Politikkimi suliaqarnermi qaffasissumik inissisimasimasoq kannguttaatsuliorsimasutut unnerluutigineqartoq
Angut kannguttaatsuliorsimasutut unnerluutigineqarluni februaarip ulluisa 27-anni Qeqqata Eqqartuussiveqarfiani eqqartuussivilersuunneqassaaq. Unnerluussut Sermitsiap pissarsiaraa, tassanilu allassimavoq marsip 14-ani 2024-imi nalunaaqutaq ullaakkut qulingiluat missaani unnerluutigineqartup arnaq kannguttaatsuliorfigisimagaa. Unnerluutigineqartoq pinngitsuunerarpoq.
Assi: Dorthea Reimer-Johansen
Unnerluutigineqartoq unnerluussummik saqqummiiffigineqaruni, eqqartuussisumiit aperineqassaaq:
- Taamaalioravit?
Unnerlussummi, Sermitsiamit pissarsiarineqarsimasumi, allassimavoq unnerluutigineqartup arnaq kannguttaatsuliorfigisimagaa, tassami martsip 14-ani 2024-imi unnerluutigineqartup arnaq uluaatigut qaniatigullu kunissimagamiuk arnaq pisumi akerlioriarsinnaannginnerani, kiisalu atisaqartillugu timaatigut attualaarsimallugu.
Unnerluutigineqartoq siusinnerusukkut politikkimik suliaqarsimavoq.
Unnerluutigineqartoq pinngitsuunerartoq, suliami illersuisoq, eqqartuussissuserisoq Marie Louise Frederiksen ilisimatitsivoq.
Politikkikkut suliaqarsimasoq
Unnerluutigineqartoq unnerluussisussaasuniit, illersuisumiit eqqartuussisumiillu nassuiaasinneqassaaq, tassani pisimasoq qaqileriffigineqassalluni. Unnerluutigineqartoq nassuernersoq pinngitsuunerarnersorluunniit suli paasinarsinngilaq.
Unnerluussisussaatitaasup piumasaraa unnerluutigineqartoq ulluni 14-ini pineqaatissinneqarsimasunut inissiisarfimmiitinneqassasoq, ukiulli marluk misiliutaaqqaassasut, kiisalu arnamut kannguttaatsuliorfigisimasaminut 5.000 koruuninik taarsiinissamik piumasaqartoqarluni.
Pineqaatissiissut atorunnaarsinneqassaaq eqqartuussiviup aalajangerneranit ukiut marluk qaangiunneranni, unnerluutigineqartoq assingusumik pinerluuteqaqqissimanngippat.
Suliami unnerluutigineqartup aqqa illersorneqarpoq, taamaammat kina unnerluutigineqarnersoq paasineqarsinnaajunnaartillugu ilisimaneqaatigisinnaasai allaaserisami ilanngunneqarsinnaanngillat.
Suliami sisamanngorneq februaarip ulluisa 27-anni aalajangiisoqarnissaa naatsorsuutigineqarpoq.
