Nillertumut misunneq kissalaartumillu tikilluaqquneqarneq

Nuummi talittarfiup majuartarfillip tungaanut pisuppunga – angallatit takornarianik angallaassisartut amerlanersaat tassunga talittarlutillu tassanngaanniit avalattarput. Silammut anersaarnikka tamarmik siornatunginni pujumininngortarput, ukiarli Nuummut takkutereersimagaluartoq, seqinnarippoq, silaannarlu siggilallunilu erseqqarilluni. Maanga nooqqammersutut Nuummiuittullu imminut taasinnaalernissannut suli ungaseqisoq, maanga tikeraartartut takorluuinnartagaat misilinniarlugu aalajangerpunga: Issittup imaanut nilleqisumut

Sermitsiaq kaajallallugu 

Talittarfimmi majuartarfilimmi angallat tungujortoq qaqortortalik taleqqavoq. Ivik Knudsen-Ostermann, Greenland Cruises-imeersoq angallammi tassaniippoq. Taanna qungujulavoq aalateriffigalungalu ikeqqullunga. Angalaarneq ilaaffigisassara tassaavoq qaqqaq ilisarnarluartoq Sermitsiaq kaajallallugu angallammik angalaarneq – qaqqaq taanna tusagassiiviup maanna suliffigisama ateqaatigaa. Angalaarnissara inniminnernialerakku tamanna nalaatsornertut ippoq.

Erfalasorput silalisimasoq aquani erfalavoq. Anorimit atugarliortitaalaavissimavoq. Qalipaatai asinngarsimapput, annoraaminerlu ingutsilersimalluni, uteriillunili suli erfalalluni. Soorlumi eqqaasitsiniartoq maani taamaallaat silagitsillugu angalaartoqarneq ajortoq, aammali issittumi, anorlersumi mallersumilu angalaartoqartarneranik.

Angalaqatigisussavara Ole Rasmussen – uattulli - Danmarkiminngaanneersoq, maannali Kalaallit Nunaanni najugaqartoq, Greenland Cruisesimilu sulisuusoq. Tamatuma saniatigut aappariit Københavnimeersut Nuummut tikeraartut aamma ikinngutigiit arnat utoqqasaat marluk Sjællandip avannaaneersut ilaaqatigaakka. Allatut oqaatigalugu: Angallat qallunaanik alapernaatsunik ilaasoqarluarpoq.

Talittarfimmit avalanniariarluta oqaloqatigiinneq aallartippoq. Ilaasut arlariit assigiimmik oqaatigaat: Kalaallit Nunaat nuna tassaavoq tamatta inuunerput tamakkerlugu tusartuartagarput – tamattali ilisimaqqissaanngisarput. Meeraanermi atuarfimmi nunap assinga, ilaquttat maani sulisimasut oqaluttuarisartagaat aamma assit takusarsimasat oqaloqatigiissutigineqarlutik – maannali kiisami tamakku akornanniilerluni. Assigiinngissutsit immaqa pissutigerpiarlugit nunamik alutorsartoqartartoq, eqqarsarpunga.

Qaqqat innaat innaaqqissut attorneqarsimanngitsut, Danmarkimi narsaatinit karrinik naatitsivigineqartartunit allaanerulluinnartut. Kalaallit Nunaat nunaavoq amerlaqisunit ilisimallugu isumaqarfigineqartartoq, aatsaalli nammineq misigisaqarfigigaanni iluamik paasineqarsinnaasoq. Tassami nammineq taama misigisimavunga.

Ikkii! 

Angallammi ingerlalaareerluta immamut nilleqisumut ikerusuttoqarnersoq oqaloqatigiissutigineqalerpoq. Taama angallassinermi aalajangersimasumik ileqquugajuppoq, angallanneqartut ilaat Issittup imaanut minguitsumut nilleqisumullu eqiiallannartumut ikisarnerat – aasaatillugu aamma ukiuutillugu, Ivik qungujulalluni nassuiaavoq.

Qujanartumik seqinnarinnerata aasarpalaarneranik misigisimatippaanga, naak nalunngilluinnaraluariga imaq erniinnannguaq ikiffigisassara, taamaallaat gradinik sisamanik kissassuseqartoq.

Annerusumik eqqarsaatigivallaarnagu misigilerpunga naluusaannaallunga puttaami ukiut 100.000-it matuma siornagut pinngorsimasumi nikorfallunga, immap 322 meterinik itissusillip qaaniillunga. Umiatsiaq ungasilaartumiippoq – ima ungasitsigaluni puttaaq nikorfaffiga ajunaarfissattut taaneqarsinnaalluni. Tassami misilinniagara torrallaanerunani ajutuulerfittut misinnarnerugami. Taamaattorli takornariat taamaaliortartut ilagiinnarpaannga – taamaattumik immaqa ilimagisakka eqquutitinnialerpakka. Isumassarsiatsialaava? Immaqa naamik. Pissanganarpa? Aap! Isumannaallisaanerimmi? Tamakkua takunngitsoorsimagunarpakka. Misigisassarsiortarneq nuannariuarpara, imminut taama qularunnaarsinniarsarivunga – soorlulusooq tamanna iluaqutaasussatut isigigiga. Tamanna takornartanit pissarsiarisimanavianngilara, eqqarsarpunga. Ataataga aamma aviisiliortuuvoq, aamma marluulluta unammilaartuaannarpugut: Kina itinerusumut aqqarsinnaava? Kina tingisarfimmit 10 meterinik portutigisumit tingisinnaava? Aamma maannakkut – Issittumi immamut nilleqisumut kina siulliulluni ikisinnaava? Uteriarnissamut periarfissaqanngilaq. 3-2-1, mianersortumik immamut pissinneq imarpallannerlu. Timera immamit nillertorujussuarmit poorneqarpoq, aamma takorloorsimasannit sakkortuneruvoq. Tamanna angakkuakkatut ippoq.

Champagniatugassatut puaasutut ittoq

Imeq nuannariuaannarsimavara. Imaannarsuarmiinneq maniguunnermik misinnarpoq – oqimaassuseqannginneq eqqissisimanarpoq. Danmarkimi ukiukkut immamut ikisarneq sungiusimavara, Aarhusimilu ukiukkut immamut ikisartut peqatigiiffiannut ukiuni kingullerni aalajangersimasumik ilaasortaallunga. Maannali Nuup Kangerluani ilisarnartut tamarmik takussaanngillat: Immap naqqani sioraqanngilaq, immamut ikinissamut majuartarfeqarani, saunamik utaqqiinnartumik ikitsereersimasoqarani. Immami nilleqisumi puttavunga immap naqqanut ungasissorujussuarmiillunga killingusaarlu kisiat avatangiiseralugu. Meeqqatut qamuuna misigissusera naapertorlugu, immami uumasorsuarmut inissisimaffissaq tulluarluinnartoq. Uumasorujussuaq aalajangersimasuunngitsoq – uumasorujussuaq itisoorsuarmi qamasutut takorloorneqarsinnaasoq, taamanikkut isikkat takusinnaagaanni taamaallaat nalussinnaasoqartarluni. Taamaakkaluartoq ersissuteqanngitsutut misigisimavunga. Naloriaqattaarpunga naakkullu anersaartorlunga – soqanngitsorsuarmilu nilleqisumi malugisinnaalerlugu immaqa maani inissaqarsinnaallunga. Imaannarmiinngitsumi, aammali Nuummi, naak ilaannikkut eqqarsaqqaarnanga isumassarsisaraluarlunga. Angallammut ikeqqikkama inussakkut tilleruluppunga. 

Aak timinniittoq ingerlarsorpoq, amera sajukulaarpoq, taava takkukkiartulerpoq – puaasutut ittoq, timera tamakkerlugu takkukkiartortoq, soorlu champagneatugassatut puaasoq. Allarut tigutinnagu nammineq unitsikkallarpunga. Sivikitsunnguamik. Nikorfavunga masaqalunga nillertuinnaallungalu, pisunulli malinnaaqqissaarlunga. Malugisinnaasara kissassutsimut tunngaannanngilaq. Iluarusulluinnarneruvoq erseqqarissoq, minguilluinnartutut misinnartoq. Malugissuseq tamanna allarpassuit assigalugit ujartortagara.

Nunamut uteqqinneq

Atisalersoreerlunga angallammiilerama imermik kissartorujussuarmik imminut najoqqagassippunga. Paarnanit tiiliaq najoqqagara iluaallannarluinnarpoq. Naak aamma tamakkutortanngikkaluarlunga tiitorfik citronimik tiiliamik kissartorujussuarmik imalik nunarsuarmi isumassarsiatsialaanerpaatut mamassuseqarpoq. Nipaallisimatsiarallarpunga. Timima kissatsinnissaa naatsorsuutigisannit sivisuneruvoq – kisianni soqutaanngilaq. Talittarfimmut tulakkatta isikkakkalu nillertut nunamut tummata, soorlulusooq qamani arlaannik allanngortoqarsimasoq. Soorlulusooq kangerlummiiginnarsimanngitsunga – kisianni arlaannik aqqusaagaqarsimallunga. Knud Rasmussenip oqaasii eqqaalerpakka: Pinngortitaq annertoorujussuuvoq, inulli suli annerulluni. Nutsakkali suli kusertut timeralu nillertumit suli sunnersimaneqartoq, tamanna killormut misinnarpoq. Inuup aatsaat imminit annerusumut sapiiserluni pinini aqqutigalugu inissisimaffini annikitsoq aatsaat paasilluartaraa. Immaqami taama pisoqartarsimavoq. Taama nillertigisumik, taamalu sakkortutigisumik piviusumillu timi poorneqarsimatillugu malunniuteqartartoq. Ikitut ittuunngitsumik tumitulli ittumik. Kuisinnertut ittoq. Oqaatsit atornagit imerli atorlugu.