UNNIA
Italiamukalersoq
Saamerleq Steven De Oiliviera Schumann, talerperlu FC Babylonip futsalertartuinut ilannguttussaq Angutivik Gundel-Collin.
Foto: KAK - Kalaallit Arsaattartut Kattuffiat Facebookside
Angutivik Gundel-Collin, tassa kalaallit angutit futsalertartuisa nunani
allani unammisartuisa ilaat nunani tamalaani futsalertartunik isumaqatigiissusiussisartoqarfik
KM Agency isumaqatigiissummik atsioqatigereernerani Italiami Sassarimi
isikkamik arsaattartut klubbianni FC Babylonimi arsaattartunut
ilannguttussanngorpoq.
Angutivik nunani tamalaani futsalertartunut periarfissanik amerlanernik
pilersitsinissap suliniutigineqarnerata ilutigisaanik piukkunnaateqarluartutut
ilisaritinneqarpoq. Steven De Oiliviera Schumannip, tassa nunatsinni angutit
futsalertartut nunani allani unammisartuinut tunngasunik suliaqartartuusup, KM
Agencymut attaveqartuusimavoq.
- Angutivik isumaqatigiissutip sunik imaqarneranik qanorlu pisoqarnissaanik
ilisimatinneqarpoq, uangalu isumaqatigiissusiussisartoqarfik periarfissat
pillugit oqaloqatigaara. Tamatumani suliaq qaammatini marlunni-pingasuni isumaqatiginninniutaareerluni
illuatungeriit atsiorpaat, Steven De Oiliviera Schumann oqarpoq.
Angutivik Gundel-Collin FC Babylonip futsalertartuinut U19-inut inersimasunullu
ilanngutissaaq. Angutivik isumaqatigiissuteqarnermigut taamaalilluni
futsalertartut nunani tamalaaneersut peqatigalugit Italiami unammeqataasalertussanngorpoq,
nunatsinnilu futsalertartut allat nunani tamalaani
unammeqataasalersinnaanngornissaannut ammaassillunilu sunniuteqaqataavoq.
