Assammik arsartartut nunanut allanut unammisartut gruppemi unamminerminni kingullermi ajorsarput

Kalaallit U-18-it nunanut allanut unammisartut assammik arsarluni nunarsuarmi pissartanngorniunnermi Kinami Chuzhoumi ingerlanneqartumi gruppimi unamminerit pingajuanni kingullermilu ajoraluartumik ajorsaqqipput.

Chines Taipeimut unamminermi 28-15-imik ajorsartut Assammik arsartartut kattuffiat tusagassiuutinut nalunaarummi allappoq.

Unammisartut assersuilluartut unamminerullu immikkoortuani siullermi sivisuumik Chinese Taipei isertitsinngitsoorteqattaaraat sungiusaasoq Victoria Svendsen unammineq pillugu oqarpoq.

- Naak unammineq aallartiinnartoq mål-inik tallimanik siuaraluartut. Unamminermut pulaqqinnissatsinnut periarfissaqaraluarluta mål-iniittuaq qaangeruminaatsipparput, saassussinerigullu iluatsinnaveeramik unammisatta assersuinerat sassasissoq qaangernaveeratsigit, sungiusaasoq oqarpoq.

Unamminerit suli sisamat

Målinittoq Jaliina Jakobsen unamminerup immikkoortut siulliup qiteqqunnerata nalaani assamigut kilerpoq, ajoraluartimillu unamminerup sinnera peqataasinnaajunnaarluni. Ajutoorneq ilimagisamiit annikinnerusoq sungiusaasoq paasititsivoq.

Victoria Svendsenip unamminerit pingasut misittakkanik nutaanik pissarsissutigimagaat oqarpoq:

- Maannakkut unamminerit sisamaasussanut siumut qiviartariaqalerpugut, tassa President Cup-imik taasartagaannik, aqagulu pisariaqartumik qasuersaassaagut. Pisinnaasarput tamaat akiuuttassaagut, unammisassallu tullinnguuttut nalilersorluassavagut, Victoria Svendsen oqarpoq.

Kalaallit Nunaat ataasinngorpat Argentinamut unammissaaq, taavalu marlunngorpat Kasakhstanimut unammissalluni.