BDO: Sermersuup inatsisit aalajangersakkat unioqqutissimavai
Illoqarfiit pingaarnersaata kommuniata 2023-mi ukiumut angusarisimasai missingersuutigineqartunit pitsaanerujussuupput, 241,2 millionit koruuniullutik. Immikkoortunili aalajangersimasuni aningaasat immikkoortinneqartut sinnerlugit atorneqarmata inatsisit unioqqutinneqarput, tamannalu kukkunersiuisut oqaaseqaatiminni eqqaavaat.
Kommuneqarfik Sermersooq 2023-mi millioninik pingasunik kisitsisitalinnik aningaasanik kaaviiaartitsilluarnerusimavoq.
Assi: Leiff Josefsen
Ilimagisamit sinneqartoorujussuarnermut akileraarutit akitsuutillu 100 millionit koruunit missaanniittut pissutaanerpaapput, tamanna kommunimi pisortap tulliata Marie Fleischerip aningaasaqarnermut ataatsimiititaliami politikerinut saqqummiussaani atuarneqarsinnaavoq. Sinneqartoornermut pissutaasut allat pingasut aamma eqqaaneqarput:
- Missingersuusiortarnermut inatsimmi aningaasartuutit annerpaaffilerneqarput, tamanna
kommunip inerneranut pitsanngorsaataavoq.
- NCD aamma Iserit kattunneqarneranut atatillugu taarsigassarsinerup aamma
sanaartornermut taarsigassarsinerup kinguneraa tigoriaannaatit 170 mio. koruunit.
- Sanaartugassanut Iluarsagassanullu Aningaasaateqarfimmik pilersitsineq isumaqarpoq
aningaasaateqarfimmi pilersaarutit naammassinissaannut aningaasat tigoriaannaassasut
Ingerlatsinertaviani angusani 436,8 mio. koruuninik sinneqartooruteqartoqartoq
takuneqarsinnaavoq, taavalu sanaartugassanit angusani 195,6 mio. koruuninik
amigartooruteqartoqartoq/atuisoqarsimasoq takuneqarsinnaavoq
Aningaasarsiornerup pitsanngorsarneqarnera
Kommunip nammineq aningaasaatai aamma karsimiittuutai 2023-p naanerani 1.388,3 mio. koruuninik amigartoorutaapput, karsimiittuutit 2022-p naaneranut sanilliullugit 418 mio. koruuninik pitsanngoriaateqarput. Taamaasillutik karsimiittuutit 436,9 mio. koruuninik sinneqartoorutaallutik.
Kommuneqarfik Sermersooq kukkunersiuisarfimmit BDO-mit, Deloittemik taartaanit, kommunip naatsorsuutai pillugit tikkuarneqarpoq.
BDO-p nalunaarusiaani ima allappoq:
- Naatsorsuinermi immikkoortuni arlalinni takuneqarpoq, aningaasaliissutigineqarsimasunit
atuinerusoqarsimasoq inatsit unioqqutillugu.
Suliffeqarfimmut Kiffartuussivik missingersuutinut iluarsisanut tunngatillugu takuneqarsinnaavoq, tassani 38 mio. koruuninik
atuineruffiummat. Meeqqanut Ilaqutariinnullu missingersuutit iluarsisanut sanilliullugu 13 mio. koruuninik atuineruffiusoq BDO aamma allappoq.
- Taamaasilluni aningaasartuutit matussuserneqannginnerani aningaasaliissutinik qinnuteqarnissamut
maleruagassat pisuni tamani malinneqarsimanngitsutut isigineqarput, BDO allappoq.
Pissutsit arlallit amigaataapput
Kukkunersiuisut nalunaarusiaanni allassimavoq kommunip allaffissornermi pissutsit ataasiinnaat iluarsisimagai, tamannalu maanna iluarsineqareerpoq. Kisianni ukiut siuliini oqaaseqaatit tallimat suli iluarsineqarsimanngillat, kukkunersiuisut nalunaarutaanni allassimavoq.
Aningaasaqarnermut ataatsimiititaliaq ullumi nalunaaqutaq 17.00 ataatsimiissaaq, tassanilu inassuteqassalluni ataatsimiititaliap ukiumoortumik nalunaarusiaq akuerissagaa kommunalbestyrelsimullu ingerlateqqissallugu. Taakkulu inaarutaasumik akuersissutigissavaat.
