Sisimiuni innuttaasut: Naamminiilivinnginnitsinni arlallit inisseqqaassapput

Sisimiuni pingasunngornerugaa seqinnarippoq, innuttaasullu ilai ullup qeqqarsiorniarlutik Pisiffimmut pisiniakaapput. Taakkunani sisamaasut Sermitsiap naapippai oqaloqatigalugillu.

Taakkua namminiilivinnginnitsinni aaqqitassaq aaqqeqqaarnissaat kissaatigaat.

Suulliukua politikerinngornianiit ukkatarineqarnissaat kissaatigigaat? 

Karl Mathiassen Sisimiuneersup paasisinnaanerarpaa innuttaasut arlallit piaartumik naalagaaffinngornissarput kissaatigigaat. Karl Mathiassenili allatut isumaqarpoq.

Taassuma inunnik isumaginninneq nukittorsarneqaqqaartariaqarsoraa. Taakkuami kiveqqaarlugit aatsaat namminiilivissinnaasugut isumaqarpoq:

-  Uanga aamma naalagaaffinngornissamut isumaqataavunga, maanna piareersarneruvoq aap, kisianni piareertutut taasinnaanngilara innuttaasut tamatta naligiissumik ingerlassagutta. 

Island isumassarsiorfigalugu

Inuussutissarsiutinik inerisaaneq aamma innuttaasuniit isiginiarneqarpoq. Palli Fleischer Lyberth namminersortuuvoq salatinik naatitaaqqanillu naatitsisarluni.

Taassuma inuusutissarsiutinik inerisaanermi periarissagissaarnerulernissaq kissaatigaa.

- Inuussutissarsiutinik inerisaaneq. Uanga nammineerlunga namminersortuugama. Maani Sisimiuni salatinik naatitsisarlunga. Microgreensinillu. Annertunerusumik peqqutigalugu soorlu saniligut Islandermiut namminersorput, taakkua imminut pilersorneq pingaartitarisorujussuuaat annertoorujussuarmik, taava uagut suli Kalaallit Nunaanni taanna angunngilarput, kisianni soorunami imminut pilersorsinnaanermut tapiissutinik peqarpoq, kisianni sanilitsinnut sanilliutissagutta allaanerujussuuvoq mikinerullunilu.

Inunnguaq Enoksenip peqqinnissaqarfik pitsaaneruleqquaa. Taassuna nakorsiat utaqqigasuartarnerat taakkartorpaa.

-  Utaqqinartorpassuupput napparsimavimmiit tusarsiinerit assigiinngitsut, uangalu nammineq ippigisaqarninni tarrarsortinninnit inernerit suli ulloq manna tusagaqanngilanga januarimiilli. Pitsaanerusumik sullinneqartalernissaq amigaatigaara, inuiaqatigiit eqqarsaatigalugit.

Karoline R. Lennert naalagaffinngorutta peqqinnissarfimmut kingunerlunnissaa ernummatigaa. Taanna isumaqarpoq naalagaaffinngunnginnitsinni peqqinnissaqarfik pitsanngorsaavigineqartariaqartoq:

- Aaqqiissutissat assigiinngitsut aaqqiissutissat amerlanermut peqqinnissaqarfiup iluani amigaatigaakka. Namminiilivissagutta annilaangagaara peqqinnissaqarfitta eqqorneqarnissaa, taanna annertussammat.

- Namminiilivinnissaq assut eqqartorneqarpoq, kisianni soorlu tassunga piareersimasutut misigisimanarnani annilaanganarluni. Kalaallit Nunarput suli inerisagassaqarnermut assigiinngitsutigut. Toqqisseqqaarusuppunga assiginngitsut inisseqqaarusullugit.