Qeqqata Kommunia 2024-mi 45 millionit koruuninik sinneqartooruteqarpoq
Suliffeqarfiit akileraarutaasigut naatsorsuutigisamiit annertunerusumik isertitaqarsimaneq isertitaqarnerunermut ilaatigut pissutaavoq.
Assi: Oscar Scott Carl
Qeqqata Kommunia 45 millionit koruuninik sinneqartooruteqarpoq. Nuannaarpallaalaarnissamulli peqqutissaqanngilaq, kommunimi suli aaqqitassaqaalummat.
Isertitat 2023-mut sanilliullugit 63 millionit koruuninik qaffariarsimapput, tamatumani ilaatigut annertuumik sanaartortoqarluarnera pissutigalugu innuttaasut akileraarutaat 37 millionit koruuninik qaffariarsimallutik.
Ingerlatsinermut aningaasartuutit 2023-mut sanilliullugit 23 millionit koruuninik qaffariarsimapput. Ukiullu kingulliit arfinillit ingerlaneranni ingerlatsinermi aningaasartuutit 159 millionit koruuninik qaffariarsimapput, taakkunannga millionit koruunit inunnik isumaginnittoqarfimmut tunngassuteqarlutik.
Sanaartorneq eqqarsaatigalugu 93 millionit koruunit atorneqarsimapput, ukiup siulianut sanilliullugu 13 millionit koruuninik qaffasinnerullutik.
Borgmesterip Malik Berthelsenip sinneqartooruteqarneq nuannaarutigaa:
- Sinneqartooruteqarnerput soorunami iluarisimaarpara. Tamatumunngalu sulisinnaasut amerlanerpaat sulinerannik pissuteqarpoq, taamaattumik innuttaasut suliffeqarfiillu sulilluarsimanerannut qutsavigaakka.
Kisianni...
Suli aningaasaqarnikkut sukannersumik ingerlatsinissaq pisariaqarpoq:
- Pissutigalugu sanaartornerit annertuut Sisimiuni naammassititilerput, Kangerlussuarmi sulisorpassuit annaanikuuvagut aammalu aalisarnermiit isertitat nalorninartumiillutik. Taamaattumik akileraarutitigut isertitat qaffakkiartuinnarnissaat naatsorsuutigisinnaanngilarput.
- Illuatungaanilu inunnik isumaginninnerup iluani aningaasartuutit qaffakkiartornerat aammalu kommunip illut/suliffeqarfiit pigisai ukiuni tulliuttuni aserfallatsaalineqarnissaminnik pisariaqartitsisut annertuunik aningaasartuuteqarfiunissaat sillimaffigisariaqarpagut, borgmesteri Malik Berthelsen naggasiilluni oqarpoq.
