Futsalimik timersorneq oqaluttuarisaanermi siullerpaamik aningaasaliiffigineqartoq
Grønlandsbankenip ukiuni pingasuni tulliuttuni aningaasaleeqataaneratigut futsalimi timersorneq aningaasatigut siuarsarneqassaaq.
Futsalimik nunanut allanut unammisartut Brasiliami unammiuaarnissami unammissapput.
Toqqorsivimmiit assi: Leiff Josefsen
KAK-p, Kalaallit Arsaattartut Kattuffiata, Grønlandsbankenimik isumaqatigiissut timersornerup ineriartortinneqarnissaanut tamanut iluaqutaasinnaasoq tusagassiuutinut nalunaarummi “oqaluttuarisaanermi pingaaruteqartutut” taavaa.
- Grønlandsbankenip Guldbold-imik aningaasaliisutut kalaallit futsalimi nunanut allanut unammisartuisa, ukiuni kingullerni iluatsilluartumik maluginiarneqarluarlunilu, aammattaaq inuusuttuni najukkamilu nukittorsarnissaannut ineriartortinnissaannullu annertuumik tapersersuissaaq, tusagassiuutinut nalunaarummi allassimavoq.
"Suleqatigiinnitta nutaap qulakkeerinnanngilaa futsalimi nunanut allanut unammisartut nutaanik angusaqarnissaannut pisariaqartunik aningaasanik pissarsinissaat, aammali Kalaallit Nunaanni futsalimi siuarsaanissamut iluaqutigissavarput", KAK-p siulittaasua Kenneth Kleist suleqatigiinneq nutaaq pillugu oqarpoq.
Timersornermut peqataaneq
Isumaqatigiissut nutaaq atuutilerpoq, Grønlandsbankenilu nunanut allanut unamminerni Guldsponsoritut unammisartut atisaanni tusagassiuutinilu takuneqarsinnaalissaaq.
- KAK futsalimilu nunanut allanut unammisartut tapersersorsinnaagatsigit tulluusimaarutigaarput. Kalaallit Nunaat timersornerup tungaatigut periarfissarpassuaqarluarpoq, ineriartorteqataarusuppugullu kinguaariillu tulliuttut isumassarsisikkusullugit. Suleqatigiinnikkut tamanna periarfissaqalissutigaarput timersornermut inuiaqatigiinnullu tunniusimanermik ersersitsinissatsinnut, Peter Fleischer Rex, Grønlandsbankenimi attaveqaqatigiinnermut nittarsaassinermullu ingerlatsisoq oqarpoq.
Futsalimi nunanut allanut unammisartut Brasiliami unammersuarnissami unammisussanngorput. Aningaaseriviup "Guldsponsoritut" aningaasaliisunngornermini KAK aningaasanik qanoq annertutigisunik tapiissuteqarfigineraa ilisimatitsissutigineqanngilaq.
