Qeqqata Kommunianit oqariartuut: Qeqqata Kommuniani ilanngaaserisunik qimmilimmik pisariaqartitsivugut
Qeqqata Kommuniani kommunalbestyrelsi tamarmiusoq Naalakkersuisumut ammasumik piumasaqarlutik allagaqarput: Qeqqata Kommuniani aalajangersimasumik najugaqartussanik ilanngaaserisunik qimmilinnik atorfinitsissoqartariaqarpoq.
Kommunimi qimmilinnik ilanngaaserisoqarnissaa Qeqqata Kommuniani kommunalbestyrelsip kissaatigaa. Taamaaliornikkut ikiaroornartumik ajornartorsiutit annikillisinneqassammata.
Foto: Oscar Scott Carl
Sisimiunut Maniitsumullu ikiaroornartumik anngiortumik eqqussinissaq ajornanngitsuaraassanngilaq.
Taamaattumik Qeqqata Kommuniani qimmilimmik ilanngaaserisoqartariaqarpoq, taama Qeqqata Kommuniani kommunalbestyrelsimi ilaasortat tamarmik isumaqarput.
Naalakkersuisunut ammasumik allakkami partiit politiit ukiormoortumik nalunaarutaanni 2024-meersumut innersuussipput. Kisitsisit takutippaat 2024-mi Sisimiuni hash taamallaat 5,9 kiilu, Maniitsumilu 324 grammi arsaarinnissutigineqarsimasut.
Ukiullu kingullerni sisamani ukiumut agguaqatigiissillugu Sisimiuni 4,4 kiilu Maniitsumilu 950 grammi taamallaat arsaarinnissutigineqarsimapput.
Annikippallaarput, kommunalbestyrelsi isumaqarpoq.
Kommunalbestyrelsi allappoq tamanit naluneqanngitsumik ikiaroornartoq nunatsinni annertuumik ajornartorsiutaasoq:
- Takorloorsinnaavarpullu hash-ip eqqunneqartup ilamineeraannanngua taamaallat arsaarinnissutigineqartarsimassasoq. Taassumallu takutippaa ikiaroornartumik nunatsinnut eqqussuinerup akiorniarnissaanut ullumikkornit annertunerujussuarmik sulisoqartariaqartoq.
Umiarsualivinni ilanngaaserisut
Nunatta avataaniit timmisartumik isaaviusuni nakkutilliisoqarpoq. Tamannali naammanngilaq. Arsaarinnissutigineqartartut annertussusaata takutippaat aamma illoqarfinni ullumikkut ilanngaaserisoqarfiunngitsuni umiarsualiviit aamma ilanngullugit nakkutigineqartariaqaraluartut, kommunalbestyrelsi allappoq.
- Taamaattumik ilungersortumik noqqaassutigivarput Qeqqata kommuniani aalajangersimasumik najugaqartussanik ilanngaaserisunik qimmilinnik atorfinitsissoqarnissaa Naalakkersuisuniit sulissutigineqassasoq.
Hashi inuiaqatigiinni ajornartorsiutaasoq
Hashimik arsaarinnittoqartarpoq, taamaakkaluartoq inuiaqatigiinni hashi suli ajornartorsiutaaaaq. Ilanngaaserisunilli nakkutilliisoqarnerulinngippat ajornartorsiut annertunerulissasoq, Qeqqata Kommuniani kommunalbestyrelsi allappoq.
- Ikiaroornartoq nunatsinnut eqqussuunneqartoq annikillisarneqanngippat, naatsorsuutigissavarput meeqqat pisariaqartitaminnik tamakkiisumik isumassorneqanngitsut, innuttaasut ilinniarfimminnut suliffimminnullu paarsinissaminnik ajornartorsiuteqartut, innuttaasut tarnimikkut napparsimasut, soorlu hashpsykosertut suli amerliartuinnarnissaat.
- Ajornartorsiutillu siuliani oqaatigineqartut annertusiartornissaanut nunarput akissaqanngilaq, ingammik ukiuni aggersuni sulisinnaasusilittut ukiullit ikiliartortillugit aammalu meeqqat angerlarsimaffiup avataanut inissinneqartartunut aningaasartuutit qaffakkaluttuinnartillugit.
Taamaattumik nunatsinni ajornartorsiutit ilungersunartut annikillisarneqassappata kommunitsinni qimmilinnik ilanngaaserisoqalernissaanik kommunalbestyrelsi noqqaassuteqarpoq, neriuutigalugulu paasilluarlugu piaartumik piviusunngortinnissaa sulissutigineqassasoq:
- Tusarfiginissarsi qilanaaralugu, kommunalbestyrelsi naggasiivoq.
