Trumpip oqaaseqareernerata kingorna Mútep partiit siuttui aggersarpai - naammaleqaaq
- Kalaallit pinnguaanngilagut ataqqinninngilluinnartumillu Trumpip pissusilersornera, siusinnerusukkut ataatsimoorluta iliuuserisimasatsinnit sakkortunerujussuarmik killilertariaqalerpoq, tassa naammaqaaq, Kalaallit Nunaat USA-p ataaniilersinnaaneranik upperinnilluni Donald Trump oqaaseqareersorlu, Müte B. Egede oqarpoq.
Isiginngitsuusaarneqarsinnaanngimmat qinersinerup inernera ataqqigaluarlugu Naalakkersuisut Siulittaasuugallartutut pisussaaffittut isigigakku, partiit siuttuisa piaarnerpaamik naapinnissaat maanna suliakkiutigeqqammerpara, Múte B. Egede allappoq.
Arkivfoto: Leiff Josefsen
Amerikamiut præsidentiat Donald Trump Kalaallit Nunaat pillugu sisamanngornermi oqaaseqaqqippoq.
Præsidentip nunamik tiguaanissaq, tassa nunap immikkoortua naalagaaffiup ataanut ilanngutitinneqarnissaa pillugu oqaaseqanngikkaluarpoq, taamaattorli nuna pillugu isummernera apeqqutigineqarmat "tiguarnissaanut periarfissaqartoq" tusagassiortunik katersortitsinermi oqarpoq.
- Upperaara taamaattoqarumaartoq, Donald Trump Reutersimut oqarpoq.
Oqaatigineqartut pillugit Múte B. Egede (IA) maanna qisuariarpoq. Facebookimi allappoq Naalakkersuisut siulittaasuugallarnini pillugu Trumpip oqariartuutaa partii siuttuisa qisuariarfigisariaqarmassuk partiit siuttui aggersarsimallugit:
- Amerikap siuttuata aammaarluni nunatsinnut tiguaanialikkersaarnera akuersaanngilluinnarpara.
- Naalakkersuisut Siulittaasuugallartutut pisussaaffittut isigigakku, partiit siuttuisa piaarnerpaamik naapinnissaat maanna suliakkiutigeqqammerpara.
- Kalaallit pinnguaanngilagut ataqqinninngilluinnartumillu Trumpip pissusilersornera, siusinnerusukkut ataatsimoorluta iliuuserisimasatsinnit sakkortunerujussuarmik killilertariaqalerpoq, tassa naammaqaaq, Múte B. Egede allappoq.
