfimmit Veriaanimit Sermitsiamut 2025-mi februaarip 27-aniit marsip sisamaata tungaanut ingerlanneqarpoq, internetikkut nalilersuilluni Kalaallit Nunaanni innuttaasunut SMS-ikkut apersuinermi peqataanissamut nalunaarsimasunut apersuineq tunngavigineqarpoq. Innuttaasuni 18-ileereersuni 726-it apersorneqarsimapput. Nalorninartorsiorneq 1,8 aamma 3 procentip akornanniippoq.
