KL

DK

Bolethe Stenskovip Kujallermi timimik aalatitsineq nukittorsassavaa

Kommune Kujalleq aamma Kalaallit Nunaanni Timersoqatigiit Kattuffiat nutaamik isumaqatigiissuteqarput timimik aalatitsineq timersornermilu peqatigiiffiit nukittorsarniarlugit. Bolethe Stenskovip suliniummi aqutsisuussaaq.

Kommune Kujallermi timersornerup aallunneqarnerulernissaanut suliniummi Bolethe Stenskov aqutsisunngorpoq.
KASSAALUK KRISTENSEN
Digitalredaktøri
Saqqummersinneqarpoq

Kommune Kujalleq aamma Kalaallit Nunaanni Timersoqatigiit Kattuffiat, GIF, nutaamik ukiuni pingasuni atuuttussamik isumaqatigiissuteqarput kujataani timersornerup aallunneqarnerulernissaa anguniarlugu.

Bolethe Stenskov suliniummik aqutsisuussasoq kommuni nittartakkamini allappoq.

- Pingaarnertut suliassaraara ulluinnarni aalanermik atugaqarneq meeqqanut nalinginnaalissasoq. Inuunerminni nassatarissagamikku, neriuppunga aamma innuttaasut kajumissutsiminnik peqataalissasut, nutaamik eqqarsartariaaseqarneq nassarlugu ammaffigalugulu periarfissatsialaat akorluarneqarsinnaammata. Bolethe Stenskov oqarpoq.

Bolethe Stenskov GIF-imi siulittaasuusimavoq maannalu siulittaasup tullersortaalluni, taamaammallu timersornermut suliniutinik aqutsinermik misilittagaqarluarluni.

Stenskov 2023-mit Kommune Kujalleq Kulturimut sunngiffimmullu immikkoortortaqarfiani timersornermut peqatigiiffinnullu siunnersortaavoq.

 -Ataataga palasiunikuugami nunatsinni angalasarnikooqaagut. 1979-mi Nanortalimmut nuuppugut, kingorna timersorneq kattiffilerinerlu soqutigisarilerpakka. Bolethe Stenskov oqaluttuarpoq.

Meeqqat sammisassaqarnerusut

Bolethep suliffittaamini pingaarnertut uku naapitassarai:

  1. Amerlanerusut aalasalissapput: Sammisat innuttaasut pisariaqartitaannut naleqqussakkat, soorlu atuarfiit, peqatigiiffiit nunaqqatigiit suleqatigalugit.
  2. Ilaasortat kattuffii: Sakkussat tapersiissutillu nutaat atorlugit nammineq kajumissutsimik peqatigiiffitsigullu sulinerup nukittorsarneqarnera.
  3. Suleqatigiinneq pitsaasoq: Ineriartorneq pitsaanerpaaq qularnaarumallugu nunat tamakkerlugu najukkanilu suliallit ataqatigiissaakkamik suleqatigiinnerat.

    4. - Isumaqarpunga kajumissutsimik peqataarusussuseq nukittorsartariaqartoq. Peqatigiiffiit aqutsisunit nukittorsarneqartariaqartut malunnarpoq. Taamaattumik kajumissutsimik suliaqarnermi sakkussanik ingerlatsinernillu ineriartortsinerup attatiinnarneqarnissaa pingaaruteqarpoq. Nukissanik annertusaanissaq pisariaqarpoq, taamaalilluta Kalaallit Nunaata kujasinnerusortaani pissutit tamaasa sillimaffigisinnaaniassagatsigit, oqarpoq.

    Kommune Kujallermut isumaqatigiissut 2025-miit 2027-mut atuussaaq.  Tassani ataatsimoorussamik takorluukkat suliniutinik tapersersorneqassapput, atuarfimmi meeqqat aalanerulernissaat sunngiffimmilu sammisassaqartoqarnerulernissaa anguniakkanut ilaassallutik.

motion kommune kujalleq idræt og motion grønlands idrætsforbund bolethe stenskov timersorneq sundhed sport

ATORFIIT Se alle jobs

Powered by Labrador CMS