Sumiikkaluaraanni qaqugukkulluunniit atuarneq
Meeqqat atuarfimmi ilinniartinneqarnerannut nittartakkakkut toqqaannartumik ilinniartitsissut nutaaq School To Go meeqqat ilinniarnerannut nuannaarnerannullu iluaqutaassaaq. Meeqqat tusarnaaruserlutik toqqaannaq ilinniartinneqartalerunik tinguarteqqasinnaanerulissapput - nuannisarlutillu.
Assi: Anne-Sophie Elmo
Anitsiareernermi atuarfiup siarnga sianerpoq.
PAASISSUTISSAT
School To Go-mi ilinniartitsissutigineqartut 18-iupput, soorlu qallunaatut, tuluttut matematikkilu, aammattaaq ilinniartitsissutigineqartartut nutaat aqqaneq-marluk, soorlu teknologiimik paasinninneq, atugarissaarneq aamma suliffik ilinniagaqarnerlu.
1. klassimiit 9. klassimut ilinniartitsissutini tamani uku ilaapput:
- Sammisani assigiinngitsuni qulini aturtitsinerit 30-t.
- Atuartitsineq ataaseq 45 minutsinik sivisussuseqarpoq, tassani tusarnaagassaq minutsinik 20-nik sivisussusilik meeqqap tusarnaarnermini malinnaanissaanut atuaruminartumik pappiarartalik. Aamma suliassat 3-5-inik amerlassusillit, ilinniartitsisumullu sammisaq pillugu isumassarsiorfiusinnaasut.
School To Go katillugit 2.880-inik atuartitsissuteqarpoq. Atuarfinnit tamanit atorneqarsinnaallunilu periutsit nalinginnaasumik ilinniartitsissutigineqartartut aallaavigineqarput. Tassalu Atuartitaanermik ministereqarfiup sinaakkutai anguniagaalu aallaavigineqarlutik.
Anne-Sophie Elmo 5.C-mi atuartut 28-t qallunaatut atuartissallugit tikilluaqqujartorlugit allattarfiup saaniippoq. Ullormut atuartitsilinnginnermi meeqqat issaaqqoriarlugit tussarnerinut minutsit qulit siulliit atorpai. Atuartut suliakkerneqarput. Tassanilu ilinniartitsisut amerlanersaannut unammilligassat aallartittarput:
- Klassimi 20-30-nik atuartulimmi assigiinngitsorpassuarnik pisariaqartitsisoqartarpoq. Atuartoq ataaseq atuarnermik sungiusartariaqarpoq, alla atuarfimmi nukarlerni sungiusarneqarnissamik pisariaqartitsivoq, pingajuatalu suliakkiussaq minutsit qulit ingerlaneranni naammassereeramiuk susassaaleqivoq. Ilinniartitsisutut atuartunut ataasiakkaanut suliassat naleqqussarnissaat ajornakusoortarpoq, taamaalillunilu pisariaqartitaannik ikiorneqanngitsoorsinnaallutik, Anne-Sophie Elmo oqarpoq.
Anne-Sophie Elmo meeqqat atuarfianni ilinniartitsisuunermini taamatut misigisaqarnikuuvoq, ilinniartitsisullu allat aamma taama misigisaqarsimapput. Ukiut tallimat qaangiummata pisariaqartitsineq tamanna pissutigalugu School To Go-mik isumassarsiaraa.
Nittartakkakkut attaveqaatit atorlugit ilinniartitsisinnaaneq maanna saqqummiuteriaannanngugaa.
Tusarnaarutitigut toqqaannartumik ilinniartinneqarneq
School To Go nittartakkakkut ilinniartitsissutaavoq meeqqanut 1. klassimiit 9. klassimut atuartunut sumiikkaluaraanniluunniit tusarnaarlugu atorneqarsinnaasoq. Ukiumut ilinniartitsissutaasartuni 2.880-iusuni meeqqat ilaatigut oqaatsinik, kisitsisinik tuluttullu ilinniartinneqartarput.
Meeqqap ullormut sammisaq pillugu perorsaasumit eqqissisimasumik nipeqartumit minutsit 20-t ingerlaneranni ilinniartinneqaatigaluni pappiaqqat atuaruminartut atorlugit malinnaasinnaavoq. Taamaaseriarluni suliakkerneqassaaq sammisarlu pillugu nammineq isumassarsiaminik suliaqarsinnaalerluni.
Atuarfimmi ilinniartitsisup taanna atorlugu meqqap nammineq sukkassusaa atorlugu sammisaq pillugu ilinniartissinnaavaa, kingornalu eqqartueqatigiittoqarluni. School To Go taamaalilluni ilinniartitsisunit marlunnit atorneqarsinnaalissaaq.
- School To Go atorlugu atuartitsinerup eqaannerulersinnissaa, paasiuminartunngornissaa minnerunngitsumillu naleqqussarsinnaanngornissaa kissaatigalugu suliniuteqarpunga. Nipit atuarfimmi eqqissisimanarnerulersitsisarput, meeqqat namminneq silarsuaaqqaminniissinnaanngussallutik. Meeqqat eqqissisimanerujussuanngornerat ilinniartitsisut tupaallaatigaat, meeqqallu namminneerlutik atuarnerup qanoq nuannersinnaatiginera aamma tupaallaatigalugu, Anne-Sophie Elmo oqarpoq.
Meeqqat atugarissaarnerulerlutillu tapersorneqarnerat
Meeqqat atuarfinni atugarisaat ukiuni arlalinni appariartuinnarpoq, maannalu ukiuni qulini aatsaat taama appasitsigisoq Danmarkimi Meeqqanut Ilinniartitaanermullu Ministereqarfimmit kisitsisini kingullerni takuneqarsinnaavoq. Meeqqat tinguartinniarnerat ajornakusoortarpoq, susassaaleqisarput ilinniartitsinerlu pissutaalluni atuartut pingajorarterutaat ilikkarusussusaaruttarlutik. Anne-Sophie Elmop ineriartorneq tamanna malinnaaffigeqqissaarsimavaa.
School To Go meeqqat ataasiakkaat pisariaqartitaannut iluaqutaasinnaasoq upperaa. Meeraq assigiinngitsutigut unammilligassaqarlunilu tapersersorneqarnissamik pisariaqartitsinera apeqqutaanani.
- Atuartuuteqarnikuuvunga ADHD-mik innarluuteqartumik, taannalu sivisuumik issiasinnaanngimmat atuartinneqarnera killeqarluni. Init atuartitsiviit qimakkajuttarpai, takkukkaangamilu aatsaat nammineq piffissaqarfigisani atorlugu takkuttartarpoq. Naggataatigut atugarliulerpoq. Inuunermi nammineerluni qanoq aqunnissaanut ilisimasanik amerlanerusunik tapersersorneqarnerunissamillu pisariaqartitsivoq, Anne-Sophie Elmo oqarpoq.
Meeqqat taamaattut eqqarsaatigalugit periutsimik nutaaliamik ineriartortitsivoq. School To Go-mik atuinermini issiaannarnissaq pisariaqanngilaq. Anitsiartafimmi pisorusaarluni tusarnaarujoorsinnaassagaluarpoq.
Tamanna aamma pissutigalugu ilinniartitsisup atuartitsissutimini ’Atugarissaarnissaq’ ilanngussimavaa. Tassani ikinngutigiilluarneq qanoq paasisariaqarnersoq, aamma kinaluunniit immikkoortitaasutut misigeqqunagu qanoq imminnut mianersuussinnaanertik meeqqat ilinniarsinnaavaat.
Angajoqqaat ikiorneqarnissamik pisariaqartitsisut
Meeqqat ataasiakkaat atuarfimmiinnaanngitsoq tapersersorneqarnerusariaqartut Anne-Sophie Elmop ilisimavaa. Ukiorpassuarni misissuinermini angajoqqaat arlallit oqaloqatigisarnerisigut taakku qitornamik ilinniagassaannik ikiuinissaminnut sakkussanik amigaateqartoqartatut paasivaa.
Ilinniartitsisuusimasup angajoqqaarpassuit immikkut maluginiarsimavai.
- Angajoqqaat atuariartorusunngitsunik meerallit iliuusissaaleqisarput. Qitornamik naalliunnerat isigalugu aaqqiissutissamik amigaateqartarput. Meeqqamik kinguariarpallaannginnissaa qulakkeerniarlugu atuarfik suleqatigalugu atuartinneqarnissaat isumagisariaqarpaat; namminerli atuarnikuunerit qangalili pisimappat, meeqqap atugarliortup saniatigut ulloq naallugu suliffeqaraanni nukissaaleqisoqarsinnaasarpoq, Anne-Sophie Elmo oqarpoq.
Taamaattumik ilinniartitsissut soqutiginnittunut tamanut – angajoqqaanut atuarfinnullu – ammavoq. Nittartakkakkut pissarsiarineqarsinnaalereerpoq, tassani aamma misilinneqarsinnaalluni.
