Tasiilami suleqatigiit nutaat
pilersinneqalerput. Suliffeqarfiit aningaasaliisartullu akornanniunngitsoq.
Kisianni Kalaallit Nunaannili suliffeqarfiup isumaginninneq aallaavigalugu
ingerlanneqartup Siu-Tsiup kiisalu Verdensnaturfondenip WWF-ip akornanni.
Tasiilami suleqatigiit nutaat
pilersinneqalerput. Suliffeqarfiit aningaasaliisartullu akornanniunngitsoq.
Kisianni Kalaallit Nunaannili suliffeqarfiup isumaginninneq aallaavigalugu
ingerlanneqartup Siu-Tsiup kiisalu Verdensnaturfondenip WWF-ip akornanni.
Ataatsimoorlutik sumiiffinni ineriartornermut nutaamik periusiorniarput –
inuusuttut, pinngortitaq aningaasaqarnerlu ataatsimoortillugit.
Suleqatigiinnermi ilisarnaatit logot
imaluunniit suliniutit ataasiakkaat piorsarnissaat kisimik pineqanngillat.
Aaqqissuussaaneq pineqarpoq, tassani Tunumi inuusuttut isiginnaartuuinnaratik
aammali minguinnerusumik tunisassiulernissami pingaarnertut inissisimassapput.
– Suleqatigiinnermi imaanngilaq WWF
’ikiuukkiartussasoq’, uagulli nunarsuarmi sulisuusutut nunaqavissunik
suliniuteqareersunik suleqataalissaagut. Inuusuttut sumiiffinnilu najugaqartut
peqatigalugit – qulaatiinnarnagit - ingerlatsigaanni Issittumi piujuartitsilluni
taamaallaat ineriartortoqarsinnaasoq upperaarput, Kalaallit Nunaanni WWF-imi
aqutsisoq Malene Lynge oqarpoq.
Kukkukuut ulluinnarni angerlarsimaffiit ingerlanneqarneranut nmanniliussapput, anaallu Tasiilami naatsiivinni naggorissaataallutik.
Assi: Siu-Tsiu
Qimminut
nerukkaatissat kukkukuujuteqarnerlu
Suleqatigiinneq suliniutinik tigussaasunik
aallaaveqarpoq, tassani Tasiilami inuusuttut minguinnerusumik aaqqiinermi
akisussaallutillu piginnittuussapput.
Eqqakkat soorlu aalisakkat niaqui nerisallu
sinneri issunngortillugit atortussannngortinnissaat piujuartitsinerlu
tunngavigalugu qimminut nerukkaatissiornissaq suliniutit ilagaat.
Saniatigut kukkukuujuteqartoqassaaq, tamanna
sumiiffimmi patajaatsumik inuussutissanik pilersorneqarsinnaanermut
iluaqutaasumik kaaviiaarnermullu matoqqasumut ilaassalluni: kukkukuut
inoqutigiinnut manninnik tunisassiortinneqassapput, anaallu Tasiilami naaatsiivinni
naggorissaataallutik.
Siu-Tsiu Kalaallit Nunaanni isumaginninnermi aningaasaqarnermut suliffeqarfiit siullersaraat. Isumaginninnermi aningaasaqarneq eqqartorneqaraangat niuerfinni atugassarititaasut naapertorlugit niuernermik ingerlatsillunilu inuiaqatigiinnut naleqalersitsineq pineqartarpoq. Siu-Tsiu Tasiilami naasuerniarfimmik ingerlatsivoq.
Assi: Siu-Tsiu
Najukkamit
nerisassiassanut ilitsersuutit
Suleqatigiinnerup ilaattuut igasut
najugaqartullu suleqatigalugit najukkami nerisassiassanut
ilitsersuusiortoqassaaq, ilitsersuutit sumiiffimmilu nerisassiat
uppernarsaataalerlutillu isumassarsiorfigineqarsinnaassapput,
takornarianuinnaanngitsoq aammali Tasiilami nerisassioriaatsimik kulturikkut
aallaaveqassallutik.
– Tulluussimaarnissaq pineqarpoq.
Minguinnerusumik ingerlatsiniarneq ministereqarfinni silaannaallu
allanngoriartornera pillugu ataatsimeersuarnerni kisimi ingerlanneqanngitsoq
takutikkusupparput. Tamannali Tasiilami naatsiivimmi, inuusuttut naatitsineq
ilinniarlugulu sulinermi takornariat aggersarpatigit pissaaq, Siu-Tsiumi
pisortaq Hanne Danielsen oqarpoq.
Suleqatigiinnissamik isumaqatigiissut Siu-Tsiumi pisortamit Hanne Danielsenimit Kalaalllit Nunaannilu WWF-imi pisortamit Malene Lyngemit atsiorneqarpoq.
Assi: Siu-Tsiu
Pinngortitamik
eriaginninneq isumaginninnikkullu akuutitsineq
Suleqatigiinnermi pinngortitamik eriaginninneq
isumaginninnikkullu akuutitsineq – immikkuutaarluni sulinermiit - qanoq
nukittunerulerfiusinnaanersoq takussutissat ilagaat.
Aningaasat suli naammatsinngillat –
suleqatigiilli aningaasaateqarfinnit suleqatigisanillu aningaasassarsiorput,
kukkukuujuteqarnermilli suliniutit siulliit nerisassianullu najoqqutassanik
suliaqarnerit aallartereerput.
