17-ninik ukiulik Sasja H. Joelsen rulleskinik unamminermi Danmarksmesterinngorpoq
Rulleskinik unammineq, Svendborgimi ingerlanneqartoq, arnanik arfineq-marlunnik Danmarkimit tamarmeersumiit peqataaffigineqarpoq
Sasja H. Joelsen Danmarkimi rulleskimik pissartanngorniunnissamut peqataaniarluni januaarimili sungiusarluni aallartippoq.
Mogens Hansen
Sasja H. Joelsen, Danmarkimi najugalik, Sisimiuneersuuvoq. Taanna rulleskinik unamminermi SSP-Sisimiut sinnerlugu peqataavoq ajugaaninilu tupaallaatigisimavaa.
-Pilluarnarpoq tupannarlunilu, ullut
tamaasa pimoorussillunga sungiusartarnikka akilertutut misiginarpoq,
tulluusimaarnaqaaq.
Unammineq Svendborgimi juunip 15-ianni ingerlanneqarpoq, katillugit 15,6 kilometerisut isorartutigisumik unammillutik. Sasja H. Joelsen januaarimiilli sungiusartarsimavoq, unamminermilu sila pitsaavallaanngikkaluartoq Danmarkimi rulleskimi pissartanngorpoq.
-Qasugaluarlunga assoroorlunga
ingerlaaniinnarpunga, sila anorlerlunilu sialussuaarami aamma.
Ilaquttanniit kalaallit peqatigiiffianniillu tapersersorneqarluarsimavoq
Sasja H. Joelsen rulleskinik unamminermi DIF-imit ujaminnattaanilu.
Mogens Hansen
Sasja H. Joelsen 2019-imi Sisimiuniitilluni rulleski-mik sungiusartalerpoq, ilaquttaminit nunatsinneersuniillu tapersersorneqarluarpoq.
-Kalaallit nunaaniik tapersersorneqarnera nuannaarutigaara minnerunngitsumik ataataga aammalu klubberisara Sisimiut SSP piviusunngortitseqataammata.
-Allanit tapersersorneqaraangama piumassuseqartuaannarpunga. Pitsaanerulerumalluni imminut aqussinnaasariaqarlunilu naammagittarnissaq pisariaqarpoq. Sungiusarneq sakkortuneruleraangat pikkorinnerulertarpunga, aallartikkuminaatitsigaangama tamanna eqqarsaatigiuaannarpara. Tunniutiinnanngisaannarnissaq.
Timersorneq nuannaraa allanillu kaammattuerusuppoq
Sasja H. Joelsen 17-iinnarnik ukioqaraluarluni timersornerup iluani angusarpassuaqareerpoq. Sasja H. Joelsen ukioq manna siullermeerluni Arctic Circle Racemut peqataavoq, tassani 160 kilometerit arpappai. Unamminermi nukarlersaalluni normu 4-nngorpoq. Aappaagu Arctic Circle Racemut peqataaqqinnissani aamma naatsorsuutigaa.
Sasja H. Joelsen aamma Fredericiami arpattartut peqatigiiffianni, Fredericia Løbeklubimi, nukarlersaalluni ilaasortaavoq. Sasja H. Joelsenip inuusuttunnguugaluarluni timersornerup silarsuaani iluatsilluartumik misilittagaqalereernera ataasiinnarmik peqqutissaqarpoq.
-Pimoorullugu angusaqarusukkaanni ullut tamaasa pimoorussilluni sungiusartariaqarpoq, artornarsinnaasaraluartoq nuannersut takkuttuaannarmata siumut ingerlajuaannarpunga.
