Uumassusililerinermik ilinniarfik aallartilluartoq

Ilisimatusarfimmi uumassusililerinermik bacheloritut ilinniagaq nutaaq 2025-mi februaarimi aallartippoq.

Ilinniarneq pillugu sammisaq uani atuaruk.

Pinngortitaq tunngaviusoq Ilinniarneq ukiuni arlalinni ilusilersorneqartoq, katillugit ukiuni pingasuni ilinniagaavoq sammisanut qulinut agguataarnikoq. Sapaatit akunneri qulikkaarlugit aalajangersimasumik sammisaqartoqartarluni, soorlu kemi, kisitsisit atorlugit nassuiaasiorneq, uumassusillit ataqatigiinnerat allallu ilinniartitsissutini ima atilinni sammineqartarput: Tikinneq, Appa, Qimmeq, Siku, Tuttu, Imaq, Puisi, Paarnaq aamma Inuk. 

Allatut oqaatigalugu ilinniagaq Kalaallit Nunaata pinngortitaa uummassusaalu aallaavigalugit ingerlanneqarpoq. Pinngortitap pisuussutaanik aqutsineq, allaffissorneq, politikkikkut aaqqissuussaaneq aalisartullu, piniartut ilisimatuullu akornanni attaveqatigiinneq sammineqarput. Issittumi silap pissusiata allanngoriartornera avatangiisinik ileraginninnermut, inuiaqatigiinnut aningaasaqarnermullu sunniutai. Kiisalu inuit pinngortitallu imminnut ataqatigiinnerannik, tamatumunngalu atatillugu nerisarisartakkanut, nunalerinermut, piniarnermut aalisarnermullu sunniutit aamma sammineqartarlutik.

Tunniusimaneq piumassuseqarnerlu

Ilinniartut aqqanillit siulliit immikkoortortami pisortamit Aviâja Lyberth Hauptmannimit aamma ilinniartitaanermut ataqatigiissaarisumit Liv Mejer Larsenimit pikkorigineqaqaat.

– Iluatsilluarpoq. Ilinniartut aqqanillit pikkorissorujussuupput, tunniusimalluinnartuupput, piumassuseqartuupput isornartorsiuisinnaassuseqarlutillu. Ilinniartitaanerullu ineriartortinnissaanut tapertaapput, tassami suut tamarmik nutaajummata piareersimasumik najoqqutassaqanngilagut, Aviâja Lyberth Hauptmann oqarpoq.

– Ilinniartut assigiinngilluinnartuupput. Ilaat piniarnermik aalisarnermillu misilittagaqarluarput, allallu ilinniartitsissutinik pikkoriffeqarlutik. Assigiinngissuteqarnerat suleqatigiilluarnermik ikioqatigiinnermillu kinguneqarpoq. 

Ilinniartut siunnersuuteqartartut

Aviâja Lyberth Hauptmannip ilinniartut ilinniartitaanermut tunngatillugu isummertarnerat aamma qujamasuutigaa.

 – Ilinniartut ilinniakkap ilusilersorneqarneranut tunngatillugu naliliisarnerat nuannaarutigeqaarput. Ilinniartut uagutsinnut pingaarnerpaapput, ingerlatsinermilu arlaannik naleqqutinngitsumik imaluunniit allatut pitsaanerusumik ingerlanneqarsinnaasumik siunnersuutissaqaraangata pimooruttarpavut. Ilinniartut uumasut sananeqaataanik ilinniarnermi taakku qanoq atuuffeqarneranut ilinniarnermut atassuserneqarsinnaanerannut ilaatigut kissaatigaat, taamaaliornikkut assersuutigalugu timmiamik imaluunniit uumasumik allamik misissuisarfimmi ammarlugu misissueqqissaarnermi suut takunerlugit ilisimaneqarsinnaalersinnaalluni. Eqqaamalluarneruneqarsinnaalerlutillu. 

Aqisserniarneq tuttunniarnerlu

Ilinniartitsinerup ilarujussua nunami ilisimatusarnermut aamma tunngavoq.

 Aqisserniartoqarlunilu tuttunniartoqartarpoq. 

Upernaakkut aqisserniartoqaraluarpoq, kangerlummili sikoqarpallaarnera pissutaalluni pilersaarutigineqaqqaaraluartutut ulluni pingasuni pinnani ullormut ataasiinnarmi pikkorissaasoqarluni.

- Sila apeqqutaatillugu taamaattoqartariaqartarpoq, qujanartumillu ilinniartut tamanna sungiusimavaat, Aviâja Lyberth Hauptmann oqarpoq.

Ilinniartut Nuup Kangerluani Itinnerani septembarimi tuttunniassapput, Aviâja Lyberth Hauptmannillu qilanaaraa.

- Tuttunniarnermi atortussanik taqqavunnaasseqqammerpugut, piniarniarnermilu pikkorissarnissap piareersarsinnaanera nuanneqaaq, Aviâja Lyberth Hauptmann oqarpoq. 

Ilinniarneq soqutigineqaqisoq

Ilinniartut nutaat 2026-mi februaarimi aallartissapput, soqutiginnilluartoqalereersorlu malunnarpoq.

– Inunnit assigiinngitsunit qaqugu qinnuteqartoqarsinnaanersoq pillugu saaffigineqartarpunga, soqutiginnittoqaqisorlu maluginiartarlugu. Ilinniarnerup aallartinnissaani siullermut, aqqaneq-marlunnik ilinniartunut inissalimmut, 40-t sinnerlugit qinnuteqarsimapput, taamaattumik neriuutigaarput taamanikkut qinnuteqartut ilaat qinnuteqaqqikkumaartut. Ilinniartuutigisinnaasatta amerlassusaanniit qinnuteqaatit pitsaasut amerlanerusut tigunikuugatsigit, Aviâja Lyberth Hauptmann oqarpoq. Immikkoortortaqarfimmi ilinniartut ukiuni assigiinngitsuni ingerlasut ataatsikkuulernissaat taassumga qilanaaraa, nuannersumik sunniuteqartarmata.

- Ilinniartut ikittunnguit siulliit taama ataqatigiilluartiginerat uagutsinnut isumalerujussuuvoq, tamannalu aamma ilinniarnerannut iluaqutaasoq takusinnaavarput, oqarpoq. Taamaattumik ataqatigiilluarnerat tunniusimanerallu ilinniartunngorumaartussanut ingerlateqqinneqarsinnaassasut neriuutigaarput.

Ilinniartut årganginit assigiinngitsuneersut akimorlugit ilinniartitsissutini assigiinngitsuni ilinniartinneqartarnissaat siunissami pilersaarutaareerpoq.

 Uumassusililerinermut – SILA – qinnuteqarfissaq tulleq 2025-mi novembarip aallaqqaataanut killeqarpoq. Ilinniartullu tullii 2026-mi februaarip aappaani aallartissallutik.