Assammik arsarneq: Nunatsinni pissartat klub-VM-imut peqataarusuttut
GSS, ukiuni kingullerni 15-ini assammik arsarnermi nunatsinni pissartaasartut, klub-VM-imut anngunniunnissamut peqataarusupput. Anngunniunneq aallartissaaq Las Vegasimi juulip aallartinnerani.
GSS-ip tullianik anguniagaa tassaavoq NACHC-mi anngunniunneq, tassanilu klubbi VM-imut Cairo-mi Egypten-imi ukiakkut ingerlanneqartussamut anngunniunnissamut billetisissalluni.
Foto: Nuka Bilo Heilmann
Assammik arsarnermi nunatsinni pissartaasartut GSS, ukioq manna klub-VM-imut anngunniunnermi peqataanissartik maanna anguniagaraa.
Taama GSS Facebookimi quppernermini allappoq, tassanilu suliffeqarfinnik inuinnarnillu timersoqatigiiffimmut aningaasaliisussarsiorluni.
Timersoqatigiiffiit nunaminni pissartanngoreerlutik klub-VM-imut anngunniunnerni peqataasinnaapput.
- 2020-miilli klub-VM-imut anngunniunnerit peqataaffiginissaannut eqqarsaateqartarpugut. Maannali aatsaat ataqatigiinnerusumik ajornannginnerusumillu angalanissarput pisinnaalerpoq, tamannalu Kalaallit Nunaata avataani unamminernut peqataanissamut periarfissaqarnerulersitsivoq, assammik arsartartut klubbianni GSS-imi siulittaasoq Nuka Bilo Heilmann Sermitsiamut oqarpoq.
GSS siornatigut anngunniunnissamut qaaqqusaasarsimapput, ukiunili kingullerni itigartittariaqartarsimallugit. Nuummi mittarfik nutaaq ammarneqarmat nunanullu allanut aqqutit pitsaanerulermata GSS-imeersut Amerika Avannarlermut juulip sisamaaniit arfineq-pingajuannut NACHC-p unammiuaartitsineranut peqataajartorniarlutik angalanissaat ajornannginnerulersimavoq.
Unamminissanut piareersimasut
GSS-ip angutitai ukiut 15-issaat tulleriisiinnarlugit pissartaasarput, ukioq mannalu maajimi kuultinnaqqillutik. Nunatsinni unammersuartoqareerneranit, Las Vegasimi anngunniunnissanut peqataaniarlutik pilersaarusiulerput. Tassani GSS-ip naatsorsuutigaa holdit arfinillit arfineq-pingasullu akornanniittut, ilaatigut Canadami, USA-mi Caribiamilu qeqertani pissartat, naapikkumaarlugit:
- Ukiuni kingullerni unammiuaarnerit malinnaaffigisarpavut iligiit allat ineriartornerat malinnaaffiginiarlugu, qularnanngilluinnartumillu isumaqarpugut unammillersinnaallugit. Nukissaqarluarluta unammisaqattaarutta ullullu tamaasa unammilluarutta qularinngilara kuultinnassinnaalluta, Nuka Bilo Heilmann nangaanani oqarpoq.
Amerika avannarlermi anngunniunnermi ajugaasut klub-VM-imut anngutissapput, tamannalu ukiaru Egyptenimi Kairomi ingerlanneqartussaavoq.
Aningaasaliisussarsiortut
Aasaru GSS-ip Las Vegasimut angalanissaanut aningaasanik naammattunik pissarsinissaq ajornaatsuinnaanngilaq, aningaasaateqarfiimmi qinnuteqarfiisa killiliussaat akunnassereersimapput.
Taamaattumik GSS-ip angalaneranut najugaqarneranilu aningaasartuutit matussuserniarlugit peqatigiiffik aningaasaleeqataasinnaasunik – innuttaasunik suliffeqarfinnillu – ujartuileruttorpoq.
- Aningaasatigut tapersersuinerit tamarmik, aningaasat qanoq amerlatigigaluarpataluunniit, nuannaarutigingaartarpavut. Timersornermik tapersersuiniaraanni aningaasat annikippallaartutut taaneqarsinnaanngisaannarput. Tapersersuinermi aningaasaliisut Kalaallit Nunaannik nittarsaassinissamut peqataassapput, unammiuaarnernilu peqataagaangatta Kalaallit Nunaat aningaasaliisullu tamaasa sinnerlugit nittarsaasseqataasinnaasarpugut, Nuka Bilo Heilmann oqaluttuarpoq.
