Nunatsinni kommunit pisuujunersaani innuttaasut Katuap inersuaaraani
Kommuneqarfik Sermersuumi kommunimut qinersinissami
qineqqusaartitsinermut qaaqquneqarput. Sulisartut SIK-milu ilaasortat
sullinniarlugit kommunalbestyrelsemut qinigaassagunik sunik
takorluugaqarnersut SIK-p immikkoortortaata NSIP tusarusuppaa.
NSIP-mit
paaserusunneqarpoq qineqqusaartut qanoq ilorniarnersut sulisartut
aningaasaateqarnerulernissaannut inuuniarnermi akiligassat
inuussutissallu akitsoriartuinnarnerisa nalaani, kommuni
akileraarutitigut isertitaqarnerunermigut sinneqartoortartoq.
- Inuuniarnermi aningaasartuutivut nioqqutissallu akii qaffakkiartuinnarput. 2023-mut kommunip ukiumoortumik naatsorsuutaani akileraarutitigut isertitat missingersuutiniit amerlanerusut. Kommuneqarfik Sermersuup qanoq qulakkeerniarpaa sulisartut aningaasaateqarnerulernissaat qulakkeerniarlugu? NSIP-mit paaserusunneqarpoq naalakkersuinikkut sunik takorluugaqartoqarnersut kommunimut akileraarutip allanngortinnissaanut? NSIP-mi siulittaasup Sofie Svendsenip ilaatigut paaserusuppaa.
Kommuneqarfik Sermersooq nalunaaruteqarsimavoq 2023-mut ukiumoortumik naatsorsuutini sinneqartoorut 241 million koruuninik qaffasinnerusoq akileraarutinit akitsuutinillu isertitat amerlanerunerisigut.
Akileraarnermut
procenti oqaluuserineqartoq
Kommuneqarfik Sermersuumi
akileraartarnermut procenti ukiuni arlalinni 26 procentiusimavoq,
tamannalu Inuit Ataqatigiit allanngortikkusunngilaat.
- Naak kommunimut akileraarnermut procenti allanngortinngikkaluarlutigu inuuniarnermut aningaasartuut annikillisinniarlugit iliuuseqarsimavugut. Bussinut billitsit akii aparsimavavut, meeqqanut, inuusuttunut utoqqarnullu akeqarunnaartillugu ilinniartunullu affaannanngortillugu.
- Suliassaqarfinni allani akit apparniarlugit iliuuseqarniarpugut Nuuk-2025-mut periusissaq pillugu isumaqatigiissut naapertorlugu, taannalu aerlanerussuteqarluartut akuerisimavaat, borgmesteri Avaaraq Olsen (IA) oqarpoq.
Demokraatinit
qinigassanngortittup oqaluuserissallugu piareersimaffigaa
akileraartarnermut procentip allanngortinnissaa utoqqarnulli
iluaqutaasumik.
- Akileraarutip procentia allanngortinneqassappat utoqqaat siusinaartumillu suliunnaarnersiuteqartut isiginiarneqassapput. Eqqaamasariaqarparput utoqqaat taakkuummata nunap piorsarnerani ilungersorlutik sulisimasut, taamaattumillu ataatsimoorluta utoqqaat siusinaartumillu suliunnaarnersiuteqartut atugaat pitsaanerulersittariaqarpavut, Edvard Geisler (D) oqarpoq.
Siumumiit Dorthe-Marie
Mogensen-Fontain oqarpoq:
-Siumup akileraartarnermut procenti allanngortinnianngilaa, 360 millionit koruuninillu akileraartarnikkut iluarsaaqqinnissamut atatillugu, appasinnerpaanik akunnattunillu isertitaqartunut iluarsiisoqartariaqarpoq Siumumi ingerlatilersaakkatsinnik, tamannalu sulisartut malugissavaat.
Atassut Nalerarlu oqarput,
akileraarutit appartinnissaat sulissutigineqassasoq:
- Ilanngaateqartarnermik aaqqissuussineq peerusupparput assigiimmillu 30 procentimik akileraartoqarluni, Nikolaj Rosing oqarpoq. Naleqqamiiit Aputsiaq Inuk Petersen tigussaasumik oqaaseqanngilaq akileraartarnermut procenti qanoq appartinneqassanersoq, partiimilu sulissutiginiarneqarpoq.
- Naleqqap akileraartarnermut procentip appartinnissaa sulissutigaa, tamannalu anguneqarsinnaavoq atukkat nunatsinnut naleqqussarnerisigut pisariaqanngitsumik allaffissornerup peerneratigut, Aputsiaq Inuk Petersen (N) oqarpoq, inuuniarnermi aningaasartuutit qaffakkiartornerat akissarsiallu malinnaasinnaannginnerat akuerisinnaanagu.
Meeqqat inissinneqartut
Takkussimasut aamma
tusarusuppaat qineqqusaartut meeqqat angerlarsimaffiup avataanut
inissinneqartarnerannik ajornartorsiutit qanoq aaqqinniarneraat.
- Meeqqat 1.000-ingajaat angerlarsimaffiup avataanut inissinneqarsimapput. Meeqqat nammineerlutik ajornartorsiutaanngillat, angajoqqaanukua ajornartorsiutaasut. Assersuutigalugu tusartarparput meeqqap angerlarsimaffimmut namminersortumut inissinnera qaammammut 100.000 koruunit tungaannut kommunip karsianut akeqarsinnaasoq.
- Naak tunngaviatigut ajornartorsiut immaqa tassaagaluartoq angajoqqaat ineqarnermut akiliutiminnik 20.000 koruuninik kinguaattoorsimanerat. Inuiaqatigiit aaqqissuussaaneranni akuerisinnaanngilarput taamatut pisoqartarnera ilaqutariit sequminneqarlutik. Inatsisinut atatillugu kiap ilaqutariinnik ikiuisarneq allanngortikkusuppaa, taamaalillutik meeqqat angerlarsimaffiup avataanut inissinneqaratik? Klaus Frederiksen meeqqat inuusuttullu inissinneqartarneranni ajornartorsiutit pillugit aperisut qulit ilaat aperaaq.
Illersuiniarneq
Anaanarsiap ernumasup
meerarsiarisimasami 18-ileereersimasup ikiorneqarnissaa ujartorpaa.
Anaanarsiaasimasoq inuusuttup atornerluineranut ikiuiniartoq
naapertorlugu meerarsiaareernerup kingornagut illersuiniarneq
amigaataavoq.
Arnap inuusuttup misigaa
angajoqqaani kommunimit akiorneqanngitsut, naak ikioqqullutik
kommunimut saaffiginnissimagaluartut. Taarsiullugu angerlarsimaffiup
avataanut inissinneqarpoq, angajoqqaavilu suli
ajornartorsiutigisaminnik ilungersuuteqarput.
Innuttaasut arlaqartut
naalakkersuinermik suliallit takorluugaat pillugit aperisarput,
ilaqutariit ilumut qanoq ikorniarneraat, meerai asuli
angerlarsimaffiup avataanut inissinnagit.
- Klaus Frederiksen, eqqortumik oqaraluarputit, qaqugukkut ilaqutariit meerartallit ikiorniarlugit sulisassanersugut. Misissuinerit takutippaat, meeqqat inissinneqareerlutik angerlaqqikkaangamik misigisaraat angajoqqaamik isumaginninnikkut ajornartorsiutitik taakku atuinnaraat.
- Soorunami inatsisit malissavavut, meeraq atornerlugaasimappat imaluunniit pinerliivigineqarsimappat. Naatsorsuutigisinnaavarsili Siumup ilaqutariit ikiornissaat sulissutiginiaraa, ilaqutariit meeqqallu tapersersorneqarnissaat pillugu inatsisit naapertorlugit, Martha Abelsen (S) oqarpoq.
Inissiisarnerit
annikillisinneqartariaqarput
Demokraatit meeqqat
inissinneqartartut ikilisinniarpaat.
- Meeqqat tarnikkut ikioqqaarneqarnissaat qulakkeerniarput, ilaqutariinnut ikiuinissaq tapersersuinissarlu qulakkeerlugu. Eqqortuusinnaanngilaq meeqqat taama amerlatigisut angerlarsimaffiup avataanut inissinneqartarnerat. Ullumikkut periarfissarpassuaqarpoq isumaginninnermut inatsit allanngortissinnaallutigu, peqatigiiffiillu suleqatigalugit meeqqat angerlarsimaffiup avataanut inissinneqartut ikilisillugit, Elias Nielsen (D) oqarpoq.
Atassut isumaqarpoq
ilaqutaasut allat aperineqartariaqartut, meeqqap perorsarnissaa
ingerlakkusunnginneraat.
- Atornerluinermut katsorsaanermi katsorsaaviit atorfissaqartippavut. Inuusuttut 18-ileereersimasut, ikiortariaqartullu peroriartornerminni kingunerluutigisaminnik misigisaqarsimanermillu tamatumunnga atatillugu katsorsarneqartariaqarput ilinnialernissaminnut imaluunniit suliffeqalernissaminnut ikiorneqarlutik. Ilaqutaasut qaninnerpaat, atsakkut, akkakkut, ajakkut aanakkulluunniit atorluarnerusariaqarpagut, angajoqqaat meeqqatik perorsarsinnaanngippatigit. Meeqqat ilaquttatik pisariaqartippat, ilaqutaasullu aperinissaannut pikkorinnerusariaqarpugut, meeqqap perorsarnissaanut akisussaaffik tigorusunneraat, tarnikkullu ikiorneqarnissaa qulakkeerlugit, tamannalu suleqatigiissutigerusupparput meeqqat pitsaanerusumik siunissaqarnissaat qulakkeerniarlugu, Nikolaj Rosing oqarpoq.
Aaqqiissutissat allatut
ittut
Ataasiinnarmik
isaariaqarnissaa tunngaviusariaqartoq, kiffartuussinermik
ingerlatsiviusoq IA-miit Inge Olsvig Brandt oqarpoq, Naleraq
isumaqarluni, ilaatigut pikkorissarnerit angajoqqaanut
ikiuutaasinnaasut meeqqaminnik isumaginninnissaannut.
- Ukiunut qulinut tulliuttunut ilaqutariinnut meerartalinnut politikkiliortoqareersimavoq, ilaqutariillu ataasiusutut kiffartuunneqarnissaat qulakkeerniarlugu.
- Ataasiinnarmik isaariaqarnissamik tunngaveqalerneq eqqukkusupparput, kiffartuussinerup tamarmiusup aallaavigisassaanik. 18-ileereersimasunut illersiniarpugut, inuusuttunut ingerlatsiveqarluni, inuusuttunullu aqqutissiuisunik atuilerluta, taamaattumik iliuuseqaraangatta ilaqutariit ataatsimut isiginiartariaqarpavut, Inge Osvig Brandt (IA) oqarpoq.
- Meeqqat angerlarsimaffiup avataanut inissinneranut qaammammut 100.000 koruunit aningaasarpassuupput. Aaqqiissutissanik allanik nassaarniarpunga, angajoqqaat sanngiitsut aqqutissiuullugit meeqqamik perorsarnissaannut pikkorissarlugit, Naleqqamiit Silas Simonsen oqarpoq.
