Siriusimi qimuttut nutaamik akuneqartariaqartut
Qimminik qimuttunik alapernaarsuisut qimminik allanik Ilulissanut aallertut.
Qimussimik alapernaarsuisartut Siriusikkut qimmiisa kingornuttakkamikkut assigiinngiiaartuunissaat qulakkeerniarlugu, qimminik nutaanik Ilulissani pissarsiortoqarpoq.
Assi: Arktisk Kommando
Qimussimik alapernaarsuisut Siriusikkut Tunup avannaarsuani
inuilaarsuarmi angallavigiuminaatsumi qimussimik alapernaarsuigaangata,
kalaallit qimmiat qimuttoq ukiuni 75-inngulersuni
pinngitsoorneqarsinnaasimanngilaq.
Qimussimik alapernaarsuisartut qimmit 70-it missaanniittut
atorsinnaavaat, taakkulu kalaallit qimmiannit qimuttunit ilisimaneqarluartunit
kinguaassiortarnermikkut issittumut naleqqussarsimasut, Tunup avannaani
pinngortitami peqqarniinnerusumi Siriusip alapernaarsuineranut tulluarlutik.
Qimmilli kinguaariit nukittunerpaagaluartut
nutartertarnissaat pisariaqartinneqartarpoq.
Qimmit Ilulissaneersut uumaffissaminnut nutaamut, tassaasumut Tunup avannaarsuani qimussimik nakkutilliisunut Siriusikkunnut ingerlaartut.
Assi: Arktisk Kommando
Taamaattumik Issittumi Sakkutooqarfik suleqatigiinnik uumasut
nakorsaat peqatigalugu Ilulissanukartitaqaqqammerpoq, taamaalillutik kalaallit
qimmiinik qimuttunik nukittuunik peqqissunillu pissarsisinnaaniassammata.
Kingornussatigut assigiinngiiaartuuneq
- Qimmit timimikkut eqqarsartaatsimikkullu peqqissuunissaat
eqqarsaatigalugit qimmit toqqarpavut, aammali qimmit assigiinngitsunik
piginnittoqarnerat qulakkeerlugu, taamaalilluta qimmit alapernaarsuinermi
atorneqartussat kingornuttakkamikkut assigiinngiiaarnerunissaat qulakkeerlugu,
Mads Skytte, illersornissamut sakkutooqarfimmi uumasut nakorsaat oqaluttuarpoq.
Qimmit pissarsiarineqartut Qimussimik nakkutilliisunut
ilaalissapput – nakkutilliisunilu ilaasut pingaarnertut suliassarilerlugu,
qimmit nutaat qimuttunut ataatsimoortunut ilanngutitinneqarnissaat,
taamaalillutik siunissami Issittumi alapernaarsueqataanissaminnut
piareersimaniassammata.
Qimussimik alapernaarsuisartut Siriusikkut taaguutigaat,
ullorissani ataatsimut ateqartitani Store Hundimik taaguutilinni ulloriaq
qaamanerpaaq. Ulloriaq taanna maanna aasap naalernerani ukiup ulluini
kiannerpaani seqinermut qaninnerpaasarpoq. Taamaattumik qangaanerusoq
isumaqartoqartarluni Sirius seqinermik ikumatitseqataasoq. Taamaattumik ullut
juulip 22-annit imaluunniit 23-annit aallartittut, ullunilu 30-ni atuuttut
ullunik kiannernik taaneqartarput.
