Takornariaqarneq ukioq manna naajartornerani
piffissanngorpoq eqqarsarnissamut.
Takornariaqarnerup nalaani
oqallittoqangaatsiarpoq, pingaartumik Ilulissani, akileraarutillu sumut
tuttarnersut. Amerlasuut isumaqarput Kalaallit Nunaannuunngitsoq.
Takornariaqarneq ukioq manna naajartornerani
piffissanngorpoq eqqarsarnissamut.
Takornariaqarnerup nalaani
oqallittoqangaatsiarpoq, pingaartumik Ilulissani, akileraarutillu sumut
tuttarnersut. Amerlasuut isumaqarput Kalaallit Nunaannuunngitsoq.
Aningaasaliinikuuvugut milliardilikkaanik mittarfinnut
nutaanut, talittarfinnut, attaveqaatinut - isumalluarluta takornariaqarneq
siuarsaataassasoq. Kisianni ukioq manna naajartornerani apeqqut suli tassaavoq:
aningaasat pilersinneqartuni, qanoq annertutigisoq Kalaallit Nunaaniiginnarpa?
Nunat allaneersut amerlasuut aasaanerani suliartortut
kivitseqataapput, kisianni annertusiartortumik apeqqusiisoqarpoq tamaani
akileraartarnersut. Ilai sapaatit akunnialui, ilai qaammaterpaaluit sulipput.
Ilai tamaani suliffeqarfinnut, ilai Danmarkimersut imaluunniit nunat
avannarlerneersut suliffeqarfiit. Maleruagassat paatsuunganarput: ulloq
siullermiik tamaani akileraartariaqarput, nunatsinneersumut suliffeqarfimmut
suliffeqaraanni - kisianni isumaqatigiissutit marloqiusamik akileraartarneq
pillugu, nalunaarsiunerit amigartut, nakkutilliinnginnerullu, nalorninartippaa
susoqavinnersoq.
Tunngaviusumik apeqqummik pilersitsivoq: Akuerissavarput
sulineq Kalaallit Nunaanni pisoq, kisianni akileraarnertaa immaqa nunamut
allamut pisoq? Aammalu qanoq qulakkiissavarput suliffeqarfiit
tamaanngaanneersut, kommuunillu ilumut pissarsisut - eqqagassat,
upalungaarsimaneq, aserfallannerlu kisimik pinnagit?
Oqallinnermi eqqaamasariaqarparpulli nuannersortai:
amerlapput aallarnisaasut nunatsinneersut pikkorissut, ingerlalereersut
ataavartunik misigisassanik pilersitsisut, suliffiillu tamaani. Amerlasuut
taperneqarput aningaasaliisarfinniit, ilaatigut bankit, tamaanngaanneersullu
aningaasaliisartut. Takutippaa avataaniit takornariaqarneq
aqunneqartariaqanngitsoq, iluatsissaguni.
Kisianni Kalaallit Nunaat, takornariaqarnermi
piginnittuuginnassaguni, pisariaqartut ilaat tassaapput maleruagassat
erseqqaarissut. Akileraarutit tuttassapput, sumi sulineq pinersoq
aallaavigalugu - siuariartornerlu tamaani iluaqutaassaaq.
Apeqqut tassaaginnanngilaq, takornarissat qassit, kisiannili
kia aningaasarsiutigissavaa takornarissat takkunnerat. Pissutigalugu Kalaallit
Nunaata aningaasat pisariaqartippai.
Takornariaqarnermut inatsit ilutigalugu, takornarissallu,
umiarsuillu takornariartaatit amerliartortillugit, apeqqutitoqaq,
nutaatullusooq illuni nuivoq: Kina takornariaqarnermi iluanaassava - kinalu
inuiaqatigiinnut tapersiissava?
