Tusagassiorfik: Kenneth Høegh issittumi aallartitatut piukkunneqartoq

Issittumi aallartitanngortussaq Kenneth Høeghimik ateqassava?

Kalaallit Nunaata Danmarkillu issittumi aallartitaq pillugu juullinngitsiartoq isumaqatigiissuteqarput. Isumaqatigiissut naapertorlugu Naalakkersuisut issittumi aallartitassamik toqqaasinnaapput, toqqarneqartorlu qallunaat nunanut allanut ministeriata Lars Løkke Rasmussenip (M) akuerissavaa toqqarlugulu.

Kenneth Høegh USA-mi Kalaallit Nunaata aallartitaqarfiani pisortaavoq aallartitanngortussatullu piukkunnarnerpaalluni. Issittumi aaqqissuisoq Rasmus Raun Westh qallunaat tusagassiorfiannut Altingetimut (atuisuunissaq piumasaqaataavoq) naliliinermini allappoq.

Tusarfiit atitigut eqqaangisani aallaavigalugit taama naliliivoq. Taamaammat paasissutissat taakkua uppernarsarnissaat ajornakusoortorujussuuvoq.

Altingetimi misissueqqissaarneq naapertorlugu issittumi aallartitanngortussaq aaqqissuussinernik ilisimasaqarluareersuuvoq. Kenneth Høegh Namminersorlutik Oqartussani, Namminersornerullutik Oqartussani nunanullu allanut ministereqarfinni sulisimavoq.

Ataani suliaasa ilaat pillugu atuarneqarsinnaavoq.