KL

DK

Kalaallit arsaattartut atisaat piumaneqarluartut: Hummel sanaqqittoq

Kalaallit nunanut allanut unammisartuisa atisaat piumaneqarluarput. Nunatsinnut malinnaasut amerleqqaneranni nunanut allanut unammisartut tujuuluat nutaaq pisiariumaneqaqaaq. Tuniniarneqalerneranit ulloq ataaseq qaangiutinngitsoq nungunneqarpoq. Piumaneqarluarnera pissutigalugu Hummel maanna tujuuluaqqanik amerlanerusunik tunisassiorpoq.

KAK nunanut allanut unammisartunut atisanik nutaanik saqqummersitsivoq. Tujuuluaraq tunisaalerneranit ulloq ataaseq qaangiutinngitsoq nunguppoq. Piumaneqarluarnerat matussuserniarlugit atisanik tunisassiorfik Hummel amerlanerusunik tunisassiulerput.
KASSAALUK KRISTENSEN
Digitalredaktøri
Saqqummersinneqarpoq

Arsaattartut tujuuluaraat aappaluttoq, Kalaallit Nunaanni arsaattartut nunanut allanut unammisartuisa qanittukkut saqqummersitaat, nuannarineqarluarpoq.

Nunarsuup sinnerata Kalaallit Nunaat malinnaaffigileruttornerani nunanut allanut unammisartut atisaat nunarsuarmi tamarmi piumaneqarluarnerani Hummel sanaartoqqissalluni aalajangerpoq.

Donald Trumpip Kalaallit Nunaat pillugu oqariartuutaa tassaavoq "Make Greenland Great Again“, Hummelilli nittarsaassinermut pisortaata Morten Lundip Kalaallit Nunaat "Great“-ioreersoq qularutiginngilaa. Nunanullu allanut unammisartut tujuuluat tunisaalluartoq oqaatigalugu:

- Kalaallit nunanut allanut unammisartut atisaannik soqutiginninnerup annertunera tupaallaatigaarput. Kalaallit Nunaat nunarsuarmi arsaattartut annersaannut ilaanngikkaluarluni immikkuullarilluinnartuuvoq – nunanullu allanut unammisartut atisaannik nutaamik saqqummiussinermi Kalaallit Nunaata ’Great Again’-itut inissisimalersinneqartariaqarnera pisariaqanngitsoq paasinarsivoq. Kalaallit Nunaat ’Great’-ioreerpoq, tamatumunngalu ilaasinnaanerput tulluusimaarutigeqaarput, Hummelimi nittarsaassinermi pisortaq Morten Lund oqarpoq.

Akunnerit 24-unngitsut pisiniarfinniittoq

Atisat juulli sioqqullugu tuniniarneqalermat nalunaaquttap-akunneri 24-t qaangiutinngitsut nungunneqartoq hummel tusagassiuutinut nalunaarummi allappoq.

Kalaallit arsaattarnerat ineriartorluarpoq. Kalaallit Nunaanni Arsaattartut Kattuffiat oqaluttuarisaanermut ilannguttussamik siornalu alloriarpoq, taakku pisortatigoortumik CONCACAF-imut ilaasortanngorniarluni qinnuteqaamminik tunniussigamik. Nuna ilaasortanngorpat Amerikap Avannaani Qiterlermilu arsaattartunut anngunniunnissamut periarfissaqalissaaq.

- Kalaallit Nunaata ineriartorneranut pissanganartumut peqataanerput tulluusimaarutigeqaarput, neriuppugullu ukiuni aggersuni ineriartorneranut ajunngitsumik tapersersuisinnaalluta. Kalaallit Nunaat aningaasaliiffiuvoq uagutsinnut immikkuullarissoq, qilanaaraarpullu Kalaallit Nunaanni arsaattartut kattuffiannik qanimut suleqateqarnissarput, tassanilu Kalaallit Nunaat – minnerunngitsumillu kalaallit arsaattarnerat – ’GREAT’-ioreersoq nunarsuarmut takutissavarput, Morten Lund naggasiivoq.

Nunami namminermi unamminermi atisat nutaat saniatigut aamma nunanut allanut unammisartunut atisat nutaat tallimanngornermi januaarip 17-ianni 2025-mi saqqummersinneqassasut Hummelip nalunaarutigaa.

sport hummel fodboldlandshold concacaf timersorneq morten lund

ATORFIIT Se alle jobs

Powered by Labrador CMS