- Ilinniartitsisut ilinniarsimasut
meeqqat atuarfiini suliumannginnerat alianarluinnarlunilu uggornarpoq. Aqqalu
Sandgreenip, Inuk Ostermann Sørensenip aamma Steve Pedersen-Hinrupip
ajornartorsiutit eqqartugaat ilisaraakka, Elna Thomsen Heilmann AG-mut oqarpoq.
Taanna ilinniartitsisut kattuffianni
IMAK-imi siulittaasuuvoq.
- Ilinniartitsisut ilinniarsimasut
meeqqat atuarfiini suliumannginnerat alianarluinnarlunilu uggornarpoq. Aqqalu
Sandgreenip, Inuk Ostermann Sørensenip aamma Steve Pedersen-Hinrupip
ajornartorsiutit eqqartugaat ilisaraakka, Elna Thomsen Heilmann AG-mut oqarpoq.
Taanna ilinniartitsisut kattuffianni
IMAK-imi siulittaasuuvoq.
Paasissutissiissutit:
- Ukiumi atuarfiusumi 2023-24-mi
nuna tamakkerlugu ilinniartitsisut 1064-iupput
- Ukiumi atuarfiusumi 2023-24-mi
nuna tamakkerlugu meeqqat atuarfiini ilinniartitsisut 207-it amigaatigineqarput
- Ilinniafissuarmi 2024-mi
ilinnialertut 32-upput, 2023-milu ilinniartut 49-t aallartillutik
- 2024-mi ilinniartitsisutut
bachelorinngorniartut 40-t naammassipput
- 2023-mi ilinniartitsisutut
bachelorinngorniartut 32-t naammassipput
Najoqqutaq: KNR-ip
qineqqusaartitsinera 04.03.2025
Meeqqat atuarfiini ilinniartitsisut
140-t missaanniittut ukiuni tulliuttuni tallimani soraarninngussasut kattuffiup
kisitsisaataasa takutippaat, tamannalu ernumanartoqartoq Elna Thomsen Heilmann
isumaqarpoq.
Allanngortoqanngippat meeqqat
atuarfiat isasuussasoq kattuffiup atuagassiaanut “ILINNIARTITSISOQ”-mut
oqarpoq.
Ajornartorsiut aaqqinniarlugu IMAK
siunnersuuteqarpoq.
- Siullermik
ilinniartitsisunngorniartut amerlinissaat IMAK-imiit kissaatigaarput,
taamaattumik ilinniarfik kajungernarnerulersittariaqarparput. Aappaatut,
ilinniartitsisutut ilinniarsimasut meeqqat atuarfianni ilinniartitsisutut
sulinissaat sulissutigisariaqarparput, taakkulu ukiorpassuarni
atuarfimmiiginnarnissaat qulakkeerniartariaqarlugu, oqarpoq.
Anguniakkatit anguneqassappata
aningaasarsiat naleqqussassavatit, Elna Thomsen Heilmann nassuiaavoq.
Atuartitsissutini
ilinniagarinngisani ilinniartitsiniartarneq sulerulunnartuusoq ilisaraa.
Ilinniartitsisut ilinniarsimasaminnik ilinniartitsisaraluarpataluunniit
sinaakkutit allanngortinneqartariaqarput.
- Meeqqat atuarfianni ilinniartitsisup
atuarfimmi atuaqatigiiaani aalajangersimasumiiginnarnissaa isumaqatigiissummi
allassimanngilaq. Ilinniartitsisut piginnaasatik aallaavigalugit meeqqat
atuarfianni ilinniartitsinissaat kissaatigilluinnarparput, Elna Thomsen
Heilmann oqarpoq.
Aaqqissuussaaneq pisoqalinikoq
Atuarfimmi malittarisassat meeqqat
atuarfianni pissutsinut maanna atuuttunut naleqqussartariaqartut Elna Thomsen
Heilmann isumaqarpoq.
-
Kommunit ukiup atuarfiusup pilersaarusiornerani malittarisassatoqqat atugaat
Atuarfik pillugu inatsimmut maanna atuuttumut naapertuutinngilluinnarpoq,
oqarpoq.
Aamma
kommunit aalajangersinnaavaat suut atuarfimmi atuartitsissutigineqassanersut,
aamma atuarfimmi ilinniartitsissutit ataasiakkaat qanoq sivisutigisumik
atuartitsissutigineqartassanersut, nassuiaavoq.
IMAK Namminersorlutillu Oqartussat
maannakkut sulisut atugaat pillugit isumaqatiginninniarnissaminnut
piareersartut Elna Thomsen Heilmannip aamma oqaatigaa.
