Angutinnguaq Hegelund-Tittussen Elite Sport Greenlandimi siulittaasunngorpoq

Elite Sport Greenland-ip siulersuisuini ukiut 12-it kingulliit, taakkunannga ukiut tallimat kingulliit siulittaasutut, Nikolaj Christoffersen siulersuisuni siulittaasutut ingerlareerluni Elite Sport Greenland-imi ataatsimeersuarnermi pingasunngormat ingerlanneqartumi tunuarpoq.

Siulittaasutut taartaa tassaavoq Angutinnguaq Hegelund-Tittussen. Taanna  timersornerup silarsuaani misilittangartuujuvoq, ukiunilu kingullerni marlunni aamma Elite Sport Greenland siulersuisuinut ilaasortatut ingerlareersup pikkorivissortut Kalaallit Nunaanni ineriartornerat ilisimaarilluarpaa.

- Piffissami aggersumi pissanganartumi unammillernartumi periarfissarsiisumik inissisimavugut. Anguniangaraarput ineriartorneq ingerlateqqillugu suliniagaqarfiginissaa pikkorivissortut akornanni, timersorartuutigut ineriartortittuarumallugit, qaffasinnerpaamilu unammeqataatittuarumallugit, siulittaasunngortoq, Angutinnguaq Hegelund-Tittussen oqarpoq.

Paarlatani nersualaarpaa

Angutinnguaq Hegelund-Tittusenip siulittaasutut paarlatani, Nikolaj Christoffersen sullissisimanera pillugu nersualaarpaa:

- Siulittaasuusimasoq Nikolaj Christoffersen, Elite Sport Greenland-imi siulersuisuni ukiuni 12-ini, taassumalu iluani ukiuni kingullerni tallimani siulittaasutut pimoorussilluni ukkatarinnilluni peqataatitsilluarluni siulersuisoqatiminik sulilluarsimaneranik, pikkorivissortut ineriartortinnissaat Kalaallit Nunaat pillugu qujaffigerusuppara, siulittaasunngortoq Angutinnguaq Hegelund-Tittussen oqarpoq.

Siulersuisut nutaat inissititernissaat

Elite Sport Greenland ileqquusumik ataatsimeersuareernerata kingorna siulersuisunngortut ukuupput: Angutinnguaq Hegelund-Tittussen (siulittaasoq), Nivi Heilmann Efraimsen, Inooraq Brandt, Ann Arnfjord kiisalu Peter Fleischer Rex.

Elite Sport Greenland piffissami aggersumi ataatsimiinnermi siullermi siulersuisut ivertinneqarlutillu inissitsitissapput, ilaatigut siulittaasup tullianut kiisalu ataatsimiisitalianut assigiinngitsunut. Taamaasilluni periusissiap 2025 ilanngullugu ingerlasup naammassilluarnissaa ukkatarissallugu. Taasuma saniatigut periusissiassap 2026-imiik aallartittussap ineriartortinnissaa aamma ukkatarineqassalluni, Elite Sport Greenlandimit ilisimatitsissutigineqarpoq.