Lars-Emil Johansen Lars Møller-Sørensenilu januaarimi eqqartuussaanerminni pineqaatissinneqarput. Suliarli suli naammassivinngilaq.
Suliamut Eqqartuussisoqarfik Sermersuumii malinnaasut januaarip 15-ianni eqqartuussut tupaallaatigerpasippaat. Tupaallaatissaammammi.
Lars-Emil Johansen Lars Møller-Sørensenilu januaarimi eqqartuussaanerminni pineqaatissinneqarput. Suliarli suli naammassivinngilaq.
Suliamut Eqqartuussisoqarfik Sermersuumii malinnaasut januaarip 15-ianni eqqartuussut tupaallaatigerpasippaat. Tupaallaatissaammammi.
Unnerluussisussaatitaasup politikeriusimasoq nuimasoq Lars-Emil Johansen atorfilittaasimasorlu Lars Møller-Sørensen pinerluuteqaqqippata pineqaatissinneqartussanngornissaat piumasarigaluarpaa. Eqqartuussisulli Stine Dana Lyngep eqqartuusseqataasullu ukiup affaani pineqaatissinneqarsimasunut inissiisarfimmiittussanngortippaat.
Eqqartuussisoqarfimmi angutit taakku marluk peqquserluttutut, Lars Møller-Sørensen oqartussaanermik atornerluisutut aamma Lars-Emil Johansen oqartussaanermik atornerluinermut pisooqataasutut, eqqartuunneqarput.
Allaat eqqartuussinerup kingorna Stine Dana Lyngep eqqartuussutaa ilumoornersoq najuuttut ilaasa qularivaat. Eqqartuussut ilumoornersoq qulakkeerniarlugu eqqartuussisoq aggersaqqinneqarluni. Taamaattoqartarnera qaqutigoorpoq pineqartulli tigunerlunngilaa.
Taama pinerluttoqarsimatillugu pinerluuteqaqqittoqassagaluarpat pineqaatissinneqarsimasunut inissiisarfimmiittussanngortitsisoqartarnera ileqquusoq eqqartuussutip allannerani eqqaavaa.
Pinngitsuunerartoq
2019-imi atorfinitsitsineq pineqarpoq Lars Møller-Sørensen Kommuneqarfik Sermersuumi pisortaanermi nalaani Lars-Emil Johansen siunnersortitut atorfinitsippaa. Tamanna Naalakkersuisunut siulittaasuusimasumut 2021-p tungaanut katillugit 730.000 koruuninik aningaasarsissutaavoq.
Atorfik taanna piviusuunngitsoq unnerluussisussaatitaasoq isumaqarpoq. Lars-Emil Johansen suliaqarani aningaasarsisarsimasoq taanna isumaqarpoq. Aamma sulerisarnissaanik isumaqatigiissummi allassimasoqanngitsoq unnerluussisussaatitaasup maluginiarpaa.
Unnerluutigineqartut marluk pinngitsuunerarput. Lars-Emil Johansen atorfinitsinneqarnini malillugu kommunip soqutigisaanik isumaginnissimasoq taakku eqqartuussivimmi oqaluttuarput. Tasiilami Kofoeds Skolep pilersinneqarnera suleqataaffigisimallugu.
Eqqartuussivimmi upperineqanngillat. Peqquserlunnissamik siunertaqarluni atorfinitsitsisoqarsimasoq eqqartuussivimmi aalajangerneqarpoq.
– Lars-Emilip Kommuneqarfik Sermersuumi siunnersortitut atorfinitsinneqarnera ilisimaneqanngilaq, aamma sulerinersoq ilisimaneqarani.
Pineqartut eqqartuussisoqarfimmi eqqartuunneqareernerminni suliareqqitassanngortitsereerlutik tusagassiortunut oqaaseqarumanngillat.
Ilisimannittut nuimasut
Unnerluutigineqartut eqqartuussinermi kingullermi illersuisorisatik taarserpaat. Anders K. Németh Lars-Emil Johansenip illersuisoraa, eqqartuussissaaq, Julie Stagellu Lars Møller-Sørensen illersussallugu.
Julie Stage Kalaallit Nunaanni siorna suliami annertuumit ilisimaneqarpoq. Arfernik illersuiniaq Paul Watson Nuummi siorna tigummigallagaasoq illersorpaa.
Politikkikkut nuimasut atorfilittallu ilisimaneqarluartut eqqartuussinermi ilisimannittutut apersorneqarput. Ilaatigut borgmesteriusimasut Asii Chemnitz Narup aamma Charlotte Ludvigsen, naalakkersuisuusimasoq Vittus Qujaukitsoq aamma aningaasaqarnermut naalakkersuisoqarfimmi pisortaq Nikolai S. Christensen apersorneqarlutik.
Suliaq Nunatta Eqqartuussisoqarfiani suliarineqalerpat ilisimannittut nutaat immaqa ilanngunneqassapput. Tamanna suli naluarput.
Illersuisut nutaat suliaq allatut ingerlatissaneraat aamma naluarput. Unnerluussisussaatitaasullu eqqartuunneqartut pinerluuteqaqqissagaluarpata pineqaatissinneqarsimasunut inissiisarfimmiittussanngortinneqarnissaat piumasareqqissaneraa.
Apeqqutillu taakkua allallumi akissutissarsissavavut. Sermitsiaq Nunatta Eqqartuussisuuneqarfiani malinnaaqqippoq.
