Johannes Reimer kalaallini Taekwondomi oqaluttuarisaanermi siullerpaamik 8. Dan-inngorpoq
Taekwondomi kalaallini aatsaat taama amerlatigisunik arfineq-pingasunik qernertunik qitequteqartoqarpoq. Johannes Reimer Sisimiuneersoq taekwondomi kalaallini qaffasinnerpaamik angusaqarnermini oqaluttuarisaanermut ilannguppoq.
Assiliisoq: Lena Reimer
Johannes Reimer, Sisimiuni politiiusoq 57-inik ukiulik, Taekwondomi 8. dan-imik kalaallini siullersaalluni angusaqartoq oqaluttuarisaanermut ilannguppoq. Ukiorpassuarni tunniusimalluarluni tamaviaarluni sungiusartuartarsimanera pissutaalluni taama angusivoq.
Sungiusaasuminit, Grandmaster Leong Wai Mengimit, 8. danimut qinnuteqarnissaanik kajumissaarneqarpoq. World Taekwondo Federation-imut qinnuteqaammini Johannesip oqaluttuaraa inuunini naallugu Taekwondomut tunniusimasuunini.
Maajimi qinnuteqaatini akuerineqarsimasoq paasivaa:
- 8. dan-imut qinnuteqarama nunanit tamalaanit peqataaffigineqartartumit akuerineqarsimanera tusarakku upperiuminaatsippara. Eqqumiilaartumik qisuariarunarpunga.
Choi Hong Hip ilerra
8. Danitut angusaqassagaanni piumasaqaatit sukannersut arlallit naammassisariaqarput. Choi Hong Hipip, Taekwon-Domik nutaaliaasumik pilersitsisup, ilerrata alakkarnissaa piumasaqaatinut ilaavoq.
Johannes Reimer piumasaqaatinik tamakkuninnga tamanik naammassinnippoq Koreamullu Avannarlermut uppernarsaatini aallugu.
- Korea Avannarlermiitilluta Hong Hisip ilerra alakkarpara.
9. dan angorusukkaa
Johannes Reimer 8. danimik allagartaqarluni Sisimiunut pingasunngornermi juunip 19-ianni tikippoq, maannalu 9. danip anguniarnissaa pilersaalereerlugu.
- 9. dan angunissaa ukkataraara. Piumassuseqaraanni utoqqatsissutissarsiortarnanilu timersornermi sunaluunniit anguneqarsinnaavoq. Timersoruloortariaqanngilaq aammali sivisuumik eqqissisimalluni sungiusartaraanni angusaqarluartoqarsinnaavoq.
