Ulloq inissititerfiusoq: Malik Berthelsen Qeqqata Kommuniani borgmesteritut ingerlaqqippoq
Siumut Inuit Ataqatigiillu suleqatigiilerput - kommunalbestyrelsi nutaaq isiginnaartoqarluarluni inissippoq.
Malik Berthelsen (S) Qeqqata Kommuniani borgmesteritut ingerlaqqippoq.
Assi: Tôrtia Reimer-Johansen
Qeqqata Kommuniani kommunalbestyrelsi Sisimiuni ataatsimiittarfimmi nalunaaqutaq ataatsimut inissititerluni ataatsimiippoq. Malik Berthelsen (S) borgmesteritut ingerlaqqippoq.
Siumut Inuit Ataqatigiillu suleqatigiinniarlugit isumaqatigiipput, tassani amerlanerussuteqarlutik arfineq-pingasunik ilaasortaqarput, taakkulu borgmesterissartik tamarmiullutik akuersissutigaat.
Illuatungiliuttut, arfineq-marlunnik ilaasortaateqartut taasiniarnatik aalajangerput, taaseqataanatillu.
Gedion Lyberth (S) borgmesterimut tullersortinngorpoq, Rachel Ingemannilu (D) aappaattut inissilluni.
Ataatsimiinnermi ataatsimiittarfik isiginnaartoqarluni ulikkaaqqavoq, isiginnaartullu amerlanerit qinikkanut ilaqutaasuupput.
Kommunalbestyrelsimi ilaasortanngortut assuarlutik kalaallisoorput angutitaalu qaqortumaarlutik.
Ataatsimiititaliamut ilaasortat toqqarneqartut
Ataatsimiititalianut ilaasortat toqqarneqarput:
-
Aningaasaqarnermut ataatsimiititaliaq: Malik Berthelsen (S), Juliane Enoksen (IA), Gedion Lyberth (S), Rachel Ingemann (D) kiisalu Nathan Møller (N).
-
Atugarissaarnermut ataatsimiititaliaq: Hans Frederik Olsen (S), Nivi Heilmann Efraimsen (IA), Barnabas Larsen (S), Steffen Johansen (N) kiisalu Rachel Ingemann (D)
-
Ilinniartitaanermut ataatsimiititaliaq: Evelyn Mølgaard (S), Charlotte Olsen (S), Juliane Enoksen (IA), Steffen Johansen (N) kiisalu Erne Olsen (D)
-
Teknikkimut avatangiisinullu ataatsimiititaliaq: Hans Frederik Olsen (S), Gedion Lyberth (S), Nivi Heilmann Eraimsen (IA), Karl Lyberth (N) kiisalu Bitten Heilmann (A)
-
Aalisarnermut piniarnermullu ataatsimiititaliaq: Juliane Enoksen (IA), Evelyn Mølgaard (S), Charlotte Olsen (S), Jens Lyberth (N) kiisalu Nathan Møller (N)
