Peqqissaasup isumaqatigiissut nutaaq isornartorsiorpaa:
– Kamaatigaara

Malugiuk: PPK-miit -  Peqqinnissaq Pillugu Kattuffik - akissutit ilanngullugit allaaserisaq nutarterneqarpoq

Elna K. Bro peqqissaasutut ilinniarsimasuuvoq, ullumikkullu meeqqanut peqqissaasutut sulilluni. Nunatsinni peqqinnissaqarfimmi ukiorpassuarni sulisuvoq - peqqinnissaqarfimmi ilaqutariinnilu.
Peqqinnissaqarfik qanoq tatineqartiginersoq Sermitsiamut oqaluttuaraa:

- Sulisut ulluinnaat ingerlalluarniarluta ilungersortariaqartarnerput nalunngilara.

Nunatsinni peqqinnissarfimmi sulisut qaammatit 15-it sinnerlugit isumaqatigiissutip qaangiussimasup ataani sulipput.

Sapaatip akunneratalu uani aallartinnerani isumaqatigiissut kiisami atsiorneqarpoq, peqatigiiffinnullu, PPK-mut atasunut arfineq-marlunnut nassiunneqarluni.

Isumaqatigiissut pakatsinartoq

Isumaqatigiissutip sulinermi atukkat pitsanngortissagai Elna K. Bro neriuuteqarsimagaluarpoq:

- Kisianni isumaqatigiissut pakatsinartoq maanna takuarput - arlalitsigut uagutsinnut tatisisoq, Elna K. Bro Sermitsiamut oqarpoq.

Isumaqatigiissut nutaaq naapertorlugu peqqissaasut tunngaviusumik akissarsiaat qaffanneqassapput, ilassutitut akissarsiaat aamma qaffanneqarnissapput, utoqqalinersiuteqalernissaq ukiumullu akissarsiaasa 9 procentiannik ilassutitut akissarsiaqarnissartik qilanaarisinnaavaat.

Aamma taartit piffissami nikerartuni akissarsiarissaarnerussapput.

- Aap, akissarsiavut qaffanneqalaarput. Aningaassalli naleerukkiartornerannut malinnaanngillat, maluginngitsoortarpagut. Peqqinnissaqarfiup pisariaqartitaanut naleqqiullugit qaffanneqanngilaq – sulisutullu pisariaqartitaraluatsinnik, Sermitsiamut oqarpoq.

- Oqalutsiunngilagut akeqanngitsut

Akissarsialli kisimik isornartorsiorneqanngillat. Isumaqatigiissummi taakkartorneqartut arlallit isornartuupput akuerineqarsinnaanngitsut, Elna K. Bro isumaqarpoq: 

- Oqaluttaanissamut piumasaqaat nutaaq assut kamannarivara. Isumaqatigiissummi ersarissumik maanna allaqqavoq kalaallit peqqissaasut peqqinnissaqarfimmilu ikiortit oqaluttaasassasut – akissarsiaqaratik.

- Siornatigut taama allassimasoqarsimanngilaq. Innuttaasunut attaveqarluarnissaq toqqissisimatitsinissarlu qulakkeerusullugu amerlasuujulluta oqalutsitut sulisarsimavugut. Maannali pisussaaffiulerpoq. Akeqanngitsumik. Akeqanngitsumik oqalutsiunata peqqinnissaqarfimmi sulisuuvugut.

Isumaqatigiissummi ima nassuiaatitaqarpoq:

- Peqataasut isumaqatigiipput peqqinnissaqarfimmi sulisut tamarmik ulluinnarni sulinerminni oqaatsit assigiinngitsut atorlugit oqaluttunik suleqatiminnik ikiuisaannassasut, ingammik katsorsaanermut tunngasunik paasissutissiiniarnermi oqaatsit atorlugit ikiuisoqartariaqaraangat...“

Peqqinnissaqarfimmi ikiortit ullut tamaasa nutserillutillu ingerlalluarnissartik ilungersuutigisaraat Elna K. Bro oqarpoq. Tamannalu atorluarneqapiluppoq.

- Sulisut kalaallisut oqaasillit eqqugaanerpaasarput. Tamanna aaqqissuussaasumik assigiinngisitsisuuvoq. Tamanna assigiinngisitsinerullunilu isumaqatigiissummut naapertuutinngilaq, Elna K. Bro Sermitsiamut oqarpoq.

Kattuffik: Oqaluttaanissaq piumasaqaataanngilaq

Isumaqatigiissut nutaaq sakkortuumik qisuariarfigineqarmat immikkoortoq akerleriissutaasoq pillugu peqqissaasut kattuffianni PK-mi (Peqqinnissaq Pillugu Kattuffiit) siulersuisut nassuiaateqarput.

Suleqatigiit ilisimasaat kulturiallu akimorlugit suleqatigiinneq taperserneriarlugu immikkoortumi siunertaasoq PPK allappoq. Peqqissaasut oqalutsitut atorneqartarnissaannik piumasaqaataanngitsoq:

- Napparsimasut ataqatigiissumik toqqissisimasumillu katsorsarneqarnissaat pineqarpoq – kalaallisut, qallunaatut, tyskisut tuluttulluunniit oqalunneq apeqqutaatinneqarani.

- Peqqissaasut oqalutsitut atorneqartarnissaannik piumasaqaataanngilaq. Nutserineq pingaarnertut suliassarinngilaat, aamma nutserisuunissamut atorfinitsinneqarnatillu ilinniagaqanngillat. Taamaattumik peqqinnissaqarfimmi nutserisut ilinniarsimasut suliassamik tamatuminnga suliaqartuusussaasut PPK isumaqarpoq – napparsimasut isumannaatsumik sullinneqarnissaat sulisullu artukkerneqarnaveersaarnissaat eqqarsaatigalugit, PPK allappoq:

- Suliassaqarfipput oqaatsinik arlalinnik atuiffiummat oqaatsitigut ikiorneqarnissamik pisariaqartitsisoqartarnera pineqarpoq, pisullu ilaanni oqaatsitigut suleqatiniit ikiorneqarnissamik pisariaqarlersinnaasarluni.

Peqqinnissaqarfimmi sulisut kalaallisut oqaasillit arlallit misigisaat pakatsinerallu paasisinnaalluarneqartoq PPK-p siulersuisui nangillutik allapput:

- Oqalutsinik amerlanerusunik atorfinitsitsisoqartariaqartoq isumaqarpugut, siulersuisut allapput.

- Naamik

Isumaqatigiissut nutaaq ilaasortanit akuerineqassaaq imaluunniit naamik. Elna K. Bro-millu akuerineqanngilaq:

- Aalajangeruminaatsissimanngilara. Naaggaarpunga. Akissarsiat pissutigiinnarnagit, kisiannili kattuffimmut tatiginnikkunnaarneq pissutigalugu. Piumasaqaatinik pilersitsisoqarsinnaanngilaq isumaqatiginninniaqqaartinnani. Taarsiissuteqartoqartinnagu nutaamik piumasaqaateqalertoqarsinnaanngilaq, tamannalu siuariarnertut taaneqarsinnaanngilaq. Kalaallit Nunaanni peqqinnissaqarfik uagoqartinnagu ingerlasinnaanngilaq.

- Perusunneqarutta, taava akuersaarneqartariaqarpugut - atornerlunnata. Tamanna akueriinnarsinnaanngilara. Kalaallit sulisuussugut piffissami sivisuallaarujussuartumi akisussaaffiit annertuut tigummisimavagut, pisariaqartitatsinnillu akuerineqarata.

- Nutserisimavugut, kivitsisimavugut, iliuuseqartarsimavugut suna tamarmi ataqatigiitsikkumallugu - tamatigut nipaatsumik. Tamannali maanna unissaaq. Takunngitsuusaarneqarnerput naammagiinnarsinnaajunnaarparput, artorsinneqartarnerput assigiinngitsumillu pineqarnerput. Piffissanngorpoq killiliinissarput.