Siumup siulittaasuata oqaatsini tunuartikkai
Siumup siulittaasuata Erik Jensenip Danmarkimit namminiilivinnissaq pillugu paragraf 21 qinersinerup kingorna erniinnaq atuutilersinneqartariaqartoq siunnersuutigimmagu tupaallattoqarpoq.
Siumut alloriarnissamut sioorasuusorineqassanngilaq, Erik Jensen qineqqusaarnermi oqallinnermi marlunngornermi unnukkut KNR-ikkut aallakaatinneqartumi oqarpoq.
Assi: Leiff Josefsen
Siumup siulittaasuata Erik Jensenip maanna paragraf 21 naapertorlugu namminiilivinnissamik piumasaqarnini ataatsimiititaliarsuarmi misissuisoqarnerata nalaani tunuartippaa.
Partiip ukiorpassuarni pissaaneqarnerpaasimasup siunnersuutigimmagu tupaallattoqarpoq, maannali partiip siulittaasuata Erik Jensenip siunnersuut tunuartippaa.
- Misissuineq ukiut marluk qaangiuppata naammassisussaq aallartissavarput, tamatumalu kingorna paragraf 21 atuutilersissaneripput atuutilersissannginnerippulluunniit paasinarsissaaq. Tamannali soorunami innuttaasunut toqqissisimanartuussaaq.
- Siumut alloriarnissamut sioorasuusorineqassanngilaq, taanna marlunngornermi unnukkut KNR-imi qineqqusaarluni oqallinnermi oqarpoq.
Erik Jensen paragraf 21 atuutilersissanersoq aperineqarami "Inatsisartut tullii aalajangiisussaasut, qinersisoqareerpallu aatsaat paragraf 21 atuutilersissinnaagipput" akivoq.
Partiimi ilaasortat arlallit sapaatit akunneri pingasut matuma siorna namminersorneq pillugu inatsimmi immikkoortoq 21 atuutilerseqqummassuk taamatut nalunaaruteqarpoq. Namminiilivinnissamut aqqut paragrafimi tassani nassuiarneqarpoq.
Tamatuma kingorna ilaasortat nuimasut marluk partiimit tunuarlutik namminiilivinniartut partiiannut Naleqqamut nuupput. Tassaapput Danmarkimi Folketingimut ilaasortaq Aki-Matilda Høegh-Dam aamma Kuno Fencker, Inatsisartuni ilaasortaasoq.
Paragraf 21 ataatsimiititaliarsuup naalagaaffinngortitsinissamut inatsisitigut aqqutissiuussisussap sulinerata nalaani atuutilersinneqarumaartoq Erik Jensen februaarip arfernani DR-imut oqarpoq.
- Ataatsimiititaliarsuaq akuersissutigereerparput. Tamatuma saniatigut paragraf 21 atorlugu danskit naalakkersuisuinik isumaqatiginninniarsinnaavugut. Tamanna qineqqusaarutigissavarput, oqarpoq.
Maannali namminiilivinnissamut aqqut allaalluinnarpoq.
Paragraf 21-p atuutilersinneqartinnagu innuttaasunik taasititsinissaq piumasarineqartoq naalagaaffimmik pilersitsinermut nunanullu allanut tunngasunut naalakkersuisoq Vivian Motzfeldt ataasinngornermi Siumup qineqqusaarutiminik saqqummiussinerani oqarpoq.
Isumaqatigiinniartoqarnissaa qulakkeerniarlugu aamma ’pimoorussassaq’ pillugu qularneq qaangerniarlugu taamaaliortoqartariaqarpoq.
