Zammip angutaa saqqummerpoq: Keirap anaanatut tulluannginnerarneqarnera paasisinnaanngilara

Keira Alexandra Kronvold panimminut novembarip 7-aniilli sapaatit akunneri tamaasa naasunik nassiussisarpoq.

Naasut maannamut katillugit 35-nngungajalerput.

Naalungiarsummi Zammi anaanamini najugaqarnikuunngisaannarpoq. Inunngornerminiit akunnerit marluk qaangiuttut Thisted Kommunimiit pinngitsaaliissummik arsaarinnissutigineqarpoq angajoqqaarsiaqalerlunilu.

AAMMA ATUARUK

Danmarkimi kommunip kalaaleq ernippat meeraanik pinngitsaaliissumik arsaarniaraa

Keira Alexandra Kronvold eqqarsartaatsikkut misissuutit atorlugit anaanaatut tulluanngitsutut naliligaanikuuvoq. Taakku misissuutit qallunaat kommuunini kalaallinut angajoqqaanut maajip aallaqqaataa aallarnerfigalugu atoqqusaajunnaarnikuupput. Kalaallit angajoqqaat Keiratullu ittut, Ilulissat nunaqarfianeersut Qeqertaminngaanniit.

Inatsit nutaaq - allanngortoqanngitsorli

Naak inatsit allanngortinneqaraluartoq – Keiramut suliaq pissutigalugu inatsit ilaatigut malinnaaffigineqangaatsialernerata kingunerisaanik – Keira pillugu suliamut allannguuteqanngilaq. Aamma siunnersuisartut VISO qaqugu suliaq misissussaneraat arlaannilluunniit kinguneqassanersoq suli ilisimaneqanngilaq.

– Suliaq kommunimit arriisaarunneqartutut misigaara, taakkumi paasissutissat VISO-mut nassiussassatik isumaginngilaat, Keira Alexandra Kronvold oqarpoq.

Keirap panimmi sapaatit akunneranut akunnermi ataatsimi ilagisarnerata sivitsorneqarnissaa maanna sukataarutigaa. Tamatumi saniatigut sapaatit akunnerni marlunni takunngitsoortussanngorpaa, Zammip angajoqqaarsiaata sulinngiffeqarnermut atatillugu angalaqatigissammassuk. Naak Keira taamatut kissaateqanngikkaluartoq.

Suliaq toqqissisimanaranilu paasiuminaatsoq

Zammip angutaa terlinganiit suliamut malinnaavoq, taanna tusagassiutitigut saqqummerusunnikuunngilaq. Maannali kinaassutsimik isertuussilluni Sermitsiamit apersorneqarnissamik akuersivoq. Keira kommunimiit naqisimaneqarluni piginnaasaminik takutitseqqusaanngitsoq taanna isumaqarpoq.- VUC-imi ilinniartuunitsinni naapippugut. Ukiut marluk qaangiummata aappariilerpugut. Keira naartulermat Thisted Kommunilu pimoorussilluni akuliunnialermat qimappugut. Aqqusaagaq akiorsinnaasimanngilara, uangami angerlarsimaffiup avataanut aamma inissinneqarnikuuvunga, Zammip angutaa 32-nik ukiulik, ulluinnarnilu aalisakkerivimmi sulisuusoq oqaluttuarpoq.Keirap erninissaata tungaanut suliaq toqqissisimanaranilu paasiuminaassimasoq taanna oqarpoq.- Keirap kommuni suleqatigiumallugu oqarpoq. Sutigut tamatigut tunniusimavoq. Naalungiarsunnut siniffissivoq, nangilersuivissivoq atuakkanillu naalungiarsunnoortumik nipituumik atuffassisarluni. Kommuunimiit pulaartoqaraangat arlaannik ippinnartussaqarneq ajorpoq. Nalunngilarali angajullernik marlunnik meeraqartoq angerlarsimaffiup avataanut inissinneqarsimasunik, aamma ataatanngorusuppiarnikuunngilanga arlaatigut ilisimagakku ajortoqartussaasoq. Qimanniarluta aalajangerpugut, aamma suliamut tunngatillugu Keiramut arlaatigut akornusiinissara ernummatigigakku kommunimut ataatsimiigiarneq ajorpunga. Piffissalli ilaani takusinnaagakku ajortumik nalilerneqartoq kommunimukarpunga suliarlu pillugu qanoq isumaqarnerlunga anngullugu, angajoqqaajusinnaanermillu misissuut atorlugu misissorneqaannassasunga akineqarpunga, taamaaliorusunngilangali. Tassani malugisinnaareerpara angerlarsimaffiup avataanut inissiisoqarniarluni sulisoqartoq.– Angajoqqaajusinnaanermut misissuutit Keiramut atorneqartut Kalaallit Nunaanneersunut tulluanngillat. Nunanit allaneersut tullaarineqaannartarput tulluanngitsutullu nalilerneqarlutik. Keira eqqunngitsumik nalilerneqartoq isumaqarluinnarpunga. Tassami suut allanngortittariaqarnerai tunngavilersorneqanngillat. Keira qitornaminut qanoq ittuunersoq takunikuuara, anaanaavoq meeqqani pillugit qanorluunniit iliuuseqarsinnaasoq. Taamaattumi paasiuminaatsippara Keiramut tunngatillugu suut sapernerarneqarnersut.

Sorsunneq sivisusoq

Zammi inunngitsiartoq inunngorpat arsaarinnissutigineqassasoq kommunimit aalajangerneqarpoq, taamatullu aalajangiineq Keirap nakkassutigerujussuaraa Zammip angutaata oqaluttuaraa.

– Ernisussanngorami kisimiippoq. Zammi inunngorpat tigoriarlugu arsaagaaqqinnissara orniginngilara. Nalugakku qanoq qisuariarnissara napparsimavimmeeqataassananga aalajangerpara.

– Taamanili eqqartuussiveqarneq aqqutigalugu sivisuumik sorsuttoqalerpoq, Keira assigiinngitsunit apersorneqartarpoq aamma akerliussutsimik takutitsisoqartarluni. Tamatuma saniatigut kommunimut sorsuuteqarluni.

Kulturiminnik oqaatsiminnillu arsaagaasut

– Zammi Keiramut angerlaqqissinnaasoq nunarsuarmi kissaatiginerpaavara, Keiralu angajoqqaatut piginnaaneqartitaalissasoq. Keira angajoqqaajulluarsinnaalluartoq upperaara, Zammilu asallugu. Keira qitornaminut qanoq ittuunersoq takunikuuara, anaanaavoq meeqqani pillugit qanorluunniit iliuuseqarsinnaasoq. Qanoq anaanaasinnaanerminik takutitsinissaanik periarfissinneqannginnera ajuusaarnarpoq. Naqissuserneqaqqavoq Zammip angutaa oqarpoq. Suliaq kommunimit sukkanerpaamik naammassiniarneqartutut taassuma misigaa.

Zammip ataataa mikisuulluni angerlarsimaffiup avataanut inissinneqarnikuuvoq, taamaammallu Zammi anaanaminiit peerneqarnerata saniatigut kalaallisut kulturiminiit kinaassusiminiilluni peerneqarnera aamma sakkortuvoq.

– Inuuninni ukiut siulliit arfineq-marluk meerarsiaanikuugama pikkunartorsiornikooqaanga. Aamma nunamut allamukartitaasimasuuguma qallunaatut kulturinniit tunuliaqutanniillu arsaagaallunga nuannersimanavianngikkaluarpoq. Inuit kulturiinik taamatut arsaartuiinnartoqarsinnaanngilaq, Zammip ataataa oqarpoq.

Inatsisit atuutut malinneqartut

Keira Alexandra Kronvoldimut suliaq Thisted Kommunimit immikkoortoqarfimmut VISO-mut nassiunneqarsimanersoq Sermitsiap apeqqutigaa. Inatsisit malillugit taamaaliortoqartussaavoq. Meeqqanut Ilaqutariinnullu ingerlatsivimmeersoq Lars Sloth ima akivoq:

”Suliamut attuumassuteqannginnavit suliamut aalajangersimasumut tunngatillugu VISO ilanngunneqarsimanersoq ajoraluartumik paasissutissiissutigisinnaanngilara. Suleriutsimulli ataatsimut isigalugu inatsisit atuuttut malinneqarnerat qularutiginagu oqaatigisinnaavara, tassani Meeqqat pillugit Inatsimmi §§171 a-d 2025-mi maajip aallaqqaataani atuutilersoq ilaalluni. Tamatuma kingorna kommunip ilaatigut immikkoortortaqarfik immikkut ittoq kalaallisut oqaatsinik kulturiannillu ilisimasalik angerlarsimaffiup avataanut inissiinermut suliat ingerlasut tamaasa misissoqqullugit qinnuigissavaa. Sulianut inatsisit nutaat malillugit suliarineqarsimanngitsunut taamaaliortoqassaaq, tassa eqqarsartaatsit qanoq innerinik misissuutit nalinginnaasut atornagit immikkoortortaqarfik immikkut ittoq VISO-p ataaniittoq qinnuigineqassaaq misissuinissamut.”