Qimusseq Sisimiut USA-mut qaaqqusissut pillugu paasitinneqarsimannginnertik isornartorsiorpaat
Qimusseq Sisimiut Avannaata Qimussersua Sisimiuni aaqqissuuppaat. Paasissutissalli nutaarsiassakkut aatsaat paasisarpaat. KNQK-p siulersuisuisa USA-mik Avannaata Qimussersuanut qaaqqusisimanerannik ilisimatinneqarsimannginnertik naammaginngilaat.
Asseq nammineq pigisaq
KNQK ippassarli ataasinngornermi marsip 24-aniilli matoqqasumik ataatsimeersuarput.
KNQK-p siulittaasuata amerikamut qaaqqusisimanera pillugu KNR nutaarsiassatigut saqqummiussereersorlu KNQK-mi siulersuisuunerit immikkut matoqqasumik ataatsimiipput, illersuisoq Doris Jakobsen Jensen peqatigalugu. Allat ataatsimeersuarnermi peqataasut ataatsimeersuarnerup aallarteqqinnissaanut utaqqisariaqarlutik.
Ataatsimiinneq minutsini 45-inik sivisussuseqarpoq.
Qimusseq Sisimiut aamma utaqqivoq.
- Uagut aaqqissuisutut ilisimatinneqarnissarput kissaatigigaluarparput. Paasissutissammi aatsaat nutaarsiassatigut paasisarpagut, Paninguak´Kruse Rafaelsen Sermitsiamut oqarpoq.
Siulittaasoq, Mikkel Jeremiassen oqaaseqartinniarlugu Sermitsiaq sulissuteqaraluarpoq, taannali oqaaseqarusunngilaq.
KNR-imi allaaserineqarpoq Kalaallit Nunaanni Qimussertartut Kattuffiat amerikamiunut arfininngorpat qimussimik sukkaniunnermik malinnaasussanut qaaqqusisuusoq. Naak Mikkel Jeremiassenip ullualuit matuma siorna Facebookikkut allaaserigaluaraa qaaqqusisimannginnerarlutik.
- Isumaqatigiissut suli takunngilarput
Qimusseq Sisimiuni siulersuisuni ilaasortaq Paninguak´Kruse Rafaelsen Sermitsiamut oqarpoq isumaqatigiissut ataatsimeersuarneq aallartimmalli takunissaanut piumasaqarsimagaluarlutik, sulili ulloq manna tikillugu isumaqatigiissut agguaanneqarsimanngilaq.
- Siulersuisuunerit isumaqatigiissut suli ilaasortanut takutinngilaat. Neriorsuippulli. Neriorsuutertilli attassinnaanngippassut, taava siulittaasoq tatiginarsinnaasimassanngilaq, Paninguak´Kruse Rafaelsen oqarpoq.
Qimusseq Sisimiuni siulersuisut neriuutigaat isumaqatigiissut peqatigiiffimminnut sunniuteqarnerlussanngitsoq.
KNQK-p siulittaasuanut apeqqutit
Sermitsiap uku apeqqutit Mikkel Jeremiassenimut apeqqutigerusukkaluarpai:
- Sooq siullermik USA-mut qaaqqusisimannginnerarnersoq.
- USA-mit aningaasat tapiissutigineqartut amerlatigippat? Ukiunut arlalinnut isumaqatigiissutaappat?
- KNQK-mit suut piumasarineqarpat, USA-mut isumaqatigiissuteqarnermi?
- Ataatsimeersuarnerup matoqqasuunissaanik kiap siunnersorsimaneraat, kiisalu suna peqqutaanersoq.
- Sooq ataatsimeersuarnermi peqataasut isumaqatigiissut suli takusimannginneraat aamma sooq peqataatinneqannginnersut?
- Siulittaasussatut sassaqqinniarnersoq.
Mikkel Jeremiassen suli ulloq manna tikillugu oqaaseqarumanngilaq.
