Siorna tillinniarnerit aserorterinerillu ikileriangaatsiarsimasut

Kalaallit Nunaanni Politiit ukiup siulianut sanilliullugu pinerluttulerinermi inatsimmik unioqqutitsinerit pillugit nalunaarutinik 574-inik ikinnerusunik tigusaqarsimammata pinerlunnerit 2024-mi ikilisimapput. Tamanna ukiumoortumik naatsorsueqqissaarnermi saqqummerlaami erserpoq.

Meeqqanik kinguaassiuutitigut atornerluinerit suli amerlaqaat, politiit pisortaat Bjørn Tegner Bay Kalaallit Nunaanni Politiit ukiumoortumik kisitsisaataasa nutaat saqqummiunneqarnerannut atatillugu oqarpoq.
Saqqummersinneqarpoq

Tillinniarnerit aserorterinerillu nalunaarutigineqartut ukiunut kingullernut 20-nut sanilliullugit 2024-mi aatsaat taama ikitsigisut, Kalaallit Nunaanni Politiit ukiumoortumik kisitsisaataasa saqqummiunneqaqqammersut takutippaat. Nakuusernerit nalunaarutigineqartut aamma ikileriarput, maannalu ukiuni tallimani aatsaat taama ikitsigipput.

Kinguaassiuutitigulli kannguttaatsuliornerit, politiit suliassaasa pingaarnerit ilaat, ukiup siulianut sanilliullugit 22-nik amerlisimapput.

Kinguaassiuutitigut kanngutsaatsuliornerit suli amerlasut

Kinguaassiuutitigut kanngutsaatsuliornerit suli amerlasut

- Ukiunulli siuliinut sanilliullugu ikileriarsimapput, Kalaallit Nunaanni Politiit tusagassiuutinut nalunaarummi ilisimatitsipput nangillutillu:

- Pingaartumik meeqqanik kinguaassiuutitigut atornerluinerit ikiliartorput, 2023-mi meeqqanik pinngitsaaliilluni atoqateqarnerit, meeqqanik 15-it inorlugit ukiulinnik kinguaassiuutitigut atoqateqarnerit meeqqanillu kinguaassiutitigut kannguttaatsuliornerit 249-upput, 2024-milu 193-iullutik.

Politiit pisortaat Bjørn Tegner Bay tamatumunnga atatillugu ima oqarpoq:

- Naak ineriartorneq tamanna immikkut isigalugu pitsaasuugaluartoq nalunaarutigineqartartut suli amerlaqaat, taamaammallu meeqqanik atornerluisarneq akiorniarlugu inuiaqatigiit ataatsimut isigalugit suliniuteqartuarnissaat pingaaruteqartoq politiit isumaqarput.

Imminut toquttartut amerliartortut

Pissutsit marluk — inuusuttut pinerluttarnerat imminullu toquttarneq — killormut ingerlapput.

Inuusuttut pinerluttarnerat ukiuni marlunni appariartoq 2024-mi amerleriarpoq, aamma imminut toquttartut — katillugit 47-t — ukiunut siuliinut naleqqiullugit amerlanerupput.

- Imminut toquttartut taama amerlatigisut takussagutsigit 2016-imut utissaagut, politiit tusagassiuutinut nalunaarutaanni allassimavoq.

Powered by Labrador CMS